Otyili Tyipondola Okupilulula Omuenyo Wove
OVE hamwe uhole okuiva ine okulongeswa omaunkhembi konthele ya Huku aholololwa mononthele ombu. Nongotyo, nkhele upondola okuanya okupilulula omatavelo ove, haunene inkha walongesua omututu oo omuwo omunyingi.
Okuyekapo omatavelo tyotyili katyapepukile. Ovikapela vimwe kaviavela ovanthu ondundo yokueleka omalongeso avo netyi Ombimbiliya ipopia. Ovikuavo viamena omatutu mokupopia okuti Ombimbiliya yepuilisa, kainoñgonokwa vala na kese munthu. Ovalongwa va Jesus ankho kavalongesilwe monosikola ononene, mahi ankho vanoñgonoka nawa etyi Jesus alongesa.—Atos 4:13.
Tupu hamwe upondola okulityilika okutala inkha etyi utavela otyili, nowoma wokuti otyo matyilekesa okuti utupu ekolelo. Mahi, okuti Huku manumana inkha utala Mondaka yae Ombimbiliya, opo unoñgonoke vali nawa etyi ahanda kuove? Anthi, Ondaka yae ikuavela ondundo opo ove muene utale etyi Ovihonekwa vipopia. Yati: “Talei onwe muene okuti ehando lia Huku eewa liafuapo nokuaviuka.”—Romanos 12:2.
Okulilongesa otyili konthele ya Huku, hatyiwa vala mokonda ulilongesa otyipuka otyipe, anthi, omokonda matyikalesa vali nawa omuenyo wove. (João 8:32) Deanne, wapopiua monthele yotete, pahe ukahi nokupameka ekolelo liae Mondaka ya Huku. Oe wati: “Etyi nehenehimbike okulilongesa Ombimbiliya, ankho hityii okuti Ovihonekwa viayandyuluka nawa. Pahe ndyityii okuti Jeova ha Huku vala uhamonwa, mahi, o Tate yange woluembia wokeulu. Navasa ehambu liotyotyili momuenyo.”
Hamwe welilongesiliale Ombimbiliya otale okuti katyekukuatesileko. Inkha ongotyo, uhasoye. Okuovola okunoñgonoka Ombimbiliya tyina ukahi nokulongeswa omatutu konthele ya Huku, tyelifwa nokuenda kotyilongo tyimwe uhei, mahi okuate mondyila yahaviukile. Ngotyo, inkha uhanda okukehika una okuovola ondyila yaviuka maikuhikiya kotyilongo otyo.
Ove uhanda okulilongesa otyili konthele ya Huku? Tukukonga upopie no Nombangi mba Jeova potyilongo tyove ine okuhonekela kovilongo pomanyina ekahi pefo 4 momukanda ou, opo ulongeswe Ombimbiliya peumbo liove otyali.
[Onondaka Mbavilapo pefo 9]
“Talei onwe muene okuti ehando lia Huku eewa liafuapo nokuaviuka.”—ROMANOS 12:2