“Ivisa Onondaka Onongwa Mbouhamba wa Huku”
1. Onondaka patyi onongwa tuna okuivisa?
1 Mouye muno muhena onondaka onongwa, onthue tuna elao ‘liokuivisa onondaka onongwa mbo kankhenda ka Huku tuahatokalele.’ (Atos 20:24) Otyo, tyakutikinya okupopila ovanthu vanoñgonoke okuti apa katutu ‘ononthiki mbahulila’ mambukapingwa nouye omupe wa Jeova, muna muhakakala vali ovipuka ovivi. (2 Tim. 3:1-5; Revelação [Apocalipse] 21:4) Kononthiki mbatyo ombo, kamakukakala vali omauvela. (Isa. 33:24) Vana tuhole vokuankhia mavakatutiliswa, avakakala vali kumue no nombunga mbavo nomapanga avo. (João 5:28, 29) Oohi aiho maikakala omphangu imue ongwa yombembwa. (Isa. 65:21-23) Ombu onongeleka mbumue vala mbehehi mbonondaka onongwa tuna okuivisa!
2. Omokonda yatyi omuwo Wehinangelo Liononkhia mba Tatekulu wavela onomphitilo onongwa mbokuivisa onondaka onongwa Mbouhamba wa Huku?
2 Ohanyi ya Tyitalale na Tyikukutu na Kapepo, mambuketuavela onomphitilo onongwa mbokuivisa onondaka onongwa Mbouhamba wa Huku. Kovilongo ovinyingi, monohanyi ombo ovitenya vikala vali ovile iya omuvo ukala omuwa pala okuundapa vali unene movilinga viokuivisa. Tupu, onthiki yakolela vali menima, Ehinangelo lia Tatekulu malilingwa mo Tyasapalo monthiki 22 ya Tyitalale tyina ekumbi liamanyingila. Pahe ou omuwo wokulifuisapo opo tuyawise ovilinga vietu.
3. Oityi matyikuatesako ombunga yetu okuyawisa ovilinga viokuivisa?
3 Ovakokoli-ndyila Vapola Pokati: Okuti upondola okulipongiya opo ukale omukokoli-ndyila wapola pokati mohanyi ike, onombali, ine ambuho ononthatu? Omokonda yatyi muhapopila konthele yovilinga ovio tyina mulilongesa Ombimbiliya nombunga yove? Inkha mulipongiya nawa, wike ine vamue mombunga vapondola okukala ovakokoli-ndyila vapola pokati. (Prov. 15:22) Likuambelei ku Jeova konthele yotyo, opo Jeova emukuateseko mononkhono mamulingi. (Prov. 16:3) Hamue nawike mombunga upondola okukala omukokoli-ndyila wapola pokati. Mahi, aveho mombunga vapondola okutokola okuyawisa vali ovilinga viavo viokuivisa. Vapondola alo umue okuundapa na vana vekahiale movilinga ovio vioukokoli-ndyila.
4. Inkha tuundapa ononthiki ambuho kukaputu, oityi tuesukisa okulinga opo tukale ovakokoli-ndyila vapola pokati?
4 Namphila ove uundapa movilinga via kaputu ononthiki ambuho, upondola okulinga oprograma ongwa maikukuatesako okukala omukokoli-ndyila wapola pokati. Po noola mbokukalia komutenya, upondola okukaivisapo katutu. Inkha uhanda upondola okupewa omaumbo apa moivisa popepi neumbo liove ine povilinga viove. Otyo, matyikuvatela okuivisa ovola ike tyina wehenende kovilinga na tyina utundako. Tupu, upondola okukala vali nomuvo wokuivisa, inkha uyekapo okulinga ovipuka viahasukisile unene, opo utyivile okuivisa onthiki aiho yo Tyasapalo no Tyalumingu. Vamue vapola onofelia onthiki ike ine onombali kovilinga viavo, opo vaundape movilinga viokuivisa.
5. Oñgeni ove upondola okukuatesako vokuakulupa ine vana vavela opo vakale ovakokoli-ndila vapola pokati?
5 Inkha ove wakulupa ine uvela ine una otyitateka otyikuavo molutu, upondola okukala omukokoli-ndyila wapola pokati, okuivisa vala katutu kese nthiki. Ita ku Jeova ekupe ‘ononkhono mbae ononene.’ (2 Cor. 4:7) Omphange umue ankho wokuna omanima 106, wetyivila okukala omukokoli-ndyila wapola pokati! Mokonda yombatelo yombunga yae Ovakristau, navakuavo mewaneno, ankho wivisa umbo na umbo, nokukondoka okutalelapo vana vahanda okutehelela vali, nokuvelongesa Ombimbiliya, novilinga ovikuavo vali. Oe, welilongesa Ombimbiliya novanthu 10. Omphange oo, wati: “Tyina ndyisoka kelao liokuundapa movilinga vioukokoli-ndyila, omutima wange uyula ohole nolupandu na Jeova, no Mona wae, neongano Liae liokuna oluembia. Tyotyili ame ndyipopia okuti ‘napandula Jeova!”
6. Oityi tyipondola okuvatela ovana vambatisalwa vekahi mosikola, okukala ovakokoli-ndyila vapola pokati?
6 Inkha umukuendye ine omuhikuena wambatisalua ukahi nkhele mosikola, no ove upondola okukala omukokoli-ndyila wapola pokati. Nga vana vaundapa ononthiki ambuho kukaputu, no ove tete nkhele upondola okuivisa Tyasapalo no Tyalumingu. Tupu, mononthiki mbumue, upondola okuivisa ovola ike tyina wenda kosikola ine o pokukondoka. Okuti upondola okukaivisa mononthiki mbovipito viouye wahaende kosikola? Inkha uhanda okukala omukokoli-ndyila wapola pokati, tyipopila ovo ho.
7. Oityi ovakulu vewaneno vena okulinga opo valandule ovaivisi mokueenda kuomuvo wehinagelo lia Tatekulu?
7 Kala Ondyandyi: Ovakulu vewaneno vena okuundapa unene movilinga viokuivisa, opo valunde ovaivisi. (1 Ped. 5:2, 3) Tupu, vesukisa okuonganeka omaliongiyo ovilinga viokuivisa mokati kosimano, pala vana vahanda okuivisa komuhuka no kekumbi tyina vatunda kosikola ine kovilinga. Omukulu wovilinga viewaneno wesukisa okuholovona ovaivisi vafuapo, pala okuendesa eliongiyo liovilinga viomepia. Wesukisa okunoñgonoka inkha pena omaumbo atuuka apa mavakaivisa, nomikanda vituuka pala onohanyi ombo ononthatu mbovilinga viavilapo.
8. Oityi tupondola okulilongesila kongeleka yewaneno limue?
8 Mewaneno limue, ovakulu vewaneno vahimbika okulunda ovaivisi opo vakale ovakokoli-ndyila vapola pokati, etyi ankho nkhele kuakamba onohanyi ononyingi. Vatualako okupopila aveho kese simano, etyi ovaivisi vesukisa okulinga opo ovanyingi vetyivile okukala ovakokoli-ndyila vapola pokati. Moluotyo, vana ankho vahanda okuyawisa ovilinga viavo viokuivisa, vanoñgonoka okuti mavakala nombatelo ongwa. Ovakulu vaonganeka omaliongiyo okutunda movilinga viokuivisa mokati kosimano, komuhuka no kokangulohi. Moluotyo, ovaivisi 53 avakala ovakokoli-ndyila vapola pokati mohanyi ya Tyikukutu!
9. Omokonda yatyi Ehinangelo Liononkhia mba Tatekulu omuvo omuwa pala vana vafuapo vahimbike okuivisa?
9 Kuatesako Vakuenyi Okuivisa: Tyina ovakuendye novahikuena vakala tyafuapo opo vahimbike okuivisa, vakongwa opo vatunde novaivisi venale ounongo movilinga ovio. Otyo, tyipondola okulingwa mokueenda kuomuvo Wehinangelo lia Tatekulu, tyina ovanyingi mewaneno mavayawisa ovilinga viavo viokuivisa. Okuti ove una omulongwa Wombimbiliya ukahi nokuendesila omuenyo wae movitumino viaviuka via Jeova? Okuti ove una ovana vena ovituwa oviwa vekahi nokukula mopaspilitu, mahi nkhele kavenekale ovaivisi? Inkha vamue vahanda okukala ovaivisi vehenembatisalwe, ngue ove wamona okuti vafuapo, popia nomukulu umue weuaneno. Omukulu weuaneno ukahi komutue, mapopi novakulu vevali opo vatomphole nove kumue nomona wove ine omulongwa wove.
10. Oityi ovakulu vewaneno vapondola okulinga opo vakuateseko vana vayekapo okuivisa?
10 Tupu, onohanyi ombo onongwa pala vana vayekelepo okuivisa opo vahimbike vali ovilinga viavo mewaneno. Ovaendesi Velongeso Liomukanda Mewaneno novakulu ovakuavo vewaneno, vesukisa okulinga ononkhono mbokutalelapo ovaivisi ovo, nokuvekonga opo vaundape navo movilinga viokuivisa. Inkha vayekapo okuivisa omuvo omunyingi, ovakulu vevali vewaneno vesukisa okutomphola navo opo vatale inkha nkhele vafuapo.—km 11/00 p. 3.
11. Olipi elekeso enene “liokankhenda ka Huku tuahatokalele?
11 Lipongiya pala Ehinangelo lia Tatekulu: Ofeto Yeyovo elekeso enene “liokankhenda ka Huku tuahatokalele.” (Atos 20:24) Ovanthu ovanyingi vokuna olupandu mouye auho, maveliongiya mo Tyasapalo, mu 22 ya Tyitalale tyina ekumbi liamanyingila, pala Okuhinangela ononkhia mba Kristu. Tukongei nokukuatesako aveho vomutima omuwa opo veye kehinangelo olio liakolela unene, lilekesa nawa okankhenda ka Jeova ovanthu vahatokalele.
12. Ovalie tuesukisa okukonga pala Ehinangelo lia Tatekulu?
12 Honeka omanyina ovanthu aveho uhanda okukonga. Pomanyina opo mokutikinyapo ombunga, nomunthele, nomapanga muundapa navo ine mulongeswa navo kosikola, na vana welilongesile navo Ombimbiliya kohale nava ulilongesa navo pahetyino, na vakuavo vali utalailapo apeho. Inkha puvana wakonga vamue vena omapulo konthele Yehinangelo lia Tatekulu, vekuatesako no apendise yomukanda Ombimbiliya Ilongesa pomafo 206-8 posapi yati, Ondalelo ya Tatekulu. Otyo tyipondola alo umue okuikula ondyila yokuhimbika okulilongesa Ombimbiliya nomunthu oo. Mokonda matyikupe omphitilo yokuava omukanda tulilongesa novanthu Ombimbiliya.
13. Oñgeni Jeova akuatesako ovaivisi vevali ankho vahanda okukonga ovanthu pala Ehinangelo lia Tatekulu?
13 Omphange umue wahoneka omanyina onombunga 48 ankho ahanda okukonga. Tyina akonga kese mbunga upaka enyingilikilo penyina liavo nokuhoneka onthiki evekonga. Omphange oo ahambukwa unene etyi 26 ponombunga mbuna akonga veya Kehinangelo Liononkhia mba Tatekulu! Omukuatate umue wokuna ovenda, wakonga omulume umue umuundapela ankho wali elombe kohale. Omulume eya Kehinagelo lia Tatekulu, konyima apopi no kuahuva okuti: “Moola ike nanoñgonoka ovipuka ovinyingi konthele Yombimbiliya tyipona omanima 30 nakala mo Katolika.” Konyima Yehinagelo lia Tatekulu etavela okulilongesa momukanda Ombimbiliya Ilongesa.
14. Ovilinga patyi mavilingwa ouye auho okuhimbikila monthiki 1 ya Tyitalale?
14 Ovilinga Viokukonga: Okuhimbikila mo Tyasapalo, 1 ya Tyitalale alo 22 ya Tyitalale, makuyandyaneswa okamukanda kakolela unene kokukonga ovanthu pala Ehinangelo lia Tatekulu mouye auho. Ovaivisi aveho vesukisa okuundapa unene movilinga ovio viakolela unene. Otyiwa okamukanda oko okukeavela ovanthu, tyipona okukepaka mombuelo yepito. Anthi, inkha omaumbo wapeua pala okuivisa omanyingi unene, ovakulu vewaneno mavatale inkha tyitavela nounongo okusapo oumukanda umue mombuelo yomapito. Mo Tyasapalo no Tyalumingu tupu matuave Omutala Womulavi no Despertai yohanyi oyo.
15. Oñgeni matuave okamukanda kokukonga ovanthu pala Ehinangelo lia Tatekulu?
15 Mokonda omuvo tuna pala okuava okamukanda oko kauhi, otyiwa tyina tupopia novanthu atuhasete. Kala ondyandyi nokuhole ovanthu. Upondola okupopia vala okuti: “Tukahi nokukonga ove, nombunga yove, nomapanga ove pala eliongiyo limue liakolela unene malilingwa monthiki 22 ya Tyitalale. Okamukanda kove okaka. Atyiho tyesukisa tyahonekwa mokamukanda aka.” Pamue omunthu una omapulo amue. Ine hamue wetavela iya eya Kehinangelo olio. Noñgonoka nawa vana valekesa esuko, okondoka okukevetalelapo.
16. Ongeleka patyi ongwa ilekesa okuti ovilinga viokukonga ovanthu pala Ehinangelo lia Tatekulu viakolela?
16 Enima liokualamba etolopa limue wavasa okamukanda oko pombuelo yepito liae. Atokola okuenda Kehinangelo olio, mahi ankho wesukisa okuita komutumini wae. Etyi amona okamukanda oko peke liomutumini wae, omutumini oo nkhele atundu filuu, konyima emupopila okuti ombunga yae Onombangi mba Jeova. Iya pamue uhole okuenda navo komaliongiyo avo. Konyima omutumini wae kemuyekele vala okuenda aike, mahi avaende aveho Kehinangelo olio lia Tatekulu!
17. Oñgeni matulekesa okuti katuatombele okankhenda ka Huku tuahatokalele?
17 Lekesa Okuti Una Olupandu: Putyina omuvo Wehinangelo lia Tatekulu lio 2008 ukahi nokuhikapo, kese umue puonthue wesukisa okusokolola nawa kokankhenda tuahatokalele Jeova etulekesa. Apostolu Paulu wahoneka okuti: ‘Tupu onthue tumuita okuti muehetavelei vala okankhenda ka Huku tuahatokalele, iya konyima amuketombo.’ (2 Cor. 6:1) Oñgeni matulekesa okuti katuatombele okankhenda ka Huku tuahatokalele? Tupu Paulu wahoneka okuti: ‘Anthi, mononkhalelo ambuho tulekesei okuti tuvaumbili va Huku.’ (2 Cor. 6:4) Ngotyo, matulekesa okuti tuapanda etyi Jeova etuavela, mokukala novituwa oviwa, nokuivisa nombili onondaka onongwa. Pomuvo Wehinangelo lia Tatekulu matukala nomphitilo yokuyawisa vali unene ovilinga vietu viokuivisa kovanthu aveho onondaka onongwa.
[Kakasa pefo 3]
Ovalie Vesukisa Okukutikinyua Puvana Vapondola Okukala Ovakokoli-ndyila Vapola Pokati?
◼ Onombunga
◼ Vana vaundapa ononthiki ambuho kukaputu
◼ Vana vavela no vokwakulupa
◼ Vana vekahi mosikola
[Kakasa pefo 4]
Tyina Wava Oumukanda Wokukonga ovanthu:
◼ Wahasete; popia noundyandyi
◼ Honeka omanyina avana vahanda okutalelwapo
◼ Tyasapalo no Tyalumingu ava Omutala Womulavi no Despertai