Omokonda Yatyi Tulingila Ondalelo ya Tatekulu

1, 2. Oityi Jesus alingile kongulohi monthiki 14 ya Nisã yo 33 P.K.? (Tala olutalatu pefo pahimbikila onthele.)

ANKHO o kounthiki mo Jelusalei, 14 yohanyi ya Nisã yo 33 P.K., iya ankho ohanyi yaoya. Jesus nono apostolu mbae ankho valinga otyipito Tyopasikwa tyihinangelesa ovanthu onkhalelo Jeova ayovolele ova Isilayeli ko Egitu omanima 1.500 konyima. Jesus ankho ukahi nokulia ondalelo nono apostolu mbae 11 vekolelo, iya ovalanduli vae ankho vena okulia ondalelo oyo omanima aeho pala okuhinangela ononkhia mbae.—Mateus 26:1, 2.

² Jesus elikuambela, aavela ono apostolu mbae ombolo yehena onkhiso, ati: “Tambulei liei.” Iya apolo okopo yovinyu elikuambela vali, ati: “Nueiko amuho.” (Mateus 26:26, 27) Ombolo novinyu ankho viakolela unene. Motyinthiki otyo tyakolela, ono apostolu mbekolelo mba Jesus velilongesile ovipuka ovinyingi.

3. Omapulo patyi matukumbulula monthele ei?

³ Jesus ankho uhanda ovalongwa vae valinge Ehinangelo liononkhia mbae omanima aeho, tupu liihanwa okuti “Ondalelo ya Tatekulu.” (1 Coríntios 11:20) Otyo tyieta omapulo amwe. Omokonda yatyi tuesukisila okuhinangela ononkhia mba Jesus? Ovinyu nombolo vilekesa tyi? Oñgeni tupondola okulipongiya ine okulifuiika pala Ehinangelo? Ovalie vena okulia kombolo nokunwa kovinyu? Iya oñgeni Ovakristau valekesa okuti vapanda ekevelelo liavo?

OMOKONDA YATYI TUHINANGELELA ONONKHIA MBA JESUS

4. Ononkhia mba Jesus mbetuikulila tyi?

⁴ Onthue tuapiñgana onkhali, nononkhia ku Andau. (Romanos 5:12) Petupu omunthu nawike omukuankhali upondola okuavela Huku ofeto yeyovo pala okuliyovola, ine okuyovola vakuavo. (Salmo 49:6-9) Mahi, Jesus waava omuenyo wae uhena onkhali opo etuyovole, iya akapakula ku Huku ofeto oyo yeyovo. Ngotyo, Jesus wetuikulila ondyila opo tukale nekevelelo liokukalako apeho, tyayovoka konkhali, no kononkhia.—Romanos 6:23; 1 Coríntios 15:21, 22.

5. (a) Oñgeni tutyii okuti Huku na Jesus vetuhole? (b) Omokonda yatyi tuesukisila okuenda Kehinangelo?

⁵ Huku walekesile okuti uhole ovanthu etyi aonganeka ofeto yeyovo. (João 3:16) Jesus tupu walekesile ohole yae etyi aava omuenyo wae opo etuyovole. Alo umwe etyi Jesus nkhele eheneye pano pohi, “ovipuka ankho ehole vali, vikahi novana vovanthu.” (Provérbios 8:30, 31) Tupandula unene etyi Jeova na Jesus vetulingila! Tyina tuenda Kehinangelo, tukahi nokutavela otyitumino tya Jesus tyokuati, “tualeiko okutyilinga opo munthyinangele.”—1 Coríntios 11:23-25.

ETYI TYILEKESA OVINYU NOMBOLO

6. Oityi tuanoñgonoka konthele yombolo novinyu Pehinangelo?

⁶ Mokueenda kuonthyulilo yondalelo yae nono apostolu mbae, Jesus kalingile ehuviso pala okupilulula ombolo ikale olutu lwae ine okupilulula ovinyu ikale ohonde yae. Mahi wapopile konthele yombolo okuti: “Etyi tyilekesa olutu luange.” Apopi konthele yovinyu okuti: “Etyi tyilekesa ‘ohonde yange yomphango’ maimomeswa pala ovanthu ovanyingi.” (Marcos 14:22-24) Tyayandyuluka nawa okuti ombolo novinyu, ovilekeso vala.

7. Ombolo yehena onkhiso ilekesa tyi?

⁷ Motyinthiki otyo tyakolela tyo Pasikwa, Jesus nono apostolu mbae valile ombolo yehena onkhiso. (Êxodo 12:8) Pamwe Ombimbiliya ipopia onkhiso pala okulekesa onkhali. (Mateus 16:6, 11, 12; Lucas 12:1) Ombolo yehena onkhiso Jesus aundapesile, ankho ilekesa olutu lwae luhena onkhali. (Hebreus 7:26) Otyo Pehinangelo pakalela ombolo yehena onkhiso.

8. Ovinyu ilekesa tyi?

⁸ Ovinyu Jesus aundapesile ankho ilekesa ohonde yae, ine omuenyo wae, otyo hono Pehinangelo pakalela ovinyu. Jesus wankhila kondye yo Jelusalei, pomphangu itiwa Golgota, iya aave omuenyo wae pala “okuevela ononkhali.” (Mateus 26:28; 27:33) Inkha tupanda otyiawa otyo tyakolela, omanima aeho matulipongiya ine okulifuiika pala onthiki oyo yakolela. Oñgeni tupondola okutyilinga?

ONONKHALELO MBUMWE MBOKULIPONGIYA

9. (a) Omokonda yatyi tuesukisila okutanga ononthele Mbombimbiliya mbupopia konthele Yehinangelo? (b) Ofeto yeyovo ikukalesa ñgeni?

⁹ Onkhalelo imwe yokulipongiya pala Ehinangelo, omokutanga ononthele mbakolela Mbombimbiliya pomuvo Wehinangelo mo Examine as Escrituras Diariamente. Okutanga omahipululo Ombimbiliya, matyitukuatesako okusokolola kuetyi Jesus alingile puetyi nkhele ehenenkhie.a (Tala pokatoi.) Omphange umwe wahoneka okuti: “Tukahi nokukevelela Ehinangelo. Otyo tyitukuatesako okutala okuti oyo onthiki yenima yakolela unene. Ndyihinangela etyi ankho ndyitai mondyuo pomutambo . . . , otyo ndyitala tate yange wanyima ankho ndyihole unene, nokupandula unene ofeto yeyovo. . . . Ankho ndyii onotestu ambuho iya ankho ndyityivila okumbuhangununa! Mahi, etyi neihamenwa mokonda yononkhia, andyihambukwa unene mokonda yetyi matukalingilwa pokati kofeto yeyovo.” Tyina tulipongiya pala Ehinangelo, tyakolela unene okusokolola nawa konthele yoñgeni otyilikutila tya Jesus matyitukuatesako.

10. Oityi vali tupondola okulinga opo tulifuiike pala Ehinangelo?

¹⁰ Onkhalelo onkhuavo tupondola okulifuiika, o mokuundapa vali unene movilinga viokuivisa, okukonga ovanthuovanyingi opo veye Kehinangelo. Tupondola okukala ovakokoli-ndyila vapola pokati. Tyina tutomphola na vakuetu konthele ya Huku, Nomona wae, nekevelelo liomuenyo wahapu, matukala nehambu mokonda tualinga etyi Huku ahanda kuonthue.—Salmo 148:12, 13.

11. Omokonda yatyi Paulu apopila okuti ova Korintu vamwe Pehinangelo ankho valia kombolo nokunwa kovinyu ngwe ankho kavapondola?

¹¹ Tyina ukahi nokulifuiika pala Ehinangelo, sokolola kuetyi Paulu ahonekelele Ovakristau mo Korintu. (Tanga 1 Coríntios 11:27-34.) Wapopile okuti inkha omunthu ulia kombolo nokunwa kovinyu, ngwe ankho kapondola, ine utyilinga tyehena onthilo, ukala nonkhali konthele “yolutu nohonde ya Tatekulu.” Ngotyo inkha omunthu walembulua ulipaka movituwa ovivi, iya akalia kombolo nokunwa kovinyu, ukahi “nokulia, nokunwa etyi matyimuetela ekoyeso.” Pomuvo wa Paulu, ova Korintu ovanyingi ankho vena ovituwa ovivi. Hamwe, vamwe puvo ankho valia nokunwa unene mokueenda Kuehinangelo ine tyina nkhele lihenehimbike, iya avapoila. Ankho vekahi nokulekesa okuti vetupu onthilo nonthiki oyo, moluotyo, tyina ankho valia kombolo nokunwa kovinyu, Huku kahambukwa.

12. (a) Paulu waeleka Ehinangelo natyi? Elondolo patyi aavelele ovalembulwa? (b) Oityi omulembulwa ena okulinga inkha walinga onkhali onene?

¹² Paulu waeleka Ehinangelo nondalelo, alondola vana vokulia kombolo nokunwa kovinyu okuti: “Onwe kamupondola okunwa kokopo ya Jeova no kokopo yovilulu. Onwe kamupondola okulia ‘komesa ya Jeova’ no komesa yovilulu.” (1 Coríntios 10:16-21) Inkha omulembulwa walinga onkhali onene, una okuenda kovakulu vewaneno opo vemukuateseko. (Tanga Tiago 5:14-16.) Inkha ulekesa okuti welivela umwe nomutima auho, tyina alia kombolo nokunwa kovinyu Pehinangelo, kekahi nokulekesa okuti utupu onthilo notyilikutila tya Jesus.—Lucas 3:8.

13. Omokonda yatyi tuesukisila okulikuambela konthele yekevelelo Huku etuavela?

¹³ Tupu tupondola okulifuiika pala Ehinangelo pokulikuambela nokusokolola kekevelelo Huku etuavela. Onthue katuhande okulekesa okuti tutupu onthilo notyilikutila tya Jesus. Moluotyo, katupondola okulia kombolo nokunwa kovinyu inkha tutupu onthumbi yokuti tualembulwa. Naina, ovalie vena okulia kombolo nokunwa kovinyu?

OVALIE VENA OKULIA KOMBOLO NOKUNWA KOVINYU?

14. Mokonda ovalembulwa vekahi momphango omphe, oityi valinga Pehinangelo?

¹⁴ Vokulia kombolo nokunwa kovinyu Pehinangelo, vena umwe okukala nonthumbi yokuti vekahi momphango omphe. Jesus wapopile konthele yovinyu okuti: “Okopo ei ilekesa omphango omphe mokonda yohonde yange.” (1 Coríntios 11:25) Jeova walingile omphango Yovitumino no va Isilayeli, mahi konyima apopi okuti mapingiyapo omphango omphe. (Tanga Jeremias 31:31-34.) Huku walingile omphango oyo omphe novalembulwa. (Gálatas 6:15, 16) Ononkhia mba Jesus mbaikula ondyila opo omphango oyo ifuiswepo. (Lucas 22:20) Jesus Onkhalakati yomphango omphe. Ovalembulwa vekolelo vekahi momphango omphe, mavakakala na Jesus keulu.—Hebreus 8:6; 9:15.

15. Ovalie vekahi momphango Youhamba? Inkha vatualako nekolelo, mavakakala nelao patyi?

¹⁵ Ovalembulwa vetyii okuti tupu vekahi momphango Youhamba. (Tanga Lucas 12:32.) Omphango oyo, yalingwa na Jesus novalanduli vae vekolelo ovalembulwa, vamuene “ononkhumbi mbae.” (Filipenses 3:10) Ovalembulwa vekolelo tupu hono vekahi momphango oyo, mavakatumina kumwe na Kristu keulu apeho. (Revelação 22:5) Ovalembulwa ovo, vapondola okulia kombolo nokunwa kovinyu mokueenda Kuondalelo ya Tatekulu.

16. Popia mo nondaka mbehehi etyi tyihangununa Romanos 8:15-17.

¹⁶ Ovalembulwa vena onthumbi yokuti tyilityili ovana va Huku, iya valia kombolo nokunwa kovinyu. (Tanga Romanos 8:15-17.) Paulu wapopia okuti ovalembulwa vapopia okuti: “Aba, Tate!” Ondaka “Aba,” mo Aramaico ongatyina uti “tate,” mahi monkhalelo imwe ilekesa okuti una onthilo, nohole. Ondaka oyo ilekesa okuti tyina ovalembulwa vapewa “ospilitu yokukala ovana” va Huku, vakala noupanga wakolela na Jeova. Ospilitu ya Huku ‘iveavela oumbangi’ opo vahakale vali nondima yokuti ovana vae valembulwa. Otyo katyilekesa okuti kavahande okukala pano pohi. Vetyii okuti inkha vatualako nekolelo alo kononkhia, mavakakala onohamba keulu na Jesus. Tupu vetyii okuti “valembulwa nomusukuki,” Jeova. Hono, ovana va Huku vo 144.000 nkhele veli pano pohi, kavehi. (1 João 2:20; Revelação 14:1) Ovalembulwa velitehela okuti omapanga omanene a Jeova, otyo vemuihanena okuti: “Aba, Tate!”

PANDA EKEVELELO LIOVE

17. Ovalembulwa vena ekevelelo patyi? Oñgeni vetyii okuti ovalembulwa?

¹⁷ Inkha Umukristau walembulua, momalikuambelo ove, mokutikinyamo apeho ekevelelo liove liokuenda keulu. Iya Ovihonekwa mavikala nehangununo liakolela kuove. Mongeleka, tyina Ombimbiliya ipopia konthele yotyinepo tya Jesus “nondombwa” yae keulu, monoñgonoka okuti otyo tyikahi nokupopia konthele yove, iya motyikevelela nehambu. (João 3:27-29; 2 Coríntios 11:2; Revelação 21:2, 9-14) Ine tyina Ombimbiliya ipopia oluembia Huku ena novalembulwa, monoñgonoka okuti ikahi nokupopila ove. Tyina utanga onondonga Mondaka ya Huku mbupopia vala ovalembulwa, ospilitu sandu maikulundu okumbutavela. Ospilitu sandu ya Huku ‘ikuavela oumbangi’ wokuti ekevelelo liove oliokuenda keulu.

18. “Onongi ononkhuavo” vena ekevelelo patyi? Oñgeni ukala tyina usoka kekevelelo olio?

¹⁸ Inkha ukahi “motyinyingi tyovanthu” “onongi ononkhuavo,” Huku wekuavela omphitilo yokukakala apeho Momphangu Yombembwa pano pohi. (Revelação 7:9; João 10:16) Oñgeni ukala tyina usoka kovipuka oviwa mokamona komutwe? Tyina usokolola kuetyi Ombimbiliya ipopia konthele Yomphangu Yombembwa, uhambukwa. Ukevelela okukalamo nombembwa nombunga yove nomapanga. Uhanda okukamona onthyulilo yondyala, noluhepo, nononkhumbi, no mauvela, nononkhia. (Salmo 37:10, 11, 29; 67:6; 72:7, 16; Isaías 33:24) Tyikuhambukiswa unene okusoka kovanthu uhole mavakatutiliswa. (João 5:28, 29) Upandula unene Jeova mokonda yekevelelo olio ewa! Namphila wahali kombolo nokunwa kovinyu, wenda Kehinangelo mokonda upanda otyilikutila tya Jesus.

OKUTI MOYA PEHINANGELO?

19, 20. (a) Oityi una okulinga opo ukaleko apeho? (b) Omokonda yatyi moila Kehinangelo?

¹⁹ Mokalako vala apeho pano pohi ine o keulu, inkha ukala nekolelo mu Jeova Huku, no mu Jesus Kristu, no mofeto yeyovo. Tyina wenda Kehinangelo, sokolola kekevelelo liove, no kesilivilo liononkhia mba Jesus. Tyina ekumbi liamanyingila, Mutano 3 ya Tyikukutu yo 2015, ovanthu ovanyingi mouye auho mavaende Kehinangelo, malilingilwa Monondyuo Mbomaliongiyo ine o ponomphangu ononkhuavo.

²⁰ Inkha tulipongiya nawa opo tuende Kehinangelo, matupandula unene otyilikutila tya Jesus. Tupu inkha utehelela nawa elongomona lilingwa Pehinangelo, matyikulundu okukala nohole navakuenyi, nokuvepopila oluembia lwa Jeova, netyi etuhandela. (Mateus 22:34-40) Lipongiya opo wende Kehinangelo.