Jeova Ukahi Nokumpha Ovipuka Ovinyingi Unene

Nekulila mepundaumbo lio Alicante, koutundilo wo Espanha. Ombunga yange ankho ikalela vala okuyaya, moluotyo, pouna wange ankho ndyikala vala momatapalo. Popepi neumbo lietu, ankho pena ondyuo mukolalwa omapuneu. Iya andyikala epanga lia José María, uundapa mondyuo omo. José María ankho omunthu ukahi nawa, una oluembia name, oluembia ankho ombunga yange ihena name. Momivo viovitateka, wakala ngatyina omukulu wange, epanga liotyotyili—namphila ankho omukulu vali kwame omanima 20.

José María ankho wahimbika okulilongesa Ombimbiliya no Nombangi mba Jeova. Ankho uhole unene Ovihonekwa, iya apeho ankho umphopila otyili tyo Mbimbiliya alongeswa. Ame ankho ndyimutehelela nonthilo, mahi tyotyili, ankho hesukile novipuka amphopila. Mokonda ndyimukuendye, ankho nasukalala vali novipuka ovikuavo. Mahi onkhalelo oyo, ankho maipiluluka.

OKUAPINUNUKA NOMOTA TYAPILULULA OMUENYO WANGE

Hihande okupopia unene konthele yotyo. Etyi mandyipopi vala, okuti ankho nalingile ouwova. Monthiki ike vala, omuenyo wange auho aupiluluka. Ankho ndyimukuendye wokuna ononkhono ononyingi, mahi liwa-liwa andyikala otyilema tyiheliminyi vali mosipitali. Okutavela onkhalelo yange omphe, tyotyili tyepuiyile unene. Andyitualako okulipula okuti, ‘Nesukisa umwe okutualako nomuenyo?’

José María eya okunthala, iya liwa-liwa apopi no Nombangi mba Jeova mbewaneno lio pohika opo, na veye okunthalela-po mosipitali. Ankho vanthalela-po apeho, iya otyo atyihiki unene komutima wange. Etyi pahe natunda omu ankho ndyiyungwa unene no nondotolo, andyihimbika okulongeswa Ombimbiliya. Iya andyinoñgonoka otyili konthele yetyi ovanthu vamonena ononkhumbi iya avankhi, no mokonda yatyi Huku ayekela ovivi vimoneke. Tupu, nanoñgonoka okuti Huku walaa okuti komutwe, ohi aiho maikeyula ovanthu vehena onkhali, pehena vali nawike makati: “Ame navela.” (Isaías 33:24) Otyo, otyikando tyo tete momuenyo wange, nahimbika okukala nekevelelo lihuvisa.

Etyi natunda mosipitali, andyikulu liwa-liwa melongeso liange lio Mbimbiliya. Ngotyo, notyipundi tyomalola andyende komaliongiyo amwe Onombangi mba Jeova, nokuundapa navo movilinga viokuivisa. Monthiki 5 ya Kuhuhu yo 1988, puetyi natuukisa omanima 20 andyimbatisalwa. Jeova Huku amkhuatesako okukala nolusoke luaviuka. Mahi, oityi ankho ndyina okulinga, opo ndyilekese okuti napandula unene?

OKUENDA NO KOMUTWE NAMPHILA NALEMANA

Ame natokola okuhayeke oulema wange, unthyilike okulinga atyiho ndyipondola movilinga via Jeova. Ankho nahanda okulongoka. (1 Timóteo 4:15) Ponthyimbi, ankho katyapepukile, mokonda ombunga yange ankho kavahande ndyililongese otyili. Mahi ankho ame ndyina ovakuatate vange no nomphange mbange tufenda navo. Avankhuatesako opo nahapumbwe elingiyo nalike, nokuundapa nombili movilinga viokuivisa.

Mokueenda kuomuvo, atyimoneka nawa okuti nesukisa etyi tyinkhuatesako omuvo auho. Etyi vaovola ehimbwe, konyima avavasi ondyuo imwe ikahi nawa, muyungwa ovilema, mepundaumbo lio Valencia, likala onokilometu 160 kokulio kwo Alicante. Ondyuo oyo, yakala eumbo liange.

Namphila ndyikala vala moula, mahi natokola okutualako okuumbila Jeova. Noumbongo ndyitambula noukuavo vali, andyilande okomputadole, iya aveipake ponthele youla wange. Tupu andyilande otelefone. Pahe kese nthiki komuhuka, omunthu umwe po vokunkhatesako, ulikala okomputadole yange no telefone yange. Opo ndyiundapese okomputadole, ndyina omakina ndyiundapesa notyiyeli tyange. Tupu ndyina okamuti kamwe ndyiundapesa nomulungu. Okamuti oko, ndyihoneka nako mo komputadole, nokumanga po nonumelu mbo telefone.

Oñgeni ounongo oo ukahi nokunkhuatesako? Haunene, unkhuatesako okunyingila mo site jw.org no mo Biblioteka mo INTERNETE. Omo, ndyivasa-mo ekuateso enene! Ndyikala onoola ononyingi kese nthiki nokulilongesa, nokuovolola momikanda viomupika wekolelo, opo ndyitualeko okunoñgonoka Huku novituwa viae vihuvisa. Iya tyina ndyilitehelela okuti ndyina ounye, nokuasoya, apeho ndyivasa otyipuka tyimwe mo site, tyimphameka.

Okomputadole yange, tupu inkhuatesako okutehelela omaliongiyo ewaneno, nokuava omakumbululo. Ame ndyipondola okuava omakumbululo, nokulikuambela, nokulinga omalongomona, alo nokutanga Omutala Womulavi, tyina namapewa ovilinga ovio. Namphila hipondola okukala pomaliongiyo oo, no ngotyo ndyilitehela okuti ndyilinga onthele yewaneno lietu.

Tupu, otelefone no komputadole, vinkhuatesako okuundapa unene movilinga viokuivisa. Otyili, ame hiende umbo na umbo, ngetyi tyilinga ovanyingi po Nombangi mba Jeova. Mahi, oulema wange kaunthyilika okuivisa. Ndyiundapesa ovipuka ovio, pala okupopila vakuetu otyili konthele ya Jeova. Tyotyili, tyinthyambukiswa unene okutomphola novanthu kotelefone. Moluotyo, ovakulu vewaneno avandyiti opo ndyikale kumutwe wovilinga viokuivisa no telefone. Iya ovilinga ovio, vikahi nokukuatesa-ko haunene ovakuatate mewaneno, vehetyivili okutunda meumbo.

Mahi, hihimama vala no nomakina nokutala mo site. Kese nthiki omapanga ange eya okunthalela-po. Veya no nombunga mbavo na vana velii navo, vahanda okunoñgonoka otyili tyo Mbimbiliya. Ovikando ovinyingi, vandyita opo ndyitomphole novanthu ovo. Pamwe, onombunga mbumwe mbunthalela-po, opo valinge elilongeso liavo liombunga name. Haunene, ndyihambukwa tyina ovana vavo vapumphama ponthele youla wange, avamphopila oityi vakalela nohole na Jeova.

Ame ndyihambukwa okutambula vana veya okunthala. Ondyuo yange apeho ikala tyeyula omapanga ange vamwe vatunda popepi, vamwe ovo kokule. Iya otyo atyiho vandingila nohole, tyihuvisa vana vaundapa mondyuo oyo. Kese nthiki, ndyipandula Jeova, mokonda wenthavela okukala pokati kovakuatate ovo velihole ouye auho.

NDYITUALAKO NOKULWA

Kese munthu tyina ankhukunya, amphulu okuti ukahi ñgeni, ndyimukumbulula vala okuti, “Ame nkhele, ndyitualako nokulwa!” Tyotyili, ame ndyityii okuti hikahi andyike motyitateka otyo. Namphila tuvahiwa novitateka, Ovakristau aveho veli movilwa,“ovilwa oviwa viekolelo.” (1 Timóteo 6:12) Oityi tyinkhuatesako okulwa mokueenda kuomanima omanyingi, namphila tyepuiya? Ndyilikuambela ononthiki ambuho, nokupandula Jeova wankhuatesako okukala nomuenyo una ekevelelo. Ndyiovola okuundapa unene movilinga via Huku, nokutualako okusoka kovipuka tuapakelwa komutwe.

Apeho ndyisoka kouye omupe omu mandyikahataika nokukalombauka. Pamwe—ndyinyanesa epanga liange enene José María—walemanekua notyintheya, okuti matukelilola okuhateka. Andyimupulu okuti, “Olie makafinda? Akumbulula okuti, “uhesuke nou makafinda. Tyesukisa, okunyingila Momphangu Yombembwa, atukahataika.”

Katyapepukile okukala noulema ou. Ndyityii okuti, owova nalingile puetyi ndyimukuendye, wandyetela oulema. Mahi, ndyipandula unene Jeova uhandyekele-po. Huku wampha ovipuka viakolela unene, ombunga onene yovakuatate tufenda navo, nehando liokukala nomuenyo, nehambu liokukuatesako vakuetu, nekevelelo komutwe. Inkha tyitiwa popia oñgeni uliivite, ndyipondola okupopia okuti, Jeova ukahi nokumpha ovipuka ovinyingi unene.