“Vana Vekutehelela” Mavakayovolwa

1. Oityi onthue atuho tuhandela ombunga yetu?

OMPHANGE umwe utiwa o Paulinab wati: “Tunde apa nanoñgonoka otyili, ndyihanda okukakala mouye omupe nombunga yange aiho. Haunene ankho ndyihanda okuumbila Siovaa kumwe nomulume wange Antonio, nomona wange.” Okuti nove una ombunga ihaumbila Siovaa? Hamwe nove uhanda ombunga yove ifende Siovaa nga Paulina.

2. Omapulo patyi matukumbulula monthele ei?

² Onthue katupondola okukuluminya ombunga yetu opo vetavele onondaka onongwa. Mahi tupondola okuvelunda okuikula omitima viavo opo vembutehelele. (2 Tim. 3:14, 15) Omokonda yatyi tuesukisila okuava oumbangi kombunga yetu? Omokonda yatyi tuesukisila okunoñgonoka onkhalelo velitehelela? Oityi tupondola okulinga opo tukuateseko ombunga yetu okukala nohole na Siovaa ngo onthue? Iya oñgeni ovakuatate nonomphange mewaneno vapondola okutukuatesako?

OMOKONDA YATYI TUESUKISILA OKUAVA OUMBANGI KOMBUNGA YETU?

3. Ngetyi tyipopia 2 Petulu 3:9, omokonda yatyi tuesukisila okuava oumbangi kombunga yetu?

³ Apa katutu Siovaa mahanyeko ouye uno. Iya mavahupu vala, ovo vana “vahanda omuenyo uhapu.” (Ovil. 13:48) Onthue tulinga ononkhono mbokukuatesako ovanthu tuhei motelitoliu yetu. Ngotyo, tupu tuesukisa okukuatesako ombunga yetu opo navo vaumbile Siovaa. Tate yetu woluembia Siovaa, “kahande nawike eye okuhanyua-ko, mahi uhanda aveho velivele.” — Tanga 2 Petulu 3:9.

4. Oityi tuhole okulinga tyihaviukile pokuava oumbangi kombunga yetu?

⁴ Tuesukisa okuhinangela okuti pena onkhalelo yaviuka nonkhalelo yapenga yokupopila vakuetu onondaka onongwa. Pamwe tyina tuivisa komunthu tuhei tupopia umwe nonthilo. Mahi pamwe tyina tuava oumbangi kombunga yetu tuveviukilila vala.

5. Oityi tuesukisa okuhinangela tyina tuhanda okuava oumbangi kombunga yetu?

⁵ Ovanyingi pu onthue tulivela tyina tuhinangela onthiki yo tete tuavele oumbangi kombunga yetu, mokonda hamwe katuapopile monkhalelo ikahi nawa. Apositolu Paulu wapopilile Ovakilisitau okuti: “Onondaka mbenyi mbukale apeho mbukahi nawa, mbahingwa nawa omongwa, opo munoñgonoke oñgeni mamukumbulula kese munthu.” (Kolo. 4:5, 6) Otyiwa okuhinangela onondonga ombo tyina tuava oumbangi kombunga yetu. Mokonda inkha katulingi ngotyo, matuvenumanesa, avehetutehelela vali.

OITYI TUPONDOLA OKULINGA OPO TUKUATESEKO OMBUNGA YETU?

6-7. Omokonda yatyi vana velinepa nomunthu uhelilongesa vesukisila okunoñgonoka onkhalelo mukuavo elitehelela? Popia ongeleka.

⁶ Noñgonoka onkhalelo velitehelela. Paulina wapopiwa konyima, wati: “Potete ankho nahanda vala okupopia nomulume wange konthele yo Mbimbiliya. Ankho katupopi vali ovipuka ovikuavo.” Mahi omulume wa Paulina, ankho kei ovipuka ovinyingi konthele yo Mbimbiliya iya ankho kanoñgonoka ovipuka Paulina apopia. Antonio ankho ulitehelela okuti Paulina wesuka vala nongeleya yae. Pahe Antonio asukalala unene mokonda ankho usoka okuti Paulina welipaka mongeleya inyona ovanthu.

⁷ Paulina wapopia okuti kongulohi no konthyulilo yosimanu, ankho ukala omuvo omunyingi novakuatate nonomphange momaliongiyo no movilinga viokuivisa no povitalukiso. Wati: “Pamwe Antonio ankho uhika meumbo mutupu omunthu, iya ankho ulilwa-mo nounye.” Antonio ankho uhanda ñgeno uvasa-vo meumbo omuhikuena wae nomona wae. Ankho kei ovalie Paulina enavo. Iya ankho ulitehelela okuti omapanga a Paulina akolela vali kwe. Mokonda yotyo, Antonio ahongo Paulina okuti memuhenge. Okuti waimbuka etyi Paulina ankho apondola okulinga opo alekese okuti unoñgonoka onkhalelo Antonio elitehelela?

8. Ngetyi tyipopia 1 Petulu 3:1, 2, oityi ombunga yetu haunene itala ku onthue?

⁸ Kala ongeleka ongwa. Haunene, ombunga yetu yesuka vali netyi tulinga tyipona etyi tupopia. (Tanga 1 Petulu 3:1, 2.) Paulina nae aimbuka okuti otyo naina otyili umwe. Wati: “Ankho ndyityii okuti Antonio kahande-ale okunthyenga mokonda utuhole unene. Mahi etyi anthyonga, tyankhuatesako okuimbuka okuti ankho nesukisa okulinga ovipuka ngetyi Siovaa ahanda. Andyiimbuka okuti ankho nesukisa okukala ongeleka ongwa, anahaovola vala okumuavela oumbangi.” Paulina ayekepo okukuluminya omulume wae okupopia vala konthele yo Mbimbiliya iya pahe avahimbika okutomphola konthele yovipuka ovikuavo. amono okuti Paulina ankho ukahi nokukala omuna-mbembwa. Tupu omona wavo pahe ankho una vali onondunge. (Pro. 31:18, 27, 28) Etyi amona onkhalelo Ombimbiliya ankho ikahi nokukuatesako ombunga yae, akala nesuko liokulilongesa Ombimbiliya. — 1 Kol. 7:12-14, 16.

9. Omokonda yatyi tuesukisila okutualako okukuatesako ombunga yetu?

⁹ Tualako okukuatesako ombunga yove. Siovaa wetuavela ongeleka ongwa. “Utualako” okuavela ovanthu omphitilo yokutavela onondaka onongwa opo vakakale nomuenyo uhapu. (Jer. 44:4) Iya apositolu Paulu wapopilile Timotiu opo atualeko okukuatesako vakuavo. Omokonda yatyi? Omokonda mokulinga ngotyo, ankho meliyovola oe muene na vana vemutehelela. (1 Tim. 4:16) Onthue tuhole unene ombunga yetu, otyo tuhandela vanoñgonoke otyili tyikahi mo Mondaka ya Huku. Mokueenda kuomuvo, ovipuka Paulina ankho apopia nevi alinga, avihimbika okukuatesako ombunga yae. Pahe Paulina una ehambu liokuumbila Siovaa kumwe nomulume wae. Aveho ovakokoli-ndyila iya Antonio omukulu wewaneno.

10. Omokonda yatyi tuesukisila okupwa-elundo?

¹⁰ Pwa-elundo. Tyina tuhimbika okuendela movitumino vyo Mbimbiliya, tupilulula ovituwa vietu nonkhalelo yetu yokusoka. Iya otyo tyipondola okunumanesa ombunga yetu. Mongeleka, vaimbuka liwa okuti onthue pahe katulingi vali ovipito vielikuata nongeleya iya katulipake vali mopulitika. Ponthyimbi, vamwe vapondola okutunumanena. (Mat. 10:35, 36) Mahi katupondola okusoka okuti kamavapiluluka vali. Inkha tuyekapo okuvekuatesako okunoñgonoka etyi tutavela, ongatyina tukahi nokuvepopila okuti kavatokalele omuenyo uhapu. Mahi hinangela okuti Siovaa ketuavelele otyilinga tyokukoyesa vakuetu; otyilinga otyo wetyiavela vala Sesusi. (Suau 5:22) Inkha tupwa-elundo nombunga yetu, mokueenda kuomuvo vapondola okututehelela. — Tala okakasa kati: “Undapesa o Site Yetu Opo Ulongese.”

11-13. Oityi ulilongesila konkhalelo Alisi akuatesileko ovo tate yae?

¹¹ Kakatela metokolo liove, mahi popia nonthilo. (Pro. 15:2) Tala etyi tyaendele na Alisi. Ovo tate yae, ankho velipaka mopulitika iya ankho kavetavela okuti kouye kuna Huku. Iya etyi Alisi anoñgonoka otyili, ankho kakala vali meumbo liavo. Alisi aimbuka okuti ankho kapondola okuseta okupopila ovo tate yae ovipuka oviwa ankho ekahi nokulilongesa. Wati: “Inkha useta okupopila ombunga yove ovipuka ovipe ukahi nokulilongesa, otyo tyipondola okuvenumanesa vali.” Alisi ankho uhonekela ovo tate yae omikanda iya ankho uhoneka ovipuka vimwe ovo tate yae vapondola okusuka navio, ngetyi ohole. Konyima evepopila etyi Ombimbiliya ipopia konthele yotyo, iya evepulu oityi vasoka. (1 Kol. 13:1-13) Ankho uvepandula etyi vemutekula iya uvetumikisa ovipuka oviwa. Tyina ankho ekevetalela-po, ankho ukuatesako me yae movilinga vyo meumbo. Etyi Alisi evepopila ovipuka ovipe ankho ekahi nokulilongesa, ponthyimbi avanumana unene.

¹² Tyina Alisi ankho akatalelapo ovo tate yae, ankho utualako okutanga Ombimbiliya. Wati: “Otyo atyikuatesako me okunoñgonoka okuti ku ame, okulilongesa Ombimbiliya otyipuka tyakolela unene.” Konyima, tate ya Alisi atokola okulilongesa ovipuka vimwe vyo Mbimbiliya opo anoñgonoke omokonda yatyi omona wae apilulukila unene. Tupu ankho uhanda okuvasa ovipuka ovivi mo Mbimbiliya. Alisi ayawisako okuti: “Andyimuavela Ombimbiliya iya andyimuhonekela-mo ovipuka oviwa.” Oityi tyatundililako? Tate ya Alisi ahavasi-mo ovipuka ovivi. Mahi etyi atanga Mondaka ya Huku, atyimuhiki unene komutima.

¹³ Tuesukisa okukakatela metokolo lietu, mahi tuna okupopia nonthilo, alo umwe tyina tupenyua. (1 Kol. 4:12b) Mongeleka, Alisi ankho upenyua na me yae. Wati: “Etyi nambatisalwa, me amphopila okuti: ‘Utupu-ale onondunge!’” Oityi Alisi alingile? Wati: “Ankho ndyitupu owoma wokumupopila konthele yovipuka ankho ndyitavela. Andyimupopila okuti ankho natokola okukala Ombangi ya Siovaa iya ankho mandyikakatela metokolo liange. Andyiovola okulekesa ku me okuti ndyimuhole unene. Atuho atutokesa ononkhuka iya andyimutelekela-ko okulia kuapepa nawa. Okutuka opo, me ahimbika okumphopila okuti Ombimbiliya ankho ikahi nokunkhuatesako okukala omunthu ukahi nawa.”

14. Omokonda yatyi tuhapondola okuyeka ombunga yetu ituhongiliye?

¹⁴ Pamwe tyesukisa omuvo opo ombunga yetu inoñgonoke okuti okuumbila Siovaa otyipuka tyakolela unene ku onthue. Mongeleka, me ya Alisi walilile vali mokonda yetyi Alise atokola okukala omukokoli-ndyila, ahataindya ovilinga ankho vemuhandela. Mahi no ngotyo Alisi atualako okukakatela metokolo liae. Wati: “Inkha uyeka ombunga yove ikuhongiliye movipuka vimwe, opo ha mavekulingila-ko omatokolo mononkhalelo ononkhuavo mbomuenyo. Mahi inkha upopia navo nonthilo, okakatela metokolo liove, vamwe vapondola okukutavela.” Iya otyo umwe tyaendele na Alisi. Ovo tate yae pahe ovakokoli-ndyila iya tate yae omukulu wewaneno.

OÑGENI EWANENO LIPONDOLA OKUKUATESAKO?

15. Ngetyi tyipopia Mateusi 5:14-16 na 1 Petulu 2:12, oñgeni “ovilinga . . . oviwa” vya vakuetu vipondola okukuatesako ombunga yetu?

¹⁵ Siovaa uundapesa “ovilinga . . . oviwa” vyo vakuatate mewaneno opo akokele ovanthu kwe. (Tanga Mateusi 5:14-16; 1 Petulu 2:12.) Inkha omunthu welinepa nae kelilongesa, okuti velii novakuatate vomewaneno lienyi? Paulina wapopiwa konyima, ankho ukonga ovakuatate nonomphange veye meumbo liae opo velinoñgonoke nomulume wae. Antonio uhinangela etyi omukuatate umwe emukuatesileko okupilulula onkhalelo ankho atala Onombangi mba Siovaa. Wati: “Omukuatate apolo onofelia kovilinga opo eye meumbo liange tutale vala ovanthu vasana ombola mo televisau. Andyilipopila okuti: ‘Naina, ovanthu vala nga ame!’”

16. Omokonda yatyi tuesukisila okukonga ombunga yetu iye komaliongiyo?

¹⁶ Onkhalelo imwe yokukuatesako ombunga yetu okuvekonga komaliongiyo. (1 Kol. 14:24, 25) Keliongiyo lyo tete Antonio aile, o Kehinangelo Liononkhia mba Sesusi. Waile vala mokonda ankho malilingwa moola apetuka kovilinga iya ankho kamalisete. Wati: “Ankho hanoñgonokele natyike tyapopiwa melongomona. Mahi nahuvile unene novanthu navasa-mo. Vandiepesa nokuvoko kuapama nawa! Vankhukunya umwe nomutima auho.” Ovalinepi vamwe mewaneno ankho vakuatesako Paulina okuyunga omona wae momaliongiyo no movilinga viokuivisa. Ngotyo, etyi Antonio atokola okunoñgonoka vali konthele yetyi Paulina alongeswa, aiti komulume watyo opo emulongese Ombimbiliya.

17. Katupondola okulivela onombei mokonda yatyi? Iya omokonda yatyi tuhapondola okuyekapo okukuatesako ombunga yetu?

¹⁷ Onthue tukevelela okuti nthiki imwe ombunga yetu mavaumbila Siovaa kumwe nonthue. Mahi namphila tulinga ononkhono mbokuvekuatesako okuumbila Siovaa, vamwe vapondola okuhetavela otyili. Inkha otyo tyimoneka-po, katupondola okulivela onombei mokonda yetokolo liavo. Onthue katupondola okukuluminya ovanthu vetavele otyili. Mahi tyina ombunga yove yamamono ehambu una-lyo mokonda yokuumbila Siovaa, otyo tyipondola okuvekuatesako okusoka monkhalelo yelikalela. Veitilako momalikuambelo iya opopi navo nonthilo. Tualako okuvekuatesako! (Ovil. 20:20) Kala nonthumbi yokuti Siovaa mayambe ononkhono ulinga. Iya inkha vekutehelela, mavakayovolwa!