OKUTI ANKHO UTYII-ALE?

Otyilinga patyi onkhalamutwe yovaundapi vomeumbo ankho ena?

KOHALE, onkhalamutwe yovaundapi (ine omutumini womalumono omuhona wae) ankho uyunga ondyuo novipuka ovikuavo viomuhona wae. Mo Hebeleu no mo Geleku, onondaka “onkhalamutwe yovaundapi” pamwe mbupopia onkhalamutwe yeumbo.

Omona wa Sakoo, Suse, ankho omupika ko Isitu. Mahi konyima akala onkhalamutwe yovaundapi va Potifar. Alo umwe Ombimbiliya ipopia okuti “Potifar wavelele Suse otyilinga tyokuyunga nawa ovipuka aviho ankho ena.” (Gên. 39:2-6) Konyima, etyi Suse akala Omutumini ko Isitu, nae ataindya onkhalamutwe yovaundapi vae. — Gên. 44:4.

Pononthiki mba Sesusi, ovanthu ankho vakala kokule nomapia avo. Mokonda yotyo, ankho vataindya omuundapi omukuatyili opo akale onkhalamutwe yovaundapi iya aonganeka ovilinga momapia.

Mahi olie ankho upondola okulinga otyilinga otyo? Omuhoneki umwe wo Loma ankho utiwa Columela, wapopia okuti omupika wokuafuapo opo alinge otyilinga otyo, oyouna “utyivila okufuisapo nawa ovilinga viae.” Kapondola okukala omunthu ‘uhesukile novilinga iya ulinga vakuavo onya.’ Ayawisako okuti: “Haunene ankho kapondola okusoka okuti utyivila okulinga ovipuka aviho. Mahi ankho una okukala tyafuapo pala okulilongesa ovipuka ovipe.”

Ombimbiliya yeeleka ovilinga ankho vilingwa nonkhalamutwe yovaundapi, novipuka vimwe vilingwa meongano lya Siovaa. Mongeleka, apositolu Petulu wapopila Ovakilisitau opo vaundapese ounongo vapewa na Huku pala “[okuundapela] vakuavo, ngomuundapi ukahi nawa wokankhenda okanene ka Huku.” — 1 Pet. 4:10.

Momukanda wa Luka 16:1-8, Sesusi wapopile ongeleka yonkhalamutwe yovaundapi. Tupu, etyi apopia konthele yovipuka mavilekesa okuti ukahi nokutumina, Sesusi wapopilile ovalongwa vae okuti ankho maholovona “omupika omukuatyili nokualunguka” ine “onkhalamutwe yovaundapi vomeumbo.” Iya otyilinga tyomupika oo, okuavela ovalanduli va Kilisitu okulia kupameka oupanga wavo na Huku. (Mat. 24:45-47; Luka 12:42, okatoi) Tupandula unene mokonda no onthue tutambula omikanda vipameka ekolelo lietu, viawa mouye auho nonkhalamutwe yovaundapi vomeumbo, ine omupika omukuatyili nokualunguka.