Lilongesa Ondaka ya Huku
Oñgeni Onoandyu Novilulu Vitukalesa?
Onthele ei ipopia omapulo hamwe ove wasukalala nao, nokulekesa opi upondola okuvasa omakumbululo Mombimbiliya yove. Onombangi mba Jeova vena ehambu liokutomphola nove omakumbululo oo.
1. Onoandyu Ovalie?
Onoandyu ovanthu vopaspilitu vakala keulu. Onkhalelo yavo yomuenyo yavilapo tyipona yovanthu. Huku yotyotyili, nae ospilitu, watunga onoandyu etyi nkhele ehenelinge oohi. (Jó 38:4, 7; Mateus 18:10) Jeova ukala no noandyu ononyingi-nyingi ovakuatyili.—Tanga Salmo 103:20, 21; Daniel 7:9, 10.
2. Okuti onoandyu mbukuatesako ovanthu?
Onoandyu mbakuatesileko Lote omulume omuviuki. Oe ankho ukala mepundaumbo Huku ankho ahanda okuhanyaunako mokonda yovivi ankho vilingwa novanthu vakalamo. Onoandyu onombali mbalondolele Lote nombunga yae vende nkholo. Ovanthu vamwe vatalele elondolo olio ngokunyana, avehetavela. Mahi, Lote novana vae vahupile mokonda vetavelele elondolo lia Huku liapopiwa no noandyu.—Tanga Gênesis 19:1, 13-17, 26.
Ngetyi tyilekesa Ombimbiliya, onoandyu mbukahi nokukuatesako ovanthu mokuhongolela ovilinga via vana vaivisa nekolelo onondaka onongwa Mbouhamba wa Huku. (Mateus 24:14) Monondaka onongwa muakutikinya elondolo. Ngelondolo liapelwe Lote, otyo hakunyana. Mbatunda ku Huku watuma onoandyu.—Tanga Revelação 1:1; 14:6, 7.
Huku utuma onoandyu opo mbutupameke tyina tuvasiwa novitateka. Huku watumine oandyu opo ipameke Jesus.—Tanga Lucas 22:41-43.
Apa katutu Huku matumu onoandyu opo mbuhanyeko ovanthu onondingavivi vamonesa vakuavo ononkhumbi. Otyo matyietela ombembwa ovanthu.—Tanga 2 Tessalonicenses 1:6-8.
3. Oñgeni ovilulu vitukalesa?
Ngetyi ovanthu ovanyingi mouye vehetavela ku Huku, tupu no keulu onoandyu ononyingi mbatyitukililepo Huku. (2 Pedro 2:4) Onoandyu mbuhetavela ku Huku mbutiwa ovilulu. Ukahi komutwe o Satanasi, Eliapu. Satanasi novilulu viae vekahi nokuyondya ovanthu.—Tanga Revelação 12:9.
Satanasi uundapesa ovitanda vihaviukile, novatumini, nonongeleya mbomatutu opo vahongiliye ovanthu, nokuveyapula ku Huku. Moluotyo, onya, noungangala, nononkhumbi mbovanthu, vikahiko mokonda ya Satanasi.—Tanga 1 João 5:19.
4. Oñgeni ovilulu viyondya ovanthu?
Satanasi ukahi nokuyondya ovanthu ovanyingi mokuvelongesa okuti vokuankhia vakala ovanthu vopamphepo vapondola okupopia na vana vena omuenyo. Mahi Ombimbiliya ipopia okuti vokuankhia kavei natyike. (Eclesiastes 9:5) Mahi ovilulu viyondya ovanthu mokuhetekela ondaka yo vokuankhia. (Isaías 8:19) Tupu, ovilulu viyondya ovanthu mokuundapesa ovimbanda, novitapi no vonombale. Ondaka ya Huku itulondola opo tulityilike ovipuka ovio aviho. Ngotyo tuna okulipola kese tyimwe ankho tuna tyelikuata novilulu nomaumbanda.—Tanga Deuteronômio 18:10, 11; Atos 19:19.
Inkha tuhole Jeova, katuesukisile okukala nowoma novilulu. Tyina tulilongesa Ondaka ya Huku nokulinga etyi ipopia, matuyale Eliapu nokufuena vali ku Huku. Jeova una vali epondolo tyipona ovilulu. Onoandyu mbae mbekolelo mambutupameka tyina tuamesukisa.—Tanga Salmo 34:7; Tiago 4:7, 8.
[Olutalatu pefo 17]
Opo unoñgonoke vali konthele oyo, tala okapitulu 10 komukanda ou walingua no Nombangi mba Jeova.
[Olutalatu pefo 17]
Oityi Ombimbiliya Tyili Ilongesa?