Okuti Ukahi Nokuyunga Nawa “Ondyakulilo Onene Yekolelo” Liove?

1-2. (a) Ngetyi tyipopia Ova Efesu 6:16, omokonda yatyi tuesukisila “ondyakulilo onene yekolelo”? (b) Omapulo patyi maakumbululwa monthele ei?

OKUTI una “ondyakulilo onene yekolelo”? (Tanga Ova Efesu 6:16.) Tuna onthumbi yokuti una-yo. Ondyakulilo ankho iyakulila olutu aluho luefualali. Tupu ekolelo liove likuyakulila kovipuka ovivi vivasiwa mouye uno, ngetyi ovinepo viasila, noungangala, novituwa ovikuavo ovivi.

² Mahi mokonda tukahi ‘mononthiki mbahulilila,’ ekolelo lietu malitualako okulolwa. (2 Tim. 3:1) Ngotyo, oñgeni upondola okutala nawa inkha ondyakulilo yekolelo liove ikahi umwe nawa? Oñgeni upondola okukuata nawa ondyakulilo yove? Matulilongesa omakumbululo omapulo oo.

TALA NAWA OÑGENI ONDYAKULILO YOVE IKAHI

3. Oityi efualali ankho lilinga ondyakulilo yalio iya omokonda yatyi?

³ Kohale, omafualali ankho ena ondyakulilo yatungwa novivela, nombandwa. Ankho vawaeka omulela kombandwa opo ihakukute. Tupu ankho vawaeka kovivela opo viahalie ofulusu. Tyina ankho efualali limona okuti ondyakulilo yalio yateka, ankho liipangiya liwa opo likale tyafuapo pala okulwa. Mahi oñgeni otyo tyelikuata nekolelo liove?

4. Omokonda yatyi wesukisila okutala nawa ondyakulilo yekolelo liove? Oñgeni upondola okutyilinga?

⁴ No ove una okutualako okutala nawa, nokuyunga ekolelo liove opo apeho ukale tyafuapo pala okulwa, ngetyi ankho tyilinga omafualali o kohale. Onthue vaumbili va Siovaa, tukahi nokulwa iya vamwe ponondyale mbetu ovilulu. (Efe. 6:10-12) Petupu omunthu nawike mekuyungila-ko ondyakulilo yekolelo liove. Mahi oñgeni upondola okunoñgonoka inkha ekolelo liove malitualako tyapama tyina liamalolwa? Tete, wesukisa okulikuambela ku Siovaa okumuita opo ekukuateseko. Vali, wesukisa okutanga Ombimbiliya opo ulitale ngetyi Siovaa ekutala. (Heb. 4:12) Ombimbiliya yati: “Yumba onthumbi mu Siovaa nomutima wove auho, uhapamene menoñgonoko liove muene.” (Pro. 3:5, 6) Pahe tyina usoka kotestu oyo, osoko komatokolo walinga mononthiki mbuno, oityi wiimbuka? Mongeleka, okuti wakalele tyihena onombongo? Etyi ankho ukahi nokulambela motyitateka otyo, okuti wahinangela omulao wa Siovaa ukahi mu Ova Hebeleu 13:5? Wati: “Ame nalumwe mandyikuyeke iya nalumwe mandyikusi-po.” Okuti onondaka ombo mbekukalesa nonthumbi yokuti Siovaa mekukuatesako? Inkha wakalele nonthumbi oyo, otyo tyilekesa okuti ukahi nokuyunga nawa ondyakulilo yekolelo liove.

5. Oityi hamwe moimbuka tyina utala nawa onkhalelo ekolelo liove likahi?

⁵ Hamwe tyipondola okukuhuvisa okutala onkhalelo ekolelo liove likahi. Mokonda upondola okuimbuka ovipuka vimwe vihekahi nawa uhenemone kohale. Mongeleka, hamwe moimbuka okuti pena ovipuka vimwe viatendesa ekolelo liove, ngetyi okusukalala, nomatutu, nokusoya. Inkha otyo tyikahi nokumoneka no ove, oñgeni upondola okuyakulila ekolelo liove opo lihatende vali?

LIYAKULILA KOKUSUKALALA, NO KOMATUTU, NOKUSOYA

6. Onalupi okusukalala tyikahi nawa? Popia onongeleka.

⁶ Pamwe okusukalala tyikahi nawa. Mongeleka, onthue tuhanda okuhambukiswa Siovaa na Sesusi. Otyo otyipuka tyitusukalalesa. (1 Kol. 7:32) Inkha tualinga onkhali, onthue tusukalala nokupameka vali oupanga wetu na Siovaa. (Sal. 38:18) Tupu tusukalala nokuhambukiswa una tuelinepa nae, nokutekula nawa ombunga yetu novakuatate vetu. — 1 Kol. 7:33; 2 Kol. 11:28.

7. Ngetyi tyipopia Provérbios 29:25, omokonda yatyi tuhapondola okutila owoma ovanthu?

⁷ Mahi okusukalala unene tyipondola okutendesa ekolelo lietu. Mongeleka, tupondola okusukalala unene nokukala nokulia kutuuka, nomuvalo. (Mat. 6:31, 32) Iya otyo tyipondola okutulunda okuovola okukala nomalumono. Alo umwe tupondola okuhimbika okukala nohole nonombongo. Inkha tuyeka otyo tyimoneke no onthue, ekolelo lietu malitende iya atunyono oupanga wetu na Siovaa. (Malu. 4:19; 1 Tim. 6:10) Ine, tupondola okusukalala notyipuka otyikuavo: okuovola okupandwa na vakuetu. Mokonda yotyo, tupondola okukala nowoma wokupenyua, atuhakala nowoma wokulinga otyipuka tyipondola okunumanesa Siovaa. Oityi tupondola okulinga opo tuliyakulile kowoma oo? Tuna okulikuambela ku Siovaa okuita opo etukuateseko okukala nekolelo, nokukola omutima. Ovituwa ovio, mavitukuatesako okuhatili owoma ovanthu. — Tanga Provérbios 29:25; Luka 17:5.

8. Oityi tuesukisa okulinga tyina ovanthu vayandyanesa omatutu konthele yetu?

⁸ “He younkhembi” Satanasi, uhongiliya ovanthu vae opo vayandyanese omatutu konthele ya Siovaa no konthele yovakuatate vetu no nomphange. (Suau 8:44) Mongeleka, ovanthu vokuatyitukilapo otyili vayandyanesa omatutu konthele yeongano lya Siovaa mo Internete no motelevisau no molaliu. Omatutu oo, “omihongo . . . viatema” vya Satanasi. (Efe. 6:16) Oityi matulingi inkha pamoneka omunthu uhimbika okutupopila omatutu oo? Katupondola okumutehelela! Omokonda yatyi? Omokonda onthue tuna ekolelo mu Siovaa iya tuyumba onthumbi ovakuatate vetu. Tuesukisa okulityilika okupopia, nokutehelela ovanthu vatyitukilapo otyili. Ngotyo, uhayeke omunthu nawike ine otyipuka natyike, tyikulingisise okutehelela etyi ovanthu ovo vapopia. Alo umwe katupondola okukala nolumbwe luokupopia navo.

9. Oñgeni okusoya tyikalesa ekolelo lietu? Hangununa.

⁹ Okusoya tyitendesa ekolelo lietu. Onthue katupondola okunianga ovitateka vietu. Omunthu wokulinga ngotyo utupu onondunge. Iya mokonda yovitateka, pamwe tupondola umwe okulitehelela okuti tuasoya. Mahi katupondola okukalela vala okusoka kovitateka vietu. Inkha tulinga ngotyo, matulimbwa ovipuka oviwa Siovaa alaa okuketuavela. (Ehol. 21:3, 4) Iya tyina otyo tyimoneka-po, tukala tyihena ononkhono iya atuyekepo okuumbila Siovaa. (Pro. 24:10) Mahi otyo katyipondola okumoneka no onthue. Oñgeni matuliyakulila?

10. Oityi tulilongesila komukanda wahonekwa nomphange umwe?

¹⁰ Omulume womphange umwe ukala ko Estados Unidos, uvela. Oityi tyivekuatesako okutualako nekolelo liapama? Omphange wahonekela omukanda ombala yetu ko Estados Unidos okuti: “Pamwe, otyitateka tyetu tyitunumanesa, nokutusoyesa. Mahi apeho tuhinangela ovipuka oviwa matukapewa komutwe wandyila. Napandula unene ononthele ambuho mbupameka ekolelo lietu, nokutukuatesako okutualako nehambu. Tyotyili, tuesukisa umwe onondonga tuvasa mononthele ombo. Mbutukuatesako okukoleleya movitateka Satanasi apaka mondyila yetu opo etusoyese.” Oityi tulilongesila konondaka mbomphange oo? Tulilongesilako okuti no onthue tupondola okulikuatesila opo tuhatualeko tyasoya. Oityi matyitukuatesako? Tete, hinangela okuti tyina una ovitateka, o Satanasi ukahi nokulola ekolelo liove. Vali, kala nonthumbi yokuti Siovaa mekukuatesako. Tatu, pandula ovipuka aviho Siovaa etuavela opo tupameke ekolelo lietu.

11. Omapulo patyi tuesukisa okulilinga opo tutale inkha ekolelo lietu liapama umwe?

¹¹ Okuti waimbuka okuti ondyakulilo yekolelo liove yesukisa okuviukiswa? Okuti onohanyi mbokualamba welityilikile okusukalala unene? Okuti waanya okutehelela, nokulikumbulula novanthu vatyitukilapo otyili? Okuti welikuatesilile opo uhasoye vali? Inkha otyo walingile, opo naina ekolelo liove liapama. Mahi tuesukisa okulunguka! Satanasi utaindya ononkhalelo ononkhuavo mbokunyona ekolelo lietu. Tutalei onkhalelo imwe.

LIYAKULILA KOHOLE NOMALUMONO

12. Oityi tyipondola okumonekapo inkha tukala nohole nomalumono?

¹² Ohole nomalumono ipondola okututalula atuyekepo okuyunga nawa ondyakulilo yekolelo lietu. Apositolu Paulu wapopia okuti: “Nawike ukahi movilinga vioufualali ulipaka movipuka ovikuavo vielikalela opo ahambukiswe una wemupaka koufualali.” (2 Tim. 2:4) Omafualali o Loma, ankho kaapondola okulinga ovilinga ovikuavo. Oityi ankho tyipondola okumonekapo inkha efualali kalilandula otyitumino otyo?

13. Omokonda yatyi omafualali ankho ahapondola okulinga ovilinga ovikuavo?

¹³ Soka ñgeno omafualali ekahi nokulilongesa okulwa nomutunga, mahi efualali ekuavo liakalandesa okulia mepunda-umbo. Tyina tyiti kongulohi, omafualali omakuavo afuiika nawa oviti, nokulipika omitunga viao. Mahi lina liokulandesa okulia, liteleka vali opo likalandese onthiki onkhuavo. Pahe tyina tyiti komuhuka, avautukilwa nonondyale mbavo. Ku ove, olipi malityivili okulwa? Olipi malihambukiswa omuhona walio? Pokulwa, olipi mohande likale ponthele yove? Okuti olio lina ankho liokulandesa okulia ine olio kuelifuiika?

14. Mokonda tumafualali a Kilisitu, otyipuka patyi tyakolela vali ku onthue?

¹⁴ Ngo omafualali ekahi nawa, otyipuka tuhanda vali unene okuhambukiswa ovahona vetu, Siovaa na Sesusi. Otyo tuesukisila okulunguka opo tuhatalukwe. Ku onthue, okuhambukiswa Siovaa na Sesusi, tyakolela vali tyipona ovipuka vikahi mouye wa Satanasi. Tuesukisa okutala nawa inkha nkhele tuna umwe omuvo nononkhono mbokulinga ovilinga Siovaa etutuma. Tupu tuesukisa omuvo nononkhono opo tutale nawa inkha onondyakulilo Huku etuavela mbukahi umwe nawa, okukutikinyamo ondyakulilo yekolelo lietu.

15. Oityi Paulu apopia iya omokonda yatyi?

¹⁵ Apeho tuesukisa okukala tyalunguka! Omokonda yatyi? Omokonda apositolu Paulu wapopia okuti “vana vatokola okukala ovahona . . . vayapuka mekolelo.” (1 Tim. 6:9, 10) Ondaka ‘okuyapuka’ ilekesa okuti tupondola okutalukwa nokuovola ovipuka tuhesukisile. Iya konyima yotyo, omutima wetu auhimbika okukala ‘nomahando omanyingi outyova iya anyona.’ Moluotyo, katupondola okuyeka omahando oo anyingile momutima wetu. Tuhinangelei okuti ehando liokukala nomalumono, otyipuka tyimwe Satanasi aundapesa opo anyone ekolelo lietu.

16. Ehipululo tuvasa mu Maluku 10:17-22, litulunda okulipula-tyi?

¹⁶ Mongeleka, hamwe tuvahona iya tulilandela ovipuka oviwa. Okuti ngotyo tukahi nokulinga omapita? Au. Mahi lipula okuti: ‘Namphila ndyina onombongo mbokulanda otyipuka tyimwe, mahi okuti ndyina umwe omuvo nononkhono mbokutyiundapesa? Okuti himakala nohole novipuka ovio? Okuti ohole ndyina nomalumono, kamaindingisa ngetyi tyalingile omukuendye una waanyene okukala omulongwa wa Sesusi?’ (Tanga Maluku 10:17-22.) Muaina, hahe vali okuhaovola omalumono, atumanena omuvo wetu nononkhono mbetu movilinga vya Huku!

KUATA NAWA ONDYAKULILO YEKOLELO LIOVE

17. Oityi tuhapondola okulimbwa?

¹⁷ Tuhalimbueiko okuti tukahi movilwa iya tuesukisa okulifuiika ononthiki mbatyo ambuho. (Ehol. 12:17) Ovakuatate vetu no nomphange kamavetutyindila-ko ondyakulilo yetu. Onthue muene tuna otyilinga tyokutualako nekolelo liapama.

18. Omokonda yatyi omafualali ankho akuatela nawa onondyakulilo mbavo?

¹⁸ Kohale efualali ankho lihilivikwa tyina ankho lityivila okulwa nawa. Mahi inkha ankho likondoka keumbo tyihena ondyakulilo, ankho likunda. Omuhipululi wo Loma ankho utiwa Tacitus, wati: “Okuvombesa ondyakulilo ankho otyipuka tyikundisa unene.” Otyo omafualali ankho akuatela nawa onondyakulilo mbavo.

19. Oñgeni tupondola okukuata nawa ondyakulilo yetu?

¹⁹ Oñgeni tulekesa okuti tuakuata nawa ondyakulilo yetu? Oputyina tuenda apeho komaliongiyo, na tyina tupopila vakuetu konthele ya Siovaa, Nouhamba wae. (Heb. 10:23-25) Tupu oputyina tutanga Ombimbiliya ononthiki ambuho, nokulikuambela opo Siovaa etukuateseko okuendela muetyi tuelilongesa. (2 Tim. 3:16, 17) Inkha tulinga ovipuka ovio, petupu otyipuka natyike Satanasi apondola okulinga opo etuyapule. (Isa. 54:17) “Ondyakulilo onene yekolelo” lietu maituyakulila. Onthue matutualako tyapama iya matutualako okuundapa novakuatate vetu no nomphange. Tupu matufindi ovilwa tuna ononthiki mbatyo ambuho. Iya tyakolela vali, matuyakulilwa na Sesusi tyina amafindi Satanasi novanthu vae. — Ehol. 17:14; 20:10.