Kuatesako Ovanthu “Okupahuka Kolumphoki”
“Omuvo muwii. Mutyii nawa okuti o ola yehikapo yokupahuka kolumphoki.” —ROMANOS 13:11.
OKUTI UPONDOLA OKUHANGUNUNA?
․․․․․
Omokonda yatyi tyakolela Ovakristau vakale tyipahi mopaspilitu?
․․․․․
Omokonda yatyi ovaivisi vekahi tyipahi vesukisa okutehelela nokutala nawa?
․․․․․
Oñgeni oluembia nokupopia monkhalelo yahiliya tyitukuatesako movilinga vietu viokuivisa?
1, 2. Omonkhalelo patyi ovanthu vesukisa okupahuka?
OMANIMA aeho, ovanthu ovanyingi vankhia mokonda yolumphoki ine okutaha omatuku-tuku tyaliwa nolumphoki. Ovakuavo vatewa movilinga mokonda valalelelwa avahaende kovilinga ine valala tyina vekahi kovilinga. Mahi, okulala mopaspilitu tyieta ovitateka ovinene vali. Otyo Ombimbiliya ipopila okuti: “Una ehambu oyouna ukala tyipahi.”—Revelação 16:14-16.
2 Tyina onthiki onene ya Jeova ikahi nokuhikapo, ovanthu ovanyingi velele mopaspilitu. Alo umwe ononkhalamutwe mbumwe Mbovakristau vomouye, vapopia ovanthu vavo okuti vekahi ‘kolumphoki olunene.’ Okulala mopaspilitu oityi? Omokonda yatyi tyakolela Ovakristau votyotyili vakale tyipahi? Oñgeni matukuatesako vakuetu okupahuka kolumphoki olo?
OKULALA MOPASPILITU OITYI?
3. Omunthu ulele mopaspilitu ukahi ñgeni?
3 Omunthu ulele kalingi natyike. Namphila vana velele mopaspilitu valinga ovipuka ovanyingi, anthi kavalingi ovipuka viopaspilitu. Vasukalala unene novilinga via kese nthiki ine okuovola omalialia, nomunkhima ine omalumono. Moluotyo, kavasukile unene novipuka viopaspilitu. Mahi vana vepahi mopaspilitu, vaimbuka okuti tukahi “mononthiki mbahulililako,” ngotyo vatualako nokulinga ehando lia Huku nombili.—2 Pedro 3:3, 4; Lucas 21:34-36.
4. Omokonda yatyi elondolo liati “tuhapoilei ngetyi ounyingi ukahi nokulinga,” liakolela?
4 Tanga 1 Tessalonicenses 5:4-8. Apa apostolu Paulu walondola ovakuatate vae opo “vahapoile ngetyi ounyingi ukahi nokulinga.” Otyo tyilekesa tyi? Onkhalelo imwe tupondola “okupoila” okutomba ovitumino via Jeova. Onkhalelo onkhuavo tupondola “okupoila” okutomba otyili tyokuti onthiki ya Jeova yokuhanyako ouye uno wovivi ikahi popepi. Tulungukei opo ovanthu onondingavivi vehetuhongiliye okulandula onondyila mbavo novituwa.
5. Vokulele mopaspilitu vena omalusoke patyi?
5 Vamwe vasoka okuti kutupu Huku mekevekoyesa. (Salmo 53:1) Ovakuavo vasoka okuti Huku kesukile nonthue, moluotyo tutupu ehunga liokusuka nae. Nkhele ovakuavo, vasoka okuti okuenda vala kongeleya matyivekalesa omapanga a Huku. Ovanthu ovo aveho velele mopaspilitu. Vesukisa okupahuka. Oñgeni matuvekuatesako?
TUESUKISA OKUKALA TYIPAHI
6. Oityi Ovakristau vesukisila okulinga ononkhono mbokukala tyipahi mopaspilitu?
6 Opo tutyivile okupahulapo vakuetu, tete onthue tuna okukala tyipahi. Otyo tyakutikinya tyi? Ondaka ya Huku yeeleka olumphoki “novilinga vienthiki”—ovipito vihaviukile, nounkholwa, noundalelapo, novituwa vihena otyitumino, novilwa, nonkhi. (Tanga Romanos 13:11-14.) Okulityilika ovituwa ovio, tyipondola okutupuiya. Tyakolela okulunguka. Omusingi wetuku-tuku utomba olumphoki, apoila tyina asinga, tyipondola okumutuala kononkhia. Ngotyo, tyakolela unene Omukristau aimbuke okuti okulala mopaspilitu tyipondola okuipaa!
7. Oñgeni okutala ovanthu monkhalelo ihaviukile tyipondola okutukalesa?
7 Mongeleka, Omukristau upondola usoka okuti ovanthu motyilongo aivisa kamavetavela vali onondaka onongwa. (Provérbios 6:10, 11) Upondola okusoka okuti: ‘Inkha nawike metavela, omokonda yatyi ndyituailako okulinga ononkhono mbokuivisa ine okukuatesako ovanthu?’ Tyotyili, ovanyingi velele mopaspilitu hono, mahi onkhalelo yavo yomuenyo novituwa viavo vipondola okupiluluka. Vamwe mavapahukapo avetavela. Iya matuvekuatesako inkha tukala tyipahi, nokuovola ononkhalelo onomphe mambukuatesako ovanthu okutavela onondaka Mbouhamba. Opo tutualeko tyipahi tuesukisa okunoñgonoka omokonda yatyi ovilinga vietu viokuivisa viakolela.
OVILINGA VIETU VIOKUIVISA VIAKOLELA MOKONDA YATYI?
8. Omokonda yatyi ovilinga vietu viokuivisa viakolela?
8 Hinangela okuti tyilinge ovanthu vetavela ine kavetavela, ovilinga vietu viokuivisa vinkhimaneka Jeova, nokuakolela opo afuisepo evangelo liae. Apa katutu vana vehetavela onondaka onongwa mavakoyeswa. Mavakakoyeswa okutalela kuetyi vakumbulula onondaka tuivisa. (2 Tessalonicenses 1:8, 9) Tupu, katyaviukile Omukristau okusoka okuti katyesukisile okulinga ononkhono mbokuivisa mokonda “makukakala etutilo liovaviuki na vana vehevaviuki.” (Atos 24:15) Ondaka ya Huku itulongesa okuti vana vekahi “ngovinkhombo” mavakakoyeswa “avakaya kononkhia mbahapu.” Ovilinga vietu viokuivisa vilekesa okankhenda ka Huku, nokuikula ondyila opo ovanthu vapilulule omuenyo wavo, avakamona “omuenyo uhapu.” (Mateus 25:32, 41, 46; Romanos 10:13-15) Inkha katuivisa, oñgeni ovanthu mavatehelela onondaka mbutuala komuenyo?
9. Oñgeni okuivisa onondaka onongwa tyietela ove ouwa navakuenyi?
9 Okuivisa onondaka onongwa tupu tyituetela ouwa. (Tanga 1 Timóteo 4:16.) Kunemone okuti okupopia konthele ya Jeova nekevelelo lio Uhamba tyipameka ekolelo liove, nohole una na Huku? Katyikukuatesako okukala novituwa Vioukristau? Okuundapa movilinga viokuivisa, katyilekesa ombili yove ku Huku, nokukuetela ehambu? Ovanyingi vena elao liokulongesa vakuavo otyili, vena ehambu liokutala tyina ospilitu ya Huku ikuatesako ovanthu ovo okupilulula onkhalelo yavo yomuenyo.
TALA NAWA
10, 11. (a) Oñgeni Jesus na Paulu valekesile okuti vepahi, nokutala nawa? (b) Hangununa oñgeni okukala tyipahi nokutala nawa tyitukuatesako okuivisa vali nawa.
10 Ovanthu vapondola okusuka no nondaka onongwa mononkhalelo mbelikalela. Moluotyo, ovaivisi Ovakristau vesukisa okutala nawa. Ongeleka yetu o Jesus. Mokonda ankho utupu onkhali, wetyivila okunoñgonoka etyi ankho omu Faliseu asoka, nomukai ankho ulinga ovivi welivela tyotyili, nomutima omuwa womuhepe. (Lucas 7:37-50; 21:1-4) Jesus ankho upondola okukuatesako kese munthu mopaspilitu. Mahi, omuumbili wa Huku kesukisile okukala nga Jesus opo atale nawa. Apostolu Paulu wetyilekesa nawa. Oe ankho upilulula onkhalelo yae yokupopia opo akuateseko ovanthu ovanyingi vena ovituwa vielikalela.—Atos 17:22, 23, 34; 1 Coríntios 9:19-23.
11 Inkha tulinga ononkhono mbokukala tyipahi, nokutala nawa nga Jesus na Paulu, matunoñgonoka oñgeni tupondola okupahulapo vana tupopia navo. Mongeleka, putyina ufuena povanthu, tala ovipuka vilekesa ontheto yavo, nomasuka, ine onkhalelo yombunga. Hamwe upondola okutala etyi vekahi nokulinga, opopi konthele yotyo pokuhimbika etompho.
12. Tyina tukahi movilinga viokuivisa, omokonda yatyi tuna okuyunga nawa etompho lietu?
12 Omunthu upahi ulityilika ovipuka vitalula. Tyina tukahi movilinga viokuivisa, okutomphola na una tuundapa nae tyipondola okutupameka. Mahi, tuhanda okuhinangela okuti tukahi movilinga viokuivisa pala okupopia novanthu. (Eclesiastes 3:1, 7) Ngotyo, tuesukisa okuliyunga opo etompho lietu lihatalule ovilinga vietu. Okupopia konthele yetyi matupopi novanthu tyitukuatesako okusoka vala kovilinga vietu viokuivisa. Tupu, namphila otelefone ipondola okutukuatesako movilinga viokuivisa, tuna okutala nawa opo ihetuyapule ketompho lietu na vana tuivisa.
SUKA NA KESE MUNTHU
13, 14. (a) Oñgeni tupondola okuimbuka etyi omunthu esuka vali natyo? (b) Oityi tyipondola okupahulapo ovanthu opo vesuke novipuka viopaspilitu?
13 Ovaivisi vepahi nokualunguka, vatehelela nawa vana vavasa. Omapulo patyi upondola okulinga una uvasa movilinga viokuivisa opo apopie etyi asoka? Okuti oe wasukalala nonongeleya mbukahi nokuliyawisa, noungangala potyilongo, ine ovatumini vahatumina nawa? Okuti upondola okumupahulapo mopaspilitu mokupopia konthele yovipuka oviwa Huku atunga ine okulekesa oñgeni onondonga Mbombimbiliya mbukuatesako? Ovanthu vomihoko aviho vasuka nelikuambelo alo umwe vana vehetavela okuti kuna Huku. Vamwe velipula inkha kuna umwe una utehelela omalikuambelo. Ovakuavo vasukalala nomapulo aa: Okuti Huku utehelela omalikuambelo aeho? Inkha katehelela, oityi tuesukisa okulinga opo etutehelele?
14 Tupondola okulilongesa okuhimbika okutomphola vali nawa novanthu mokutala oñgeni ovaivisi ovanongo vetyilinga. Tala oñgeni valinga omapulo aviuka ine okuhapulu viamuene. Oñgeni ondaka yavo notyipala vilekesa okuti vesuka netyi tyipopia una vaivisa?—Provérbios 15:13.
OLUEMBIA NOUNONGO
15. Omokonda yatyi tuna okuivisa noluembia?
15 Okuti ove uhanda okupahuluapo tyina ulele? Vamwe kavetyihole tyina vatumphululwa kolumphoki. Vahanda okupahuluapo tyahiliya. Pamwe otyo tyelifwa natyina tulinga ononkhono mbokupahulapo ovanthu kolumphoki luopamphepo. Inkha umwe unumana tyina umutalelapo, oñgeni momukumbulula nawa? Tehelela nawa etyi apopia, omupandula, otundupo tyahiliya. (Provérbios 15:1; 17:14; 2 Timóteo 2:24) Otyituwa tyove otyiwa tyipondola okuakuatesako omunthu oo, okutehelela tyina amatalelwapo vali Nombangi ya Jeova.
16, 17. Oñgeni tupondola okukala nounongo movilinga vietu viokuivisa?
16 Tupu, upondola okukuatesako vana vahakumbulula nawa. Omunthu umwe upondola okupopia okuti: “Au napandula. Ndyinale ongeleya” ine, “ame hihande,” mokonda otyo tyiteta liwa etompho. Mahi, nounongo nokankhenda, upondola okulinga epulo malimukuatesako okusuka novipuka viopaspilitu.—Tanga Colossenses 4:6.
17 Pamwe tyina tuvasa ovanthu vapopia okuti vetupu omuvo wokututehelela mokonda yovilinga ovinyingi, otyiwa okutavela atutundupo. Mahi, pamwe upondola okutala inkha tyitavela okupopia onondaka mbehehi mahi mbakolela. Ovakuatate vamwe vetyivila okuikula Ombimbiliya, nokutanga o testu maikuatesako omunthu okusoka, nokumusila epulo, tyahamane ominutu. Okulinga ngotyo pamwe tyikuatesako omunthu okuimbuka okuti utupu ovilinga ovinyingi iya upondola okutomphola. Oityi uhahetekelela okulinga ngotyo tyina tyitavela?
18. Oityi tuesukisa okulinga opo tuave vali nawa oumbangi tyina tuhekahi movilinga viokuivisa?
18 Tyina tuvasa ovanthu, apeho tupondola okupahulapo esuko liavo nonondaka onongwa inkha tulipongiya opo tuave oumbangi tyina tuhekahi movilinga viokuivisa. Ovakuatate ovanyingi no nomphange vatyinda omikanda movipapo viavo. Tupu, vakoneka otestu ike Yombimbiliya opo vapopie navakuavo inkha vamona omphitilo. Upondola okupopia nomukulu wovilinga mewaneno liove opo ekukuateseko okulipongiya pala okulinga ngotyo.
OKUPAHULAPO ONOMBUNGA MBETU NOLUEMBIA
19. Oityi tutuailako okulinga ononkhono mbokukuatesako onombunga mbetu?
19 Tyotyili tuhanda okukuatesako onombunga mbetu okutavela onondaka onongwa. (Josué 2:13; Atos 10:24, 48; 16:31, 32) Inkha otyikando tyotete tuapopia navo vetukumbulula omapita, otyo tyipondola okutusoyesa. Tupondola okusoka okuti petupu vali natyike tupondola okulinga ine okupopia opo tupilulule olusoke luavo. Mahi, momuenyo wavo mupondola okupita ovipuka vimwe vipilulula olusoke luavo. Ine hamwe utyivila okuhangununa vali nawa otyili, iya pahe vapondola okukutehelela.
20. Omokonda yatyi ounongo wakolela tyina tupopila otyili ombunga yetu?
20 Tuesukisa okulityilika okuhasuku nombunga yetu. (Romanos 2:4) Oityi tuhapopila navo noluembia ngetyi tupopia na vana tuvasa movilinga viokuivisa? Popia nepoleyo nehumbilo. Wahapopie vala onondaka ononyingi, anthi hangununa oñgeni otyili tyekukuatesako. (Efésios 4:23, 24) Vehangununina oñgeni Jeova ekuavela ovipuka ovinyingi oviwa, “nokukulongesa etyi tyakolela.” (Isaías 48:17) Yeka ombunga yove italele muove ouwa wokukala Omukristau.
21, 22. Popia ongeleka ilekesa okuti tyakolela okutualako okulinga ononkhono opo tukuateseko onombunga mbetu mopaspilitu.
21 Omphange umwe wahoneka okuti: “Apeho ankho ndyiovola okuava oumbangi konondenge mbange nonomphange 13, mokukala novituwa oviwa, nomupopio omuwa. Omanima aeho ndyihonekela kese umwe. Mahi, mokueenda kuomanima 30, ame vala Ombangi mombunga.”
22 Omphange watualako okuti: “Nthiki imwe, natelefonalela omukulu wange ukala kokule. Oe antholela okuti waita komuivisi umwe emulongese Ombimbiliya, mahi eheya. Etyi napopia okuti ndyihanda okumukuatesako, oe wati: ‘Tyitavela, mahi ndyikupopila okuti: Nalumwe mandyikala Ombangi ya Jeova.’ Etyi nemutumikisa omukanda Oityi Ombimbiliya Tyili Ilongesa?, ankho ndyimutelefonalela ononthiki mbumwe. Mahi ankho nkhele keneutange. Okuhulako, andyimuiti ekeupole, iya atutange nokutomphola kotelefone mono minutu 15 konthele yo notestu mbukahimo. Konyima yokupopia ononthiki mbumwe, oe ankho uhanda vali okulilongesa unene tyipona vala onominutu 15. Iya anthelefonalela opo elilongese, pamwe utyilinga kombimba tyina nkhele ndyilele, iya pamwe ovikando vivali monthiki. Menima lialandulako, ambatisalwa, iya menima ekuavo, ahimbika ovilinga vioukokoli-ndyila.”
23. Oityi tutuailako okulinga ononkhono mbokupahula ovanthu kolumphoki luopaspilitu?
23 Okukakuatesako ovanthu okupahuka kolumphoki luopaspilitu, tyesukisa ounongo nononkhono. Ovanthu ovatendi nkhele vekahi nokutavela otyili. Kese hanyi kumbatisalwa ovanthu valamba po 20.000, avakala Onombangi mba Jeova. Moluotyo, tulandulei elondolo Paulu apele omukuatate Arkipu kotyita tyotete, liati: ‘Tualako okutala nawa ovilinga viokuivisa wetavela ku Tatekulu, opo uvifuisepo.’ (Colossenses 4:17) Onthele ilandulako maikuatesako aveho okunoñgonoka oityi tyihangununa okuivisa nondyanga.
[Okakasa pefo 13]
OÑGENI UPONDOLA OKUTUALAKO TYIPAHI
▪ Sukalala nokulinga ehando lia Huku
▪ Lityilika ovilinga vienthiki
▪ Lunguka opo uhapoile mopaspilitu
▪ Tala nolusoke luaviuka ovanthu potyilongo tyove
▪ Lilongesa ononkhalelo onomphe mbokulongesa vakuenyi
▪ Hinangela okuti ovilinga viove viokuivisa viakolela