Onthue Tuna Omalumono Akolela Pala Okuava
1 Ondaka ya Huku ina omalongeso omanyingi akolela. (Sal. 12:6; 119:11, 14) Nthiki imue, Jesus waundapesile onongeleka pala okupopia ononthele mbelikalela Mbouhamba, iya apulu ovalongwa vae okuti: “Muanoñgonoka nawa ovipuka evi?” Etyi vapopia okuti vanoñgonoka atyiho, Jesus evepopila okuti: “Inkha ongotyo, kese omulongesi tyina amalongeswa konthele youhamba wo keulu, welifua namuene weumbo upola kolumono luae ovipuka ovipe, novikulu.”—Mat. 13:1-52.
2 Otyili tuelilongesa etyi tete tuahimbika okulilongesa Ombimbiliya, tupondola okutyitala ngatyina omalumono omakulu. Putyina tutualako okulilongesa ovipuka vio Ndaka ya Huku viokuaya kohi, tuvasa otyili tyo Mbimbiliya tyikahi ngatyina omalumono omape. (1 Cor. 2:7) Tupu, “omupika wekolelo nokualunguka,” utukuatesako okunoñgonoka ovipuka ovipe.—Mat. 24:45.
3 Onthue tupanda unene omalumono opaspilitu, omakulu, nomape. Otyo tyituavela ondundo yokuovola okulilongesa, nokukala ovanongo movilinga viokulongesa ondaka ya Huku, okulongesa vakuetu noluembia otyili onthue tuelilongesa.
4 Lilongesila Kongeleka ya Jesus: Pala okulekesa oñgeni ankho elitehelela konthele yomalumono oo, Jesus walingile ononkhono ononene pala okulongesa vakuavo. Natyina aponua, ankho kayekepo okupopila vakuavo konthele yomalumono.—João 4:6-14.
5 Ohole Jesus ankho ena navana vahanda okunoñgonoka otyili konthele ya Huku, yemuavelele ondundo yokuvepopila konthele yotyili tya Huku tyiavela omuenyo. (Sal. 72:13) Oe ankho una okankhenda navana vahanda okulilongesa konthele ya Huku, nehando liae, iya otyo tyemuavelele ondundo “okuvelongesa ovipuka ovinyingi.”—Mar. 6:34.
6 Hetekela Jesus: Inkha tupanda omalumono tuna, nga Jesus, matukala nombili yokulekesa kovanthu omalumono opaspilitu ekahi mo Mbimbiliya. (Pro. 2:1-5) Namphila hamue tuepuila, matupopi konthele yotyili tyo Vihonekwa noundyandyi. (Mar. 6:34) Olupandu olunene tuna nomalumono etu, lutuavela ondundo yokuundapa apeho nombili movilinga viokuivisa.