Okulipongiya Nawa Tyina Tukatalelapo Ovanthu, Tyakolela
1. Oñgeni ovilinga viokuivisa ankho vina okuyandyaneswa?
1 Jesus walongesile nawa ovalongwa vae, opo vakale ovanongo movilinga viokuivisa “onondaka onongwa Mbouhamba.” (Mat. 4:23; 9:35) Jesus walongesa ovalongwa vae etyi ankho vekahi nokuivisila ko Palestina. Moluotyo, etyi Jesus nkhele eheneende keulu, wapopile okuti ovilinga viokuivisa ankho vina okuyandyaneswa pala ‘okulongesa ovanthu movilongo aviho opo vakale ovalongwa.’—Mat. 28:19, 20.
2. Okutavela otyitumino tya Jesus tyokulinga ovalongwa, muakutikinya tyi?
2 Ovilinga ovio, viakutikinya okukatalelapo ovanthu vana vokualekesa esuko monondaka onongwa Mbouhamba wa Huku, nokuvelongesa ovipuka aviho Kristu atuma. Opo tukale nounongo wokukatalelapo ovanthu ovo, tuesukisa okulipongiya nawa.
3. Tyina wamamane okupopia nomunthu otyikando tyotete, oityi una okulinga?
3 Soka Tete Etyi Mokapopia: Ovaivisi vamue, tyina vamamane okutomphola valinga epulo, iya avalae okukondoka onthiki onkhuavo opo vakumbulule epulo olio. Ovo vatala okuti okupopia etyi tyikahi momukanda Ombimbiliya Ilongesa, tyina vakatalelapo ovanthu, tyivekuatesako okuhimbika liwa okulongesa ovanthu Ombimbiliya.
4. Omokonda yatyi katupondola okuseta okukatalelapo ovanthu?
4 Mokonda tutambula vala omikanda vimue Viomutala Womulavi kese hanyi, otyo katyilekesa okuti opo tukatalelepo omunthu tuna okukevelela alo tutambula omikanda omikuavo. Tupondola okukuatesako ovanthu opo vayawise vali esuko liavo liokulilongesa Ombimbiliya, mokutomphola konthele yetyi tyikahi momukanda tuemuavela.
5. Oityi ove una okusoka tyina ukatalelapo omunthu?
5 Soka Omokonda Yatyi Mokatalelapo Omunthu: Tyina nkhele uheneende okukatalelapo omunthu, pitulula etyi wapopile nae otyikando tyotete iya otokola oityi ove uhanda okukalinga. Mongeleka, popia nae konthele yetyi tyikahi momukanda wemuavelele. Ine okumuavela omukanda umue upopia konthele yetyi muapopile. Inkha otyikando tyotete wasilepo epulo, ove tyotyili mokumbulula epulo olio. Linga ononkhono pala okutanga Mombimbiliya otestu yelikuata netyi mukahi nokupopia.
6. Olipi ehando lietu tyina tukatalelapo omunthu?
6 Olipi Ehando Lietu: Tyotyili ehando lietu okuhimbika okulongesa ovanthu Ombimbiliya. Omukuatate umue etyi akatalelapo omulume umue, wahandele okuhimbika okumulongesa Ombimbiliya, mahi omulume ehetavela. Omukuatate akondoka nomikanda omipe, iya apopi okuti: “Hono onthue tukahi pano pala okukumbulula epulo limue Liombimbiliya ovanthu vehole okulinga.” Etyi omulume akumbulula, omukuatate atange otestu iya avandula po palagrafu momukanda ukahi nokuundapeswa pala okulongesa ovanthu Ombimbiliya. Otyo atyituala omunthu okuhimbika okulongesa Ombimbiliya.
7. Oñgeni okulipongiya nawa matyikukuatesako okuhimbika okulongesa ovanthu Ombimbiliya?
7 Okulinga ononkhono pala okulipongiya opo tukatalelepo ovanthu, tyieta ouwa. Ehambu lietu maliliyawisa, iya onthue matukala nelao liokukuatesako “vana vokuhanda omuenyo” opo vaendele mondyila yomuenyo.—Atos 13:48.