Watchtower OMBIMBILIYOTEKA
Omutala Womulavi
OMBIMBILIYOTEKA ONLNE
Nyaneka
  • OMBIMBILIYA
  • OMIKANDA
  • OMALIONGIYO
  • w09 8/1 pp. 26-30
  • “Tualako Okukala Mohole ya Huku”

Naike ovindiu iyeemba ku otyo

Tala mukwe pena etyi tyahaendele movindiu

  • “Tualako Okukala Mohole ya Huku”
  • Omutala Womulavi Wivisa Ouhamba Wa Jeova—2009
  • Onthele-kati
  • Tyelifwa
  • Oñgeni Matutualako Okukala Mohole ya Huku?
  • Jeova Wetuavela Otyipuka Tyakolela
  • Kala Nohole na Vana Jeova Ehole
  • Humba Vana Vekahi Komutwe
  • Tualako Tyasukuka Komaiho a Jeova
  • “Etyi Otyo Tyihangununa Ohole na Huku”
    ‘Tualako Okukala Mohole ya Huku’
  • Ohole ya Huku itualako Apeho
    Oñgeni Motualako Okukala Mohole ya Huku?
  • Tualako Okuendela Mohole ya Huku
    Oityi Ombimbiliya Tyilityili Ilongesa?
  • Omukanda Wononkhalamutwe Mbo Nombangi Mba Jeova
    Oñgeni Motualako Okukala Mohole ya Huku?
Tala vali
Omutala Womulavi Wivisa Ouhamba Wa Jeova—2009
w09 8/1 pp. 26-30

“Tualako Okukala Mohole ya Huku”

“Tualeiko okukala mohole ya Huku, putyina mukevelela okankhenda ka Tatekulu yetu Jesus Kristu, pala okupewa omuenyo wahapu.”—JUDAS 21.

1, 2. Oñgeni Jeova alekesa oluembia ena nonthue? Oñgeni tutyii okuti kamatukala mohole yae tyihalingi natyike?

JEOVA HUKU ulekesa mononkhalelo ononyingi okuti una oluembia nonthue. Tyilekesa unene oluembia lua Jeova, otyilikutila tyofeto apongiya. Oluembia olunene unene ena novanthu, luemuhindila okutumikisa Omona wae onthyolwa pano pohi, opo eye okunkhia mokonda yetu. (João 3:16) Jeova walinga ngotyo, mokonda uhanda tukale nomuenyo wahapu. Tupu, uhanda apeho tuvase ouwa moluembia luae luahapu!

2 Okuti tupondola okulinga etyi tuahanda, mokonda Jeova unale oluembia nonthue? Au. Mo versikulu 21 ya Judas tutangamo elondolo liati: “Tualeiko okukala mohole ya Huku, putyina mukevelela okankhenda ka Tatekulu yetu Jesus Kristu, pala okupewa omuenyo wahapu.” Onondaka “tualeiko okukala mohole ya Huku,” mbulekesa okuti onthue tuna etyi tuna okulinga. Oityi, tuesukisa okulinga opo tutualeko okukala mohole ya Huku?

Oñgeni Matutualako Okukala Mohole ya Huku?

3. Jesus wati oityi tyakolela opo atualeko okukala mohole ya Tate yae?

3 Ekumbululo tulivasa monondaka mba Jesus, apopile motyinthiki tyahulilila tyomuenyo wae pano pohi. Oe wati: “Inkha muendela movitumino viange, mamutualako okukala mohole yange, ngetyi ame ndyitualako okukala mohole ya Tate mokonda ndyiendela movitumino viae.” (João 15:10) Jesus ankho utyii nawa okuti okuendela movitumino via Jeova tyakolela unene opo akale noupanga omuwa na Tate yae. Inkha Omona uhena nkhali wa Huku una okulinga ngotyo, hatyoko nonthue tuna okulinga?

4, 5. (a) Onkhalelo patyi yotete tupondola okulekesa okuti tuhole Jeova? (b) Omokonda yatyi tuhena ehunga liokuanya ovitumino via Jeova?

4 Tete, matulekesa okuti tuna ohole na Jeova tyina tutavela kwe. Apostolu João wetyipopia okuti: “Ohole na Huku ihangununa okutavela ovitumino viae. Iya ovitumino viae kavileme.” (1 João 5:3) Ovanthu ovanyingi mouye hono, kavetyihole tyokutavela komunthu nawike. Anthi, tala onondaka ombu: “Iya ovitumino viae kavileme.” Jeova ketuiti okulinga otyipuka ei okuti tyalema unene pala onthue.

5 Nkhele soka: Ove upondola okutuma omunthu uhole, opo alinge otyipuka wii okuti tyalema unene kametyivili? Au! Jeova una oluembia unene tyipona onthue, tupu wii vali nawa etyi tuvila netyi tuhevili okulinga. Ombimbiliya itupopila okuti Jeova ‘uhinangela okuti tuatunda keheke.’ (Salmo 103:14) Oe nalumue etuita okulinga etyi tuhevili. Moluotyo, tutupu ehunga liokuanya okutavela ovitumino via Jeova. Anthi, okutavela ovitumino viae, tyituavela omphitilo ongwa yokulekesa ku Tate yetu keulu okuti tyotyili tumuhole, tuhanda okutualako okukala mohole yae.

Jeova Wetuavela Otyipuka Tyakolela

6, 7. (a) Omutima otyityi? (b) Popiapo ongeleka ilekesa oñgeni omutima upondola okutuvatela okukala mohole ya Huku?

6 Mouye uno wokuepuiya, tuesukisa okulinga omatokolo omanyingi, akutikinya okutavela ku Huku. Oñgeni matutyimono okuti omatokolo etu elikuata nehando lia Huku? Jeova wetuavela otyipuka tyakolela matyituvatela unene konthele yokutavela. Otyipuka otyo, omutima. Omutima oityi? Ounongo wokutala nawa ovituwa vietu muene novipuka tuholovona. Uundapa ngomukoyesi mokati ketu. Utuvatela okutala nawa ovipuka matuholovona momuenyo, ine okusokolola nawa evi tuaholovonale, nokuvitala inkha oviwa ine ovivi, inkha viaviuka ine viapenga.—Tanga Romanos 2:14, 15.

7 Oñgeni matuundapesa nawa omutima wetu? Soka kongeleka ei. Omunthu umue ukahi moungendi wepuiya mohika ehei. Mutupu ondyila, ine etapalo, ine omanyingilikilo. Anthi, no ngotyo, una onthumbi yokuhika oku ahanda okuenda. Oñgeni etyivila? Una omunthu umuhongolela. Omunthu oo uhole okuendakoale, ondyila wii nawa. Inkha ongendi oyo itupu ou umuhongolela, oe utyii okuti ñgeno wavomba. Tupu, ovanthu inkha kavakalele nomutima, ñgeno vavomba tyina aovola okulinga omatokolo aviuka konthele yovituwa novikuavo vali momuenyo.

8, 9. (a) Oityi tuna okuhinangela konthele yomutima wetu? (b) Oityi tuna okulinga opo omutima wetu ukale ombatelo yotyotyili?

8 Ngetyi omunthu uhongolela mukuavo apondola okunguanguana, nomutima wetu kawafuilepo. Inkha omunthu oo unguanguana, mupondola okuvomba. Tupu, inkha tuyeka omahando omutima wetu etuhongiliye unene pokulinga omatokolo, oityi matyipiti nonthue? Omahando etu elungavi, apondola okuhindila omutima okutuhongolela omapita. Ombimbiliya itulondola okuti, “omutima omukengeleli unene upona kese tyipuka, no kuhakevelela.” (Jeremias 17:9; Provérbios 4:23) Tupu, inkha una uhongolela ongendi oyo keiko nawa, ondyila keihinangela, tyafuile mavatela katutu ine kamavatela. Nonthue inkha katuyumbu onthumbi mehongolelo lihapiluluka Liondaka ya Huku Ombimbiliya, omutima wetu kamautuvatela. (Salmo 119:105) Mahi, ovanthu ovanyingi mouye uno vasuka vali unene nomahando omutima, vetavela vala katutu kovitumino Viondaka ya Huku, ine kavasuku navio. (Tanga Efésios 4:17-19.) Otyo, otyo ovanthu ovanyingi valingila ovivi, namphila vena omutima.—1 Timóteo 4:2.

9 Tuesukisa okutokola okuhalingi ngovanthu ovo! Anthi, tutualeiko okuyeka Ondaka ya Huku ilonge omutima wetu opo ukale ombatelo yotyotyili. Tuesukisa okutehelela omutima wetu walongua Nombimbiliya, atuhayeke omahando etu omavi etutumine. Tupu, tuesukisa okulinga ononkhono mbokuhumba omitima vio vakuatate vetu, no nomphange mbetu mewaneno. Tulingei ononkhono opo tuhevelingise onkhali, nokuhinangela okuti omutima wo mukuatate wetu pamue waneñgena vali tyipona wetu.—1 Coríntios 8:12; 2 Coríntios 4:2; 1 Pedro 3:16.

10. Ononthele patyi ononthatu mbomuenyo matulilongesa?

10 Pahe tutalei ononthele ononthatu mbomuenyo, omu tupondola okulekesa ohole yetu ku Jeova mokutavela. Kese nthele matulilongesa, muakutikinya omutima. Mahi omutima wesukisa okuhongolelwa novitumino Viombimbiliya. Ononkhalelo ononthatu mbokutavela ku Jeova nohole ombombu: (1) Okukala nohole na vana Jeova ehole, (2) okuhumba vana vekahi komutwe, (3) okulinga ononkhono opo tutualeko tyasukuka komaiho a Huku.

Kala Nohole na Vana Jeova Ehole

11. Oityi tuesukisila okukala nohole na vana Jeova ehole?

11 Tete, okukala nohole na vana Jeova ehole. Konthele youpanga, ovanthu vekahi ngolukutau. Tuna eyembelo liokuhetekela etyi vakuetu valinga. Omupakeko wetu utyii nawa oñgeni omapanga apondola okunyona, ine okuvatela ovanthu ovakuankhali. Moluotyo, oe utuavela elondolo eli liakolela: ‘Una weenda no vonondunge, nae makala omunandunge, mahi una ulinga oupanga nomalai makala tyihena onondunge.’ (Provérbios 13:20; 1 Coríntios 15:33) Nawike puonthue uhanda okukala ‘tyihena onondunge.’ Kese umue uhanda ‘okukala omunandunge.’ Jeova, nawike upondola okumuyawisa onondunge mbupona ombu enale, tupu na umue upondola okumunyona. Mahi, utuavela ongeleka ongwa konthele yokuholovona omapanga. Soka nkhele, ovalie Jeova aholovona opo vakale omapanga ae?

12. Omapanga patyi Jeova aholovona?

12 Jeova wapopile a Abraiau okuti “epanga liange.” (Isaías 41:8) Abraiau waava ongeleka ongwa unene yekolelo, nouviuki, nokutavela—ankho omulume wekolelo. (Tiago 2:21-23) Jeova uholovona ovanthu ngovo opo vakale omapanga ae. Tupu, Jeova uholovona ovanthu ngovo hono. Inkha Jeova aholovona omapanga ngoo, katyaviukile nonthue tuholovone nawa omapanga etu? Okueenda novanandunge opo nonthue tukale ovanandunge?

13. Oityi matyituvatela okuholovona nawa omapanga?

13 Oityi matyikuvatela okuholovona nawa omapanga? Okulilongesa onongeleka onongwa Mombimbiliya matyikukuatesako. Tala oupanga wali na Rute na inaivi Noemi, noupanga wa David na Jonatan, ine oupanga wa Timoteo na Paulu. (Rute 1:16, 17; 1 Samuel 23:16-18; Filipenses 2:19-22) Ankho oupanga wavo wapama unene mokonda yehunga limue liakolela: Aveho ankho vena ohole yotyotyili na Jeova. Okuti upondola okuvasa omapanga ehole unene Jeova ngove? Kala nonthumbi yokuti upondola okuvasa omapanga omanyingi ngoo mewaneno lio Vakristau. Omapanga oo, kaekuhongiliya okulinga natyike tyinumanesa Jeova. Anthi, maekuvatela okutavela ku Jeova, opo upameke oupanga wove nae, nokukula mopamphepo. (Tanga Gálatas 6:7, 8.) Omapanga oo, maekuvatela okutualako okukala mohole ya Huku.

Humba Vana Vekahi Komutwe

14. Omokonda yatyi okuhumba vokuli koutumini pamue tyitupuiya?

14 Onkhalelo yavali yokulekesa ohole tuna na Jeova, yakutikinya etumino. Tuna okuhumba vana vekahi komutwe. Omokonda yatyi pamue, otyo tyitupuiya? Omokonda ovanthu vekahi koutumini ovakuankhali. Tupu, nonthue tuvakuankhali. Tukahi nokulwa notyituwa tuatyitwa natyo, tyokuhetavela okutuminwa.

15, 16. (a) Okuhumba vana Jeova aavela otyilinga tyokuyunga nawa ovanthu vae, tyakolela mokonda yatyi? (b) Onkhalelo Jeova atalele ova Isilayeli etyi vatyitukilapo Moisesi, tyitulongesa tyi?

15 Ove hamue upondola okulipula okuti: ‘Inkha tyipuiya unene okuhumba ovatumini, tuesukisa okuvetavela mokonda yati?’ Ekumbululo livasiwa motyitateka tyakatulwa konyima konthele youtumini wa Huku. Olie moholovona akale ohamba yove, omutumini wove? Inkha tuholovona Jeova akale Omutumini wetu, tuesukisa okuhumba etumino liae. Inkha tutupu onthilo nao, tupondola okupopia nonthumbi okuti oe Ohamba yetu? Tupu, Jeova ututumina mokutuavela ononkhalamutwe ovanthu ovakuankhali, vana aavela otyilinga tyokutekula ovanthu vae. Inkha katutavela kovanthu ovo, Jeova metutale ñgeni?—Tanga 1 Tessalonicenses 5:12, 13.

16 Tala etyi ova Isilayeli vahimbika okuñgoñga, nokutyitukilapo Moisesi, Jeova wetyitalele ngatyina oe vatyitukilapo. (Números 14:26, 27) Iya Huku kapilulukile. Inkha katutavela ku vana apaka komutwe wetu, tukahi nokuanya ku Huku!

17. Otyituwa patyi tyaviuka tuna okukala natyo konthele ya vana vekahi komutwe mewaneno?

17 Apostolu Paulu walekesa otyituwa tyaviuka tuna okukala natyo konthele ya vana vokuna otyilinga mewaneno lio Vakristau. Oe wahoneka okuti: ‘Tavelei ku vana vekahi komutwe pokati kenyi, nokulinga etyi vemutuma. Mokonda vekahi nokuyunga omienyo vienyi, ngatyina mavakapulwa. Opo valinge ovilinga ovio nehambu tyihakeme, mokonda inkha vakema matyimunyono.’ (Hebreus 13:17) Tyotyili, tuna okulinga ononkhono ononene opo tukale notyituwa tyokutavela nokuhumba. Hinangela okuti tukahi nokulinga ononkhono opo tutualeko okukala mohole ya Huku. Okuti otyo, katyatokalele okulinga ononkhono mbetu ambuho?

Tualako Tyasukuka Komaiho a Jeova

18. Mokonda yatyi Jeova ahandela tutualeko tyasukuka?

18 Onkhalelo yatatu yokulekesa ohole tuna na Jeova, okulinga ononkhono opo tutualeko tyasukuka komaiho a Huku. Ovohe apeho valinga ononkhono opo ovana vavo vakale tyasukuka. Omokonda yatyi? Omokonda okukala tyasukuka tyakolela pala ekongoko liomona. Tupu, tyina omona asukuka tyipandesa ombunga, okulekesa okuti ovohe vena oluembia nomona wavo nokumuyunga nawa. Na Jeova uhanda tukale tyasukuka mokonda yomahunga ngoo. Jeova utyii okuti okukala tyasukuka tyakolela unene pala ouwa wetu. Tupu, utyii okuti inkha tukala tyasukuka oe Tate yetu keulu, mahivilikwa. Otyo tyakolela unene, tyetyi tyipondola okuhindila ovanthu okuhanda okuumbila Huku. Mokonda vatala okuti onthue tuelikalela novanthu vomouye uno wasila.

19. Oñgeni tuetyinoñgonoka okuti okusukuka molutu tyakolela unene?

19 Omononkhalelo patyi tuesukisa okutualako okukala tyasukuka? Tuna okutualako tyasukuka mononkhalelo ambuho mbomuenyo wetu. Mo Isilayeli kohale, Jeova walekesile nawa okuti tyakolela ovanthu vae vatualeko tyasukuka molutu. (Levítico 15:31) Ovitumino Jeova aavelele Moisesi, vipopia okuti ankho vena okuyumbahi ovipuka viasila, nokusukula onombiya, nomaoko, no nomphai, novikutu viavo. (Êxodo 30:17-21; Levítico 11:32; Números 19:17-20; Deuteronômio 23:13, 14) Ova Isilayeli ankho vahinangeleswa okuti Huku yavo Jeova, osandu, tyilekesa okuti “omusukuki,” “wayela,” “nokukola.” Novaumbili va Huku omusukuki, vesukisa okukala ovasukuki.—Tanga Levítico 11:44, 45.

20. Omononkhalelo patyi tuesukisa okutualako tyasukuka?

20 Tuesukisa okukala tyasukuka, mokati, no kondye. Tulinga ononkhono mbokutualako okukala nomalusoke asukuka. Tuendela nekolelo movitumino via Jeova konthele yovituwa viasukuka, namphila tukahi mouye weyula ovituwa viasila viomaumbalehi. Tyakolela vali unene, tutualako nefendelo lietu liasukuka, okulityilika okusiliswa no nongeleya mbomatutu. Tuhinangela apeho elondolo liahonekwa mu Isaías 52:11, liati: “Tundeimo, tundeimo, muhakuatei kotyipuka natyike tyasila. Tundei pokati kavo, tualeiko tyasukuka.” Hono, tutualako tyasukuka mopamphepo, mokulityilika kovipuka viaama konongeleya mbomatutu, viasila komaiho a Tate yetu keulu. Etyi, otyo, tulityilikila ovipito vionongeleya mbomatutu ovanthu vouye vehole unene hono. Tyotyili, okutualako tyasukuka katyapepukile. Mahi, ovanthu va Jeova valinga ononkhono, mbokukala ngotyo, mokonda tyivevatela okutualako okukula mohole ya Huku.

21. Oñgeni matulekesa okuti matutualako okukala mohole ya Huku?

21 Jeova uhanda tutualeko okukala mohole yae apeho. Anthi, kese umue puonthue, wesukisa okulekesa okuti ulinga ononkhono mbokutualako mohole ya Huku. Tupondola okulinga ngotyo, mokuhetekela Jesus, okutavela ovitumino via Jeova, opo tulekese okuti tyili tumuhole. Inkha tulinga ngotyo, tupondola okukala nonthumbi yokuti natyike “matyituyapula mohole ya Huku, ikahi mu Kristu Jesus, Tatekulu yetu.”—Romanos 8:38, 39.

Okuti Ove Utyihinangela?

• Oñgeni omutima wetu mautuvatela okutualako okukala mohole ya Huku?

• Omokonda yatyi tuesukisila okukala nohole na vana Jeova ehole?

• Omokonda yatyi tyakolela okuhumba vana vekahi komutwe?

• Omokonda yatyi okukala tyasukuka kovanthu va Huku tyakolela?

Omukanda Mautukuatesako Okukala Novituwa Oviwa

Mokueenda kuo tyonge tyononthiki ononthatu tyo 2008/2009 kuawa omukanda una omafo 224, nosapi yati: “Mantenha-se no Amor de Deus.” Omukanda oo opala tyi? O pala okukuatesako Ovakristau okunoñgonoka nokukala nohole novitumino via Jeova, haunene upopia vali konthele yovituwa vio Vakristau. Okulilongesa nawa omukanda “Mantenha-se no Amor de Deus,” matyipameka onthumbi eyetu yokuti okutualako okuendela movitumino via Jeova otyipuka tyaviuka tuna okulinga hono, iya tyituala komuenyo wahapu.

Omukanda ou wapongiyua pala okutukuatesako okutala okuti okutavela ovitumino via Jeova hamulemo. Tupu, onkhalelo imue yokulekesa okuti tuhole unene Jeova. Moluotyo, omukanda ou mautuavela ondundo yokulipula okuti: Omokonda yatyi ndyitavelela ku Jeova?

Putyina ovanthu vayapuka mohole ya Jeova, otyitateka tyikahi kovituwa viavo, katyikahi komalongeso. Moluotyo, tuesukisa okupameka ohole yetu, nolupandu luetu kovitumino via Jeova no nondonga mbutuhongolela momuenyo wetu kese nthiki! Onthue tuna onthumbi yokuti omukanda ou omupe maukuatesako onongi mba Jeova mouye auho okutualako nokulinga etyi tyaviuka, nokulekesa okuti Satanasi onkhembi, haunene atutualako okuendela mohole ya Huku! —Judas 21.

[Ehangununo liolutalatu pefo 28]

‘MANTENHA-SE NO AMOR DE DEUS’

    Nyaneka Publications (1998-2026)
    Lupukamo
    Nyingila
    • Nyaneka
    • Tuma
    • Likoyela
    • Copyright © 2025 Watch Tower Bible and Tract Society of Pennsylvania
    • Etyi Tyilingwa Pokunyingilamo
    • Etyi Munyingilwa
    • Etyi Tyilingwa Pokunyingilamo
    • JW.ORG
    • Nyingila
    Okutuma