Omuvo Umue Wehambu Nokulia Kuopaspilitu
1. Oñgeni Jeova atekula nawa mopaspilitu ovaumbili vae?
1 Jeova utekula noluembia mopaspilitu ovaumbili vae. Putyina ovanthu ovanyingi mouye vena ondyala onene yopaspilitu, onthue tuna atyiho tuesukisa pala okulitekula mopaspilitu. (Isa. 65:13) Onkhalelo imue Jeova etuavela okulia kuopaspilitu, omono kongelesu mbetu mbo distritu mbulingwa kese enima. Ukahi nokulipongiya opo wende ononthiki ambuho ononthatu mbo Kongelesu yo Distritu ina osapi yati, “Hongolelwa Nospilitu ya Huku?” Kukahi nokupongiyua okulia kumue kuopaspilitu kuapepa nawa.
2. Oityi tuesukisa okulinga opo tulipongiye pala okongelesu?
2 Himbika Okulipongiya: Omunthu wokulipongiya nombili utyivila okulinga ovipuka viaviuka. (Pro. 21:5) Anthi, tyina pahe wamelipongiya opo ukale po kongelesu ononthiki ambuho ononthatu, ita pahetyino komuhona wove ekuavele ononthiki mbumue pala okuenda ko kongelesu. Inkha wesukisa ondyuo apa mokakala, okuti waitale? Ovaivisi ovanyingi, kavesukisile okuita kovakulu vewaneno mokonda mavakakala meumbo lio nombunga mbavo ine omapanga. Mahi nongotyo, wesukisa okutolela ombunga yove ine epanga okuti mokakala meumbo liavo mokueenda kuononthiki ononthatu mbo kongelesu, opo ulekese okuti una onthilo navo. Ovanyingi vokuesukisa okulinga oungendi pala okuenda ko kongelesu, vahimbika liwa okupaka onombongo pala oungendi wavo. Tupu wesukisa okutaindya okulia opo ukalie novakuatate vove ko kongelesu. Linga ononkhono opo uhike ononthiki ambuho po kongelesu tyina nkhele yehenehimbike, opo uvase ovipundi, nokuimba otyiimbo tyokuhimbika nokutehelea elikuambelo liokuhimbika.
3. Tuesukisa okuvala ovikutu patyi?
3 Tuesukisa okutala nawa ovikutu matuvale inkha viaviuka nokuefiwa nawa. (1 Tim. 2:9, 10) Ono kongelesu mbo Distritu mbutuavela omphitilo ongwa opo tuavele oumbangi ovanthu vopotyilongo. Okuvala monkhalelo imue yaviuka tyina tukahi mepundaumbo mukahi nokulingilwa o kongelesu, nokuvala ovikalatau vio kongelesu, matukala tyelikalela nouye, nokuava oumbangi omuwa kovanthu vana vetutala.
4. Oityi matyikuatesako onthue muene, no nombunga mbetu okupola esilivilo enene kuetyi tyikahi nokupopiwa mo kongelesu?
4 Tehelela Nawa: Tyotyili, onthue katuhande okupumbwa natyike matyipopiwa mo kongelesu oyo! (Prov. 22:17, 18) Okulandula mono Mbimbiliya mbetu onotestu mambutangwa, nokuhoneka onondaka mbehehi tuesukisa, matyitukuatesako okutehelela nawa mo kongelesu atulityilika okukala tyatalukwa. Iya kokangulohi, tupondola okupopia navakuetu konthele yetyi tuahoneka mokueenda kuo programa. Omanima okualamba tuhole okumona okuti ovakuendye vamue vaumphama novakuendye vakuavo mo kongelesu iya mokueenda kuo programa vatomphola ine okunyana nono telefone okuhonekela vakuavo. Ovakuavo vakala nokutomphola ehimbwe konondyuo mbokutalamena, avapumbwa elongeso enyingi liopaspilitu. Inkha tuna ovana, namphila ovakuendye vekulale, otyiwa okuumphama kumue navo opo ombunga aiho itehelele nawa etyi tyikahi nokupopiwa mo kongelesu, tyipona okuveyeka vakapumphame novakuendye vakuavo.
5. Oñgeni tupondola okuyawisa ehambu lietu mo kongelesu?
5 Okukala Noupanga Omuwa: Okulia kupepa vali nawa tyina tulia nomapanga. (Pro. 15:17) Tupu, okukala kumue novakuatate vetu nonomphange tyiyawisa ehambu lietu mo kongelesu. Putyina nkhele o kongelesu yehenehimbike, otyiwa okukukuinya vakuetu nokupopia enyina lietu, opo tukale noupanga omuwa! (Sal. 133:1) Tyina omuhongoli wo kongelesu etuita tukapumphame opo tutehelele otyiimbo tyokuhimbika matyihiki, tuesukisa okuyekapo etompho iya atukapumphama opo tutehelele o kongelesu maihimbika.
6. Hipululapo ongeleka imue ove wapita nayo ilekesa oñgeni tupondola okuava oumbangi ovanthu mepundaumbo lio kongelesu.
6 Undapesa Onomphitilo Ambuho pala Okuava Oumbangi: Ono kongelesu apeho mbutuavela onomphitilo onongwa pala okuava oumbangi. Ovanyingi vokuendela momatuku-tuku akaputu tyina vaya ko kongelesu na tyina vakondoka, vehole okupulwa novaendesi ine ovakuavo vaendelamo konthele yosapi ikahi povikalatau viavo. Otyo tyihole okutuala ketompho, nokuavela oumbangi umue omuwa konthele yotyili. Vamue vokuapula, avakongwa opo vakatehelele onthele imue mo kongelesu iya avaende.
7. Omokonda yatyi tuesukisa okukala po kongelesu yo distritu ikahi nokuhika?
7 Kuhole okupeselwa ono oola ononyingi pala okupongiya o kongelesu, okutaindya omphangu apa mapakalingilwa okongelesu, nokuonganeka ono seketa mo kongelesu, nokupongiya omalongomona. Ononkhono ambuho ononene mbukahi nokulingwa pala okupongiya okulia oku kuopaspilitu, tyilekesa okuti Jeova una ohole onene novanthu vae. Atuho tukaleipo, nokutehelela nawa mo kongelesu oyo! Tyokuelikalela nouye, onthue ‘matukakuiilila nehambu mokonda yonkhalelo ongwa yomutima.’—Isa. 65:14.
[Okakasa pefo 4]
Omahinangeleso o Kongelesu yo Distritu
◼ Oola o Kongelesu Maihimbika: Mononthiki ambuho ononthatu okongelesu maihimbika 8h20. Omapito maaikulwa 7h30. Putyina otyisungo tyamahimbika okuhika, atuho tuna okuenda ponomphangu mbetu, opo okongelesu ihimbike monkhalelo yaongana. Mutano, no Tyasapalo okongelesu maimanuhuka 15h55 iya Tyalumingu imanuhuka 15h00.
◼ Apa Patalamena Omatuku-tuku: Ponomphangu ambuho mapatalamena omatuku-tuku avana maveya ko kongelesu kambufetelwa, mahi omatuku-tuku ena okukalela omu ehikila. Inkha wavasale etuku-tuku liamukuenyi, liove lina okukalela ponthele ine konyima. Ovikalatau vio kongelesu, ovio mavikulekesa oñgeni motalameka etuku-tuku liove. Mokonda pamue omphangu yokutalamena omatukutuku onthutu, inkha tyitavela ovanthu ovakuavo vapondola okuendela metukutuku lietu opo pahakale omatukutuku omanyingi.
◼ Okupakela Vakuetu Onomphangu: Tupondola vala okupakela onomphangu ovanthu vana tuendela navo metuku-tuku like ine ovovana tukala navo meumbo like.
◼ Okulia: Mbambavo etelelela okulia kuove, opo uhatunde pomphangu yo kongelesu pala okukalanda okulia mokueenda kuomuvo wokupululukuapo. Upondola okutyinda okulia kuove mosako onthutu itavela okupaka mombuelo yotyipundi tyove. Onosako ononene, novipuka viokuteka, novikunwa vikoleswa, kavipondola okutualwa pomphangu yo kongelesu.
◼ Oviawa Viotyali: Tupondola okulekesa olupandu luetu mokuava onombongo pala okuvatela Ovilinga via Huku mouye auho, tyilinge mondyuo yomaliongiyo ine omo kongelesu.
◼ Vana Vatumbukilwa Nouvela ine Veliveta: Inkha mo kongelesu umue utumbukilwa nouvela, akapopie nomukuatate umue wokulekesa ovanthu kovipundi. Omukuatate oo, akapopila liwa Oseketa yokuvatela vana vavela, opo ovakuatate vokuundapa moseketa oyo veye okumuvatela.
◼ Outuku-tuku Wokutyinda Ovana: Katupondola okutuala outuku-tuku oo pomphangu yo kongelesu. Opo mutyivile okuyunga vali nawa ovana venyi, vaumphame ponthele yenyi.
◼ Omuniko: Ono kongelesu ononyingi mbuhole okulingilwa monondyuo mbaikwa iya opo mufile omphepo mupakwa ovifilamphepo (ventoinha) ine muna vala oundyanena oututu. Moluotyo, otyiwa okuhawave omilela vinika unene, no noperfume mbupondola okulinga omapita vana vavela monthulu, navakuavo vokuna ovitateka konthele yovipuka ovio.—1 Cor. 10:24.
◼ Ono formulariu Queira visitar: Tuna okuundapesa o formulariu Queira Visitar (S-43-T) pala okupopia konthele ya kese munthu tuaavela oumbangi mokuenda kuo kongeleso, iya alekesa esuko notyili. Ovaivisi vena okutyinda o formulariu ike ine onombali tyina vaya ko kongelesu. Inkha tuahoneka pomikanda ovio, tupondola okuviavela ovakuatate vaundapa mo Seketa Yomikanda, ine okukeviavela omuhoneki weuaneno liove tyina wamatundu ko kongelesu.—Tala mo Nosso Ministério do Reino ya Abril yo 2006, pefo 8.
◼ Ono Telefone: Onthue tuenda ko kongelesu pala okufenda Jeova, nokulongeswa nae. Ombili tuna nomaliongiyo oo, ñgeno itulunda opo tuiike ono telefone pala mbuhetutalule, tupu atuahatalula vakuetu. Inkha katuhande okuika otelefone, ipaka movibração opo ihatalule ovanthu tyina yamahimbika okuihana.—1 Cor. 10:24.
◼ Okuavununa Omukanda Omupe: Apeho kulingwa ononkhono opo aveho vekahi po kongelesu vatambule omikanda omipe. Tuakuhambukwa unene mokonda onue vakuatate muhole okulionganeka nawa pala okutambula omikanda omipe tupewa mono kongelesu, mokuenda kuomanima okualamba. Putyina tupewa omikanda omipe tuesukisa apeho okulekesa ohole novakuatete vetu, noumphwa lundo, nokuhumba vakuetu.— Rom. 12:10.