Tavela Nolupandu Nokuava Nomutima Auho
JEOVA, Tate yetu woluembia keulu, una esuko enene nonthue. Ondaka ya Huku itupopila okuti oe una esuko enene novaumbili vae aveho. (1 Pedro 5:7) Onkhalelo imue Jeova alekesa okuti una esuko nonthue, okutukuatesako mononkhalelo ononyingi opo tutyivile okumuumbila nekolelo. (Isaías 48:17) Haunene tyina tuvasiwa novitateka vituetela ononkhumbi, Jeova uhanda tupole esilivilo kombatelo etuavela. Ovitumino viapelwe Moisesi vilekesa ombatelo oyo.
Movitumino ovio, Jeova noluembia wavele ombatelo pala okukuatesako vana ankho ‘vamona ononkhumbi,’ ononthyiwe, ovahepe, no nongendi motyilongo. (Levítico 19:9, 10; Deuteronômio 14:29) Jeova utyii okuti vamue povaumbili vae vapondola okuvatela ovakuatate vavo vafenda navo. (Tiago 1:27) Moluotyo, nawike povaumbili vae wesukisa okuanya ombatelo apewa na vana Jeova alunda opo vaave ombatelo oyo. No ngotyo, tyina tutavela okuvatelwa tuna okutyilinga monkhalelo yaviuka.
Tupu, ondaka ya Huku itoneka okupopia okuti ovanthu va Huku vesukisa okuaava. Hinangela “omuhepe ankho wahepa”, una Jesus amuene mondyuo ya Huku mo Jelusalei. (Lucas 21:1-4) Tyipondola omukulukai oo, ankho upewa ombatelo Jeova ava noluembia yapopiwa Movitumino. No ngotyo, namphila omuhepe oo ankho ahepa, kahinangelwa mokonda yokupewa, mahi uhinangelelwa kokuava. Otyituwa tyokuava tyemuetelele unene ehambu mokonda Jesus wati, “okuava tyieta vali ehambu tyipona okupewa.” (Atos 20:35) Okusoka kuotyo, oñgeni upondola okukala ‘notyituwa tyokuava’ opo ukale nehambu litundililako?—Lucas 6:38.
“Oityi Mandyifete Okukondolela Jeova?”
Omuhoneki wo no salmu wapulile okuti: “Oityi mandyifete okukondolela Jeova, Mokonda yovipuka aviho oviwa andingila?” (Salmo 116:12) Oviwa patyi alingililwe? Jeova wemuamenene momuwo “wononkhumbi nemone.” Tupu, Jeova ‘wahupisile omuenyo [wae] kononkhia.’ Pahe ankho uhanda okufeta Jeova “okumukondolela.” Oityi omuhoneki wo no salmu ankho ena okulinga? Oe wati: “Mandyifete atyiho napopia ku Jeova.” (Salmo 116:3, 4, 8, 10-14) Watokolele okutualako nomilao viae aviho alingila Jeova nokufuisapo ovilinga ankho apewa na Jeova.
Nove upondola okulinga ngotyo. Ñgeni? Mokutyinda apeho omuenyo welikuata novitumino via Huku. Ngotyo, molekesa okuti okufenda Jeova otyipuka tyakolela vali momuenyo wove. Tupu, molekesa okuti uyeka ospilitu ya Huku ikuhongolele movipuka aviho ulinga. (Eclesiastes 12:13; Gálatas 5:16-18) Tyotyili, nalumue motyivili okufeta Jeova moluovipuka aviho ekulingila. No ngotyo, okuava nomutima auho movilinga viae, tyihambukiswa ‘omutima wa Jeova.’ (Provérbios 27:11) Elao ewa unene okuhambukiswa Jeova, mokulinga ngotyo!
Linga Etyi Tyieta Ouwa Mewaneno
Tyotyili ove motavela okuti ewaneno lio Vakristau liekukuatesako mononkhalelo ononyingi. Menyina liewaneno, Jeova ukahi nokuava okulia okunyingi kuopamphepo. Ove wanoñgonoka otyili tyekuyovola monongeleya mbomatutu no menthiki liopamphepo. (João 8:32) Omaliongiyo ewaneno, novionge ovinene, vipongiyua “nomupika Wekolelo no Kualunguka” viekukuatesako okuvasa enoñgonoko lituala komuenyo wahapu momphangu yombembwa pano pohi, muhakakala vali omaluihamo nononkhumbi. (Mateus 24:45-47) Ove utyivila okuvalula ovipuka aviho oviwa watambulale, nevi ukahi nokutambula mewaneno lia Huku? Oityi ove upondola okukondolela ewaneno?
Apostolu Paulu wahoneka okuti: “Olutu aluho, luawanekwa nokuundapela kumue pala okuava etyi tyasukisa. Mokonda kese nthele otyilinga tyayo tyivatela pala okukulisa olutu, okulipameka olo muene nohole.” (Efésios 4:15, 16) Namphila ovihonekwa ovio, tete vipopia Ovakristau ovalembulwa, mahi muakutikinya Ovakristau aveho hono. Kese umue mewaneno upondola okulinga etyi tyeta ouwa nokukulisa ewaneno. Oñgeni matutyilingi?
Tupondola okulinga ngotyo, mokulinga ononkhono mbokukuatesako nokupameka vakuetu mopaspilitu. (Romanos 14:19) Tupondola okulinga etyi ‘tyikulisa ewaneno’ mokukala notyinyango tyospilitu tya Huku movipuka aviho tulingila ovakuatate vetu. (Gálatas 5:22, 23) Tupu, tupondola okuovola onomphitilo “mbokulinga ovipuka oviwa pala ovanthu aveho. Mahi, haunene pala vana tufenda navo.” (Gálatas 6:10; Hebreus 13:16) Aveho mewaneno—ovakuatate, nonomphange, ovakuendye, novakulu—vapondola okulinga etyi ‘tyipameka ewaneno mohole.’
Okuyawisako, tupondola okuundapesa ounongo wetu, nononkhono, nomalumono etu, pala okuvatela ovilinga viokuyovola omienyo vikahi nokulingwa newaneno. Jesus Kristu wati “muetyipewa otyali.” Oñgeni matukumbulula? Jesus wati “nonwe tyavei otyali.” (Mateus 10:8) Ngotyo, undapa nononkhono movilinga viokuivisa Ouhamba wa Huku nokulinga ovalongwa. (Mateus 24:14; 28:19, 20) Okuti ove una etyi uhevili okulinga movilinga ovio? Hinangela omuhepe wahepa wapopiua na Jesus. Etyi aavele ankho katyihi. Anthi, Jesus wati waava vali tyipona aveho. Oe waava atyiho ankho apondola momuenyo wae.—2 Coríntios 8:1-5, 12.
Tambula Nomutima Waviuka
Anthi, pamue omivo vimue wesukisa okupewa ombatelo newaneno. Uhanye kese mbatelo upewa newaneno tyina ulinga ononkhono mbokufinda omasukalalo ouye uno. Jeova ukahi nokuava ovalume vafuapo no kuna esuko “liokunthita ewaneno,” opo vekuvatele tyina utumbukilwa novitateka nononkhumbi. (Atos 20:28) Ovakulu vewaneno no vakuavo vali vahanda okukuungumanesa, nokukuvatela nokukuyakulila mononthiki mbokuepuiya.—Gálatas 6:2; 1 Tessalonicenses 5:14.
Noñgonoka okuti tyina utambula ombatelo, wesukisa okutambula nomutima waviuka. Tambula apeho nolupandu ombatelo upewa. Kese mbatelo upewa novakuatate, itala ngatyina elekeso liokankhenda ka Huku uhatokalele. (1 Pedro 4:10) Otyo tyakolela mokonda yatyi? Omokonda onthue katuhande okutambula ngetyi tyilinga ovanthu ovanyingi mouye, vahapandula.
Tavela Monkhalelo Yapola Pokati
Momukanda Paulu ahonekela ewaneno mo Filipu, wapopia konthele ya Timoteo okuti: “Ndyitupu nawike vali una ombili ngo yae, memuvatela tyotyili.” Iya, Paulu ayawisako okuti: “Vakuavo aveho vaovola ovipuka viavo muene, ha via Kristu Jesus.” (Filipenses 2:20, 21) Okusoka konondaka ombo mba Paulu, oñgeni hono tupondola okulityilika okusukalala unene ‘nomahando etu muene’?
Katupondola okukuluminya vakuetu mewaneno tyina tuveita opo vetukuateseko okutetulula ovitateka vietu. Omokonda yatyi? Nkhele soka vala: Tyotyili tupandula unene tyina omukuatate umue etuavela otyipuka pala okutuvatela motyitateka tuna. Mahi okuti tumukuluminya opo etuavele apeho ombatelo yatyo oyo? Otyo katyaviukile. Tupu, tyina ovakuatate vetu ononthyolwa vahambukwa apeho nokutuavela ombatelo, onthue tuesukisa okupola pokati konthele yetyi tukevelela vetuavele. Mokonda, ovipuka aviho ovakuatate vetu valinga pala okutuvatela opo tukoleleye movitateka vietu, tuhanda vetyilinge ovo muene tyihakuluminyua.
Upondola okukala nonthumbi yokuti ovakuatate vove no nomphange Ovakristau, apeho vena ehando liokukuvatela. Mahi, pamue kavetyivili okukuavela atyiho wesukisa. Pomivo ngovio, kala nonthumbi yokuti Jeova mekuvatela movitateka viove, ngetyi avatelele omuhoneki wo no salmu.—Salmo 116:1, 2; Filipenses 4:10-13.
Moluotyo, tavela nolupandu ombatelo Jeova ekuavela, haunene pomivo viovitateka nononkhumbi. (Salmo 55:22) Oe uhanda ove ulinge ngotyo. Anthi, tupu oe uhanda ove ukale omunthu “waava nehambu.” Mahi, linga ngetyi ‘watokola nomutima [wove]’, okuava etyi uvila pala okuvatela efendelo liotyotyili. (2 Coríntios 9:6, 7) Ngotyo, motyivili okulinga ovipuka ovio vivali—okutambula nolupandu, nokuava nomutima auho.
[Okakasa/Olutalatu pefo 32]
“Oityi mandyifete okukondolela Jeova, mokonda yovipuka aviho oviwa andingila?”—Salmo 116:12.
[Olutalatu pefo 32]
▪ Ovola onomphitilo ‘mbokulinga ovipuka oviwa pala ovanthu aveho’
▪ Kala omupameki wa vakuenyi mopaspilitu
▪ Linga ononkhono mbokuundapa unene movilinga viokulinga ovalongwa