Yawisa Ounongo Wove Movilinga Viokuivisa
1 Tate yetu keulu uhambukwa unene tyina ovaumbili vae vekula mopaspilitu. Otyo tyakutikinya okukala omunongo movilinga viokuivisa onondaka onongwa. Apostolu Paulu waavelele ondundo omukulu weuaneno Timoteo, atualeko okutanga nokulongesa opo aveho vetyimone okuti wekula mopaspilitu. (1 Tim. 4:13-15) Onthue atuho tuesukisa okuovola okuyawisa ounongo wetu movilinga viokuivisa, namphila tuivisale omanima omanyingi.
2 Tokola Etyi Ove Molingi: Opo utualeko okuyawisa ounongo wove movilinga viokuivisa, wesukisa tete okutokola etyi ove uhanda okulinga. Oityi onthue muene tupondola okutokola okulinga? Tupondola okuovola okukala vali ovanongo kokuundapesa Ombimbiliya, omutunga wetu wopaspilitu. (Efé. 6:17) Hamue, pena onthele imue movilinga viokuivisa tuesukisa okuundapa vali nawa, ngokuivisila momatapalo, notelefone, ine oponopalasa nomonovenda. Hamue tupondola okulinga ononkhono opo tukale vali ovanongo kokukatalelapo ovanthu vokuesuka. Tupu tupondola okuovola okuyawisa ounongo wetu wokuhimbika okulongesa ovanthu Ombimbiliya.
3 Ombatelo Tuna: Omaliongiyo omewaneno, haunene Osikola Yovilinga Via Huku, Neliongiyo Liovilinga, alingwa pala okutukuatesako okukala ovanongo movilinga viokuivisa. Tyina tulinga ononkhono pala okulipongiya, nokuenda komaliongiyo oo, nokuundapesa onondonga tupewa, tyotyili matupoloko esilivilo enene.—2 Cor. 9:6.
4 Tupu tuesukisa okulikuatesako pokati opo tuyawise ounongo wetu movilinga viokuivisa. (Prov. 27:17) Okutehelela nawa tyina vana tuundapa navo movilinga viokuivisa vatomphola novanthu, matyitukuatesako okukala vali ovanongo movilinga ovio. Tupu, omukulu wokuendesa elilongeso liomukanda mewaneno, hamue upondola okuholovona omukuatate umue opo etukuateseko. Tyotyili, okuundapa nomukokoli-ndyila ine omuivisi omukuavo omunongo, tyitukuatesako okukala vali ovanongo, nehambu enene movilinga viokuivisa! Okuti muna omuivisi umue omupe melilongeso lietu liomukanda mewaneno? Hamue tupondola okumukonga opo aundape nonthue movilinga viokuivisa.
5 Ovilinga viakolela vali vikahi nokulingwa hono Novakristau, ovilinga viokuivisa. Tulingei ononkhono opo tuavele Jeova “otyilikutila tyetu tyehiviliko.” (Heb. 13:15) Inkha tulinga ononkhono pala okuyawisa ounongo wetu movilinga viokuivisa, matukala ovanthu vokuundapa ‘tyihena ohonyi, okuundapesa nawa ondaka yotyili.’—2 Tim. 2:15.