Okuti Onongeleya Ambuho Onongwa?
ONTHUE TUKAHI mouye muna onongeleya ononyingi mbelikalaila. Ovanongo vamwe, vaimbuka okuti hono kuna onongeleya 19 ononene, no nonthutu mbuhika po 10.000 mouye auho. Iya otyo, tyaavela ovanthu ombundi onene yokuholovona. Mahi, okuti tyakolela okuholovona ongeleya?
Ovanthu vamwe vapopia okuti, onongeleya mbukahi ngonondyila mbelikalaila, mbuenda keulu liomphunda. Ngotyo, vati katyilingi natyike okuholovona ondyila uhanda, mokonda ambuho mbuenda pomphangu ike. Ovo vasoka okuti kuna vala Huku wike Omukulami, ngotyo, onongeleya ambuho mbutuala ovanthu kwe.
Okuti Onongeleya Ambuho Onondyila Mbutuala ku Huku?
Jesus Kristu omunthu wongeleya, omulongesi wahumbua unene mehipululo aliho, oityi apopia konthele yotyo? Oe wapopila ovalongwa vae okuti: “Nyingililei pombundi yahita.” Omokonda yatyi? Omokonda “ombundi onthanda netapalo liahandyuka lituala kehanyauno, iya ovanthu ovanyingi omo vekahi nokunyingilila. Anthi, ombundi yahita nondyila yahita yenda komuenyo wahapu, iya ovanthu veivasa kavehi.”—Mateus 7:13, 14, Bíblia Tradução interconfessional.
Okuti Jesus ankho ukahi nokuti onongeleya mbumwe tyotyili mbutuala “kehanyauno”? Ine ankho ulongesa okuti vana vehetavela ku Huku ovo vala vekahi mondyila onthanda? Vana vetavela ku Huku, okuti kese ngeleya omu vekahi, ngotyo ondyila yahita ituala komuenyo?
Liwa-liwa etyi Jesus amana okupopia okuti kuna vala onondyila onombali, oe ati: “Lungukei kovauli vomatutu! Veya kuonwe ngatyina onongi, mahi, mokati omahunyu.” (Mateus 7:15, Tradução interconfessional) Konyima oe ati: “Haaveho ko vati ‘Tatekulu, Tatekulu!’ mavakanyingila mouhamba wo keulu. Anthi, oyouna vala ulinga ehando lia Tate yange ukahi keulu.” (Mateus 7:21, Bíblia Tradução João Ferreira de Almeida) Inkha omunthu umwe utiwa omuuli ine upopia okuti Jesus o “Tatekulu” yae, omunthu oo una ongeleya, katiwa ketavela ku Huku. Moluotyo, Jesus walondola nawa okuti, onongeleya ambuho hanongwa ko, novalongesi vonongeleya haaveho ko vayumbwa onthumbi.
Okuti Tyivilwa Okuimbuka Ondyila Yahita?
Iya mokonda haambuho ko onongeleya mbutuala ku Huku, oñgeni ove upondola okuvasa ongeleya yaviuka ituala tyili komuenyo, pokati konongeleya ononyingi? Nkhele tala kongeleka ei: Soka ñgeno ove wavomba mepundaumbo limue enene. Pahe utokola okuita ombatelo. Omunthu umwe nonthumbi ukupopila okuti enda no kokulio. Mahi, omukuavo ekupopila okuti enda no kokumbili. Nkhele omukuavo, ekupopila okuti upondola okuholovona kese ndyila uhanda, mohiki oku wenda. Okuhulililako, umwe nae ukahi moungendi, ekulekesa omapa yomanyingilikilo alekesa ondyila yaviuka. Iya oe tupu, ekuavela omapa yomanyingilikilo oo, opo wende nokutalamo. Pahe, kumakala nonthumbi yokuti mohiki oku uhanda okuenda?
Tupu, no pokuholovona ongeleya yaviuka, tuesukisa otyipuka tyitulekesa nawa ongeleya yo tyotyili. Okuti kuna otyipuka tyipondola okutuvatela? Enga, kuna. Otyipuka otyo, Ombimbiliya, ina ipopia okuti: “Ovihonekwa aviho viahonekwa kononkhono mba Huku, viakolela pala okulongesa, nokuviyula, nokuviukisa ovipuka, nokulongesa nouviuki.”—2 Timóteo 3:16, Tradução Ferreira de Almeida.
Tupu, kuna Ombimbiliya imwe melaka ove wii, ipondola okukuvatela okuvasa efendelo lio tyotyili. Ovanthu valinga omukanda uno, Onombangi mba Jeova, valinga Ombimbiliya yotyotyili, itiwa Tradução do novo Mundo das Escrituras Sagradas. Anthi, inkha ove ku Mbangi ko ya Jeova, upondola okutanga ono Mbimbiliya ononkhuavo, tyina wovola okuimbuka ongeleya ongwa nombi. Moluotyo, mo nonthele ombu, muaundapeswa Onombimbiliya mbumwe mbuiwe no kuahumbwa no nongeleya ononkhuavo mouye.
Putyina utanga ononthele mambulandulako, eleka etyi ove wii netyi Ombimbiliya ipopia. Paka momutima onondaka mba Jesus konthele yoñgeni tupondola okuimbuka ongeleya ongwa no ombi. Oe wati: “Ngotyo, omuti omuwa wiima ovinyango oviwa, mahi, omuti omuvi wiima ovinyango ovivi. Omuti omuwa kaupondola okwima ovinyango ovivi; nomuti omuvi kawiimi ovinyango oviwa.” (Mateus 7:17, 18, Tradução Ferreira de Almeida) Tala ovinyango vitatu oviwa, Ombimbiliya ipopia okuti oko kuimbukilwa “omuti omuwa.”
[Olutalatu pefo 3]
Ombimbiliya ikahi ngomapa yaviuka ipondola okuvatela omunthu okuvasa ongeleya yaviuka