Omapulo Akumbululwa
◼ Inkha ovalinepi vahanda okuundapesa ondyuo yomaliongiyo pala okulinga otyinepo tyavo, oityi vesukisa okupopia novakulu vewaneno?
Ovinepo viapongiyua nawa, nokuelikuata kumue novitumino vio Mbimbiliya, vihivilika Jeova. Otyo tyakolela vali unene konthele yovinepo vilingilwa mondyuo yomaliongiyo, mokonda ovanthu vetyii okuti omaliongiyo alingilwa mo, alekesa oñgeni tyikahi eongano lietu. Moluotyo, opo “ovipuka aviho viendele monkhalelo yaongana nawa,” tyesukisa okupopia novakulu vewaneno tyina muhanda okuundapesa Ondyuo Yomaliongiyo pala okulinga okasamendo.—1 Cor. 14:40.
Ovalinepi vahanda okuundapesa ondyuo yomaliongiyo, vena okuhonekela omukanda o komisau yovilinga yewaneno lilingila omaliongiyo mondyuo oyo. Omukanda wavo una okuhonekwa tyina nkhele onthiki ihenehikepo, nokuhonekamo onthiki, noola mavahande okuundapesa ondyuo yomaliongiyo. Vena okunoñgonoka okuti ovakulu vewaneno kamavapilulula o programa yomaliongiyo, opo valingilemo otyinepo tyavo. Tupu, vana mavelinepe, vena okukala ovanthu vokuna ovituwa oviwa, nokutavela ovitumino viaviuka via Jeova vikahi Mombimbiliya.
Opo vakale nonthumbi yokuti otyinepo matyietela enkhimano Huku yetu, ovalinepi vena okupopila okomisau yovilinga oityi vahanda okulinga tyina nkhele vehenetokole. Namphila ovakulu veuaneno kamavapopi etyi ovalinepi vena okulinga, inkha pena otyipuka tyimue tyahaviukile muetyi ovalinepi vekahi nokupongiya, vena okutavela etyi ovakulu vewaneno vapopia. Vena okuundapesa vala oviimbo vikahi momukanda wetu woviimbo. Tupu, inkha vahanda okuhiwisa ondyuo yomaliongiyo, ine okuetamo ovipundi, vena okutyipopila ovakulu vewaneno, opo vatale inkha tyitavela. Inkha mapapolwa omalutalatu ine mavangalavala ovikasete vio video, otyo tyihalingwe monkhalelo italula ovanthu ine okunyona eliongiyo olio. Ovakulu vewaneno hamue vapondola okuveyeka vakale omuwo omunyingi mondyuo yomaliongiyo, inkha otyo kamatyinyono ovilinga ovikuavo viewaneno. Omikanda viokukonga ovanthu opo veye potyipito, kavipondola okupakwa pekuadru liomaiviso. Mahi, hamue ovakulu vewaneno vapondola okulinga eiviso limue Meliongiyo Liovilinga pala okupopila ewaneno konthele yotyinepo matyilingilwa Mondyuo Yomaliongiyo.
Namphila katyesukisile okukonga vala ovakuatate vambatisalwa, katyaviukile okukonga ovanthu vena ovituwa ovivi viehelikuatele novitumino Viombimbiliya, ine hamue mavanumanesa vakuavo mokonda yovituwa viavo ovivi. Inkha pena omukulu weuaneno, oe una okulinga okasamendo. Ovakulu vewaneno vafuapo pala okulongesa Ondaka ya Huku, ovo vala vena okupopia ovitumino vio Vihonekwa konthele yokasamendo.—1 Tim. 3:2.
Atyiho matyikalingwa mokasamendo tyina okupopilwa omukulu weuaneno malingi okasamendo. Omukulu weuaneno, mapopi novalinepi pala okuvepula konthele yovituwa viavo puetyi ankho velipola konomphunga, iya ovalinepi vena okupopia otyili inkha kavalingile otyivi. Inkha omufikuena wanepelue ine omukuendye wanepeleale, una okupopia otyili inkha velihenga umue nauna ankho velinepa nae ngetyi tyituma Ovihonekwa, nokuhena natyike tyimutyilika pala okunepa omunthu omukuavo. (Mat. 19:9) Otyo tyakutikinya okulekesa komukulu weuaneno omukanda ulekesa okuti tyotyili velihenga umue.
Tyina ovalinepi vatomphola nawa novakulu vewaneno, nokuundapa kumue navo, otyinepo tyietela ehambu aveho.—Pro. 15:22; Heb. 13:17.