3 Itukuatesako Tyina Tuna Ovitateka

Kuna ovitateka tuhevili okutetulula nokulityilika-vio. Mongeleka, hamwe wankhisa umwe uhole, ine hamwe una ouvela uhaveluka iya ove una okuovola onkhalelo onkhuavo yokutualako namphila una ovitateka ovio. Mahi, okuti Ombimbiliya ipondola okutukuatesako mu kese tyitateka?

OUVELA UHAVELUKA

Omuhikuena umwe utiwa Rose wati: “Ame ankho natyitwa monkhalelo yelikalela unene novanthu vakuetu, ankho ndyina ouvela umwe natyituwa nao. Mokonda youvela oo ankho hityivili okulinga ovipuka vimwe.” Mokonda yomaluihamo ae ankho pamwe tyimupuiya okulilongesa konthele ya Huku iya otyo ankho tyimusukalalesa unene. Mahi akuateswako no nondaka mba Jesus mbuli Mateus 19:26 mbati: “Mahi ku Huku ovipuka aviho vivilwa.” Rose waimbuka okuti kuna ononkhalelo ononyingi mbo kulilongesa. Ehimbika okutehelela Ombimbiliya yatangwa ngondalama no mikanda omikuavo veongano.a Rose wapopia okuti: “Ankho halingile ngotyo, ñgeno hakalele noupanga wapama na Huku.”

Pamwe ankho Rose ukala tyanumana mokonda ketyivili okulinga ovipuka ngo kohale. Rose wavasa eungumaneso monondaka tuvasa momukanda wa 2 Coríntios 8:12 wati: “Inkha una ehando liokutyilinga, otyiawa tyitavelwa, otyotyina omunthu ena, hatyetyi-ko omunthu ehena.” Onondaka ombo mbakuatesako Rose okunoñgonoka okuti Huku uhambukilwa etyi oe alinga, mokonda ulinga atyiho evila namphila ehevili okulinga ovinyingi.

TYINA WAMANKHISA UMWE UHOLE

Delfina, wapopiwa konyima wati: “Etyi omona wange womukainthu ankho una omanima 18 anyima, tyandyihamene unene, andyisoko okuti himetyivili okutualako okukala nomuenyo. Nalumwe nelitehelele ngotyo.” Delfina wavasa eungumaneso limwe enene mo nondaka mbo Salmo 94:19, mo mukanda oo omuhoneki wo salmu wapopila Huku okuti: ‘Tyina omalusoke ange anthyukalalesa . . . eungumaneso liove liankhalesa nawa.’ Delfina wati: “Ankho ndyilikuambela ku Jeova opo ankhuateseko okukala nomalusoke apondola okunkhuatesako moluihamo luange.”

Opo Delfina etyivile okutuala-ko, weliava opo aundape vali movilinga via Huku. Pamwe ankho ulitehelela ngatyina omona. Ankho ulieleka no lapi yokulomba, aloo umwe olapi yateka-teka nkhele yundapeswa. Tyelifua notyo, namphila ankho elitehelela monkhalelo oyo, mahi welilongesa okuti no ngotyo ankho upondola okukuatesako vakuavo. Delfina wati: “Ankho ndyiundapesa onondonga mbo Mbimbiliya opo ndyikuateseko ovalongwa vange mo nonkhalelo ononyingi, ngetyi Jeova andyiungumanesa.” Delfina ahoneka ovikapitulu vio Mbimbiliya vipopia konthele yovanthu vamwe valiko, navo vakakalele novitateka. “Tyihe-otyo vala,” waimbuka okuti, “ovanthu ovo aveho ankho velikuambela.” Tupu welilongesa okuti opo “avase omakumbululo omalikuambelo ae ankho wesukisa okutanga apeho Ombimbiliya.”

Okutanga Ombimbiliya tyihole okukuatesako Delfina okutala komutwe wandyila neyumba-nthumbi, ahatale konyima. Ekevelo likahi mu Atos 24:15 liemupameka, otestu oyo yati: “Makukakala etutilo liovaviuki na vana vehevaviuki.” Okuti Jeova makatutilisa umwe omona wange? Delfina wakumbulula okuti: “Ame ndyiluete-ale omona wange. Jeova wiiya-le onthiki matulivasi nomona wange. Ku ame tuelivasa-le nae mouye omupe, ndyimuhole ngo monthiki atyitwa.”

a Onothele ombo mbangalavalwa mbuvasiwa mo Internete mo jw.org.

Ombimbiliya ipondola okukukuatesako okuvasa eungumaneso momuvo wepuiya

OÑGENI HUKU APONDOLA OKUTUKUATESAKO?

Ombimbiliya yava ekumbululo liayandyuluka nawa okuti: “Jeova ukahi popepi novanthu aveho vemuihana. Mafuisapo ehando lia vana vena onthilo nae. Matehelela tyina veliyavela okuita ekuateso iya eveyovola.” (Salmo 145:18, 19) Okuti otyo katyihambukiswa? Oñgeni Huku akumbulula omalikuambelo ovanthu iya nokuvehongolela?

POKUTUAVELA ONONKHONO:

Ovitateka pamwe vipondola okutusoyesa iya atuhetyivili vali okukoleleya—tyina tuavela, na tyina tuhelitehelela nawa iya no moupanga wetu na Huku. (Provérbios 24:10) Mahi Jeova “waavela epondolo una wepuila, nokuavela ononkhono ononyingi una uhena-mbo.” (Isaías 40:29) Apositolu Paulu wakoleleyile movitateka ovinyingi wati: “Ame ndyina ononkhono movipuka aviho, mokonda ya una umpha epameko.” (Filipenses 4:13) Paulu wakalele no nonkhono mokonda yospilitu sandu ya Huku. Nove upondola okuita ku Huku opo ekuavele ospilitu sandu.— Lucas 11:13.

POKUTUAVELA OUNONGO:

Onalupi ove wesukisa ekuateso opo unoñgonoke onondonga mbo Mbimbiliya iya oendela-mo? omulongwa Tiagu wapopia okuti: “Inkha umwe pokati kenyi wakamba ounongo, atualeko okuita ku Huku, oe meupewa, mokonda Huku wavela aveho otyali, ahakandukila.” (Tiago 1:5) Ove upondola okulinga ovipuka ngetyi wapopia melikuambelo putyina utanga Ombimbiliya iya nokuendela muetyi ulilongesa. (Tiago 1:23-25) Inkha ulinga ngotyo, motyivili okulilongesa tete oñgeni moendela mo nondonga ombo.

POKUTUAVELA OMBEMBWA:

Tyina ove umona ovitateka mokonda yotyiho, Jeova upondola okukukuatesako okulitehelela nawa. Ondaka yae ipopia okuti: “Muhakalei notyiho notyipuka natyike, mahi muaviho, itei unene ku Huku nomalikuambelo kumwe nolupandu. Iya ombembwa ya Huku, ipona onondunge nomalusoke aeho, maiyungu omitima vienyi nomalusoke enyi, menyina lia Kristu Jesus.” (Filipenses 4:6, 7) Omokonda yatyi ove uhaitila ombembwa ku Jeova?

Mahi, ankho ovitateka vikahi vala nokutualako? Uhasoke liwa okuti Huku kesukile nove. Inkha ovitateka viove vitualako, Huku upondola okukupameka nokukuavela ononkhono opo ukoleleye. (1 Coríntios 10:13) Ombimbiliya ilaa okuti mapakakala omuvo umwe ovitateka vihamakakala-ko vali!