“Ononkhalelo Mbokuivisa Onondaka Onongwa Mbouhamba”
1JESUS KRISTU omutumwa wa Jeova, ankho utala otyilinga tyae tyokuivisa ngotyipuka tyimue tyakolela. Jesus waava ongeleka ongwa kovalanduli vae mokonda ankho wivisa nombili onondaka onongwa Mbouhamba wa Huku. Oe ankho kakevelela ovanthu veye kwe, mahi, ankho ukeveovola pomaumbo avo, no povilandesilo, opo eveavele oumbangi, nokuvelongesa. (Mat. 9:35; Luc. 8:1) Kese munthu ankho avasa umupopila ondaka ya Huku, tupu walongesile ovalongwa vae, naapa ankho pena ovanthu ovanyingi wendapo opo ekevelongese. (Mat. 13:36; Mar. 4:10–13; 6:35–44; João 3:2–21) Jesus apeho ankho wovola onomphitilo pala okupopia onondaka mbepameko, nekevelelo. (Luc. 4:16–19) Jesus nalumue ayekelepo okuava oumbangi, natyina ankho elitehelela okuti wepuila. (Mar. 6:30–34; João 4:4–34) Tyina tutanga omahipululo apopia konthele yovilinga via Jesus viokuivisa, katyituavela ondundo yokuhetekela ongeleka yae? Tyotyili, ono apostolu vahetekelele ongeleka ya Jesus, nonthue tuhetekelei ongeleka yae.—Mat. 4:19, 20; Luc. 5:27, 28; João 1:43–45.
2 Tala onomphitilo ovakristau vena hono pala okuundapa movilinga Jesus Kristu ahimbikile ovityita omakwi evali omanima konyima.
3 Okuivisa umbo na umbo: Onombangi mba Jeova hono, vetyii okuti ovilinga viokuivisa umbo na umbo viakolela. Ovo vekahi nokuundapesa unene onkhalelo oyo opo vaivisile ovanthu aveho onondaka Mbouhamba, iya ovo veiwe mokonda yovilinga ovio. Ouwa utundililako, elekeso liokuti Jeova uvepanda, nokuveavela ononkhano onongwa. Tupu, ulekesa ounongo tukahi nokuundapesa opo tupopie novanthu ovanyingi momuvo wehehi. (Mat. 11:19; 24:14) Okuivisa umbo na umbo, tyilekesa okuti tuna ohole na Jeova, no omunthele yetu.—Mat. 22:34-40.
4 Onombangi mba Jeova, kavahimbikile vala hono ovilinga viokuivisa umbo na umbo. Viahimbikale kononthiki mbo no apostolu. Apostolu Paulu wapopile okuti ankho ulongesa ovanthu pomaumbo avo. Paulu wapopila ovakulu vewaneno ko Efesu konthele yovilinga viae okuti: “Tunde onthiki yotete naliata otyilongo tyo Asia, ame . . . hakalele nelundo liokumupopila kese tyimue tyakolela, ine okumulongesa mounyingi no meumbo na umbo.” Monkhalelo oyo, no nonkhalelo ononkhuavo oe “waava oumbangi nombili ko va Judeu no va Gregu, opo velivele ononkhali mbavo ku Huku, avakala nekolelo mu Tatekulu yetu Jesus.” (Atos 20:18, 20, 21) Komuvo una, ankho tyakolela okuivisa onondaka onongwa kovanthu aveho, mokonda ovatumini voko Roma ankho vatuma ovanthu vafende ovilolo, iya ovanthu ovanyingi ankho vena owoma wovilolo ovio. Ankho tyesukisa unene okuovola ‘Huku wokuatunga ouye novipuka aviho vilimo, Una upopila ovanthu aveho, kononthele ambuho opo velivele.’—Atos 17:22-31.
5 Hono nkhele tyakolela vali unene okulongesa onondaka onongwa kovanthu. Onthyulilo youye uno wovivi ikahi unene popepi. Omuenyo wovanthu ukahi motyiponga. Moluotyo, putyina nkhele onthyulilo yehenehikepo, tuesukisa okulinga ononkhono opo tuundape nombili movilinga viokuivisa umbo na umbo. Tyotyili, petupu vali onkhalelo yavilapo yokuivisa umbo na umbo pala okuvasa ovanthu vena ondyala yondaka ya Huku. Ovilinga ovio viakolela unene hono ngetyi tyali kononthiki mba Jesus nono apostolu. Okuundapa movilinga viokuivisa, tyihambukiswa unene.—Mar. 13:10.
6 Okuti ukahi nokuundapa nombili movilinga viokuivisa umbo na umbo? Inkha ukahi nokuovola onomphitilo ambuho pala okulinga ovilinga ovio, kala nonthumbi yokuti ukahi nokupewa ondyambi yehambu movilinga viove ulingila Huku. (Eze. 9:11; Atos 20:35) Ovilinga viokuivisa umbo na umbo hamue kaviapepukile kuove. Hamue uvela ine kavehi ovanthu vahanda okutehelela ondaka motelitoliu yove. Alo umue ovatumini vapondola okutyilika ovilinga viokuivisa. Ine nkhele, mokonda yonkhalelo yove yokutuwa, hamue utala okuti katyapepukile okuhimbika etompho novanthu wehei. Moluotyo, wesukisa okulwa nowoma oo, apeho wenda movilinga viokuivisa. Mahi, uhasoye. (Êxo. 4:10–12) Haveko vala una otyitateka otyo, novakuatate vove kononthele ambuho vekahi nokulwa notyitateka otyo.
7 Jesus walaele ovalongwa vae okuti makala navo “ononthiki mbatyo ambuho, alo konthyulilo youye uno.” (Mat. 28:20) Omulao oo, utupameka hono movilinga viokulinga ovalongwa. Tuesukisa okukala nondundo, nonthumbi Paulu apopia mu Filipenses 4:13: “Ame ndyina ononkhono movipuka aviho, mokonda ya una umpha epameko.” Wahakambe pomaliongiyo okuenda movilinga viokuivisa umbo na umbo, aonganekwa newaneno. Okuundapa navakuenyi, matyikuvatela opo upopie nondundo novanthu, nokuveavela omikanda viapolwa Mombimbiliya. Likuambela okuita vali ekolelo opo utetulule ovitateka, nokulinga ononkhono opo wivise nombili onondaka onongwa.—Luc. 17:5.
8 Pokuivisa onondaka onongwa, ove mokala nomphitilo yokulekesa ehunga liekevelelo liove, iya ekevelelo liove alikala vali liapama. (1 Ped. 3:15) Monoñgonoka vali nawa omunthu wokuna ekevelelo Liouhamba, nauna uhena ekevelelo nalike. Okuvasa vana vatokala onondaka Mbouhamba, nokutala vana vahatokalele, matyikuvatela okunoñgonoka etyi Jesus apopila ovalongwa vae mu Mateus 10:11-14. Mokala nehambu liokunoñgonoka okuti ukahi nokutavela otyitumino tya Jesus tyokuyeka ‘otyitei tyove tyiliaime,’ nokukala nelao liokuvatela vakuenyi okunoñgonoka otyili tyituala komuenyo wahapu.—Mat. 5:16; João 17:3; 1 Tim. 4:16.
9 Kuonganekwa ovilinga viokuivisa umbo na umbo, movityasapalo, novityalumingu, nomokati kosimano. Omawaneno amue, alinga ovilinga viokuivisa kekumbi ine okokangulohi, opo vetyivile okupopia novanthu vana vahavasile peumbo komutenya. Tuatala okuti ovanthu vehole okutehelela vali nawa kekumbi tyipona komuhuka. Tupu kuna ononkhalelo ononkhuavo mambukuvatela movilinga viokuivisa.
10 Ovola vana vokuesuka: Jesus walongesile ovalongwa vae ‘okuovola’ vana vokuesuka. (Mat. 10:11) Jesus ankho kaovola vala ovanthu vokuesuka movilinga viokuivisa umbo na umbo. Ankho wava oumbangi kese apa avasa ovanthu, natyina ekahi nokuenda metapalo. (Luc. 8:1; João 4:7–15) Tupu, ono apostolu ankho vaava oumbangi kese apa vavasa ovanthu.—Atos 17:17; 28:16, 23, 30, 31.
11 Tupu, nonthue ehando lietu hono okuivisa onondaka Mbouhamba ovanthu aveho. Otyo tyilekesa okuti tuna okuhetekela Jesus, novalongwa vae, nokutualako okunoñgonoka nawa onkhalelo yovanthu motelitoliu yetu, mokonda onkhalelo youye uno ikahi nokupiluluka. “Na vana vaundapesa ouye ou, vakale nga vana veheuundapesa unene. Mokonda onkhalelo youye uno, ikahi nokupiluluka.”—1 Cor. 7:31.
12 Tuhaivisei vala umbo na umbo, mahi, tuovolei ovanthu po nomphangu ambuho. Ovaivisi ovanyingi vehole okutunda nawa pokutalelapo ovanthu ponomphangu apa vaundapa. Okuavela oumbangi momatapalo, na apa patalamena omatukutuku, omakalela, ine kese apa pena ovanthu, tyihole okueta ouwa movilongo ovinyingi. Otyo tyivatela okupopila onondaka onongwa kovanthu vahavasiwa peumbo tyina ovaivisi vekevetalelapo.
13 Okuava Omutala Womulavi no Despertai!, onkhalelo imue ongwa yokuava oumbangi. Otyo tupondola okutyilinga pokulekesa nawa ovanthu onthele imue ikahi Momutala Womulavi ine mo Despertai! Tupu, tupondola okuava omikanda omikuavo kuvana vokuesuka, nokulilaa okukevetalelapo pomaumbo avo. Kese hanyi, Ovilinga Vietu Viouhamba vituavela onondonga konthele oyo, nokutuavela ondundo tuivise mononkhalelo mbelikalaila mbovilinga vietu. Ove motale okuti okuava oumbangi ponomphangu pena ovanthu ovanyingi, onkhalelo ongwa yokuyandyanesa ovilinga viove viokuivisa.
14 Mahi, ovilinga viovakristau hono, hakuava vala omalondolo, nokuivisa onondaka onongwa. Opo vakuateseko vakuavo okutavela otyili tyituala komuenyo, vesukisa okukatalelapo apeho vana vokuesuka, nokuvevatela opo vapameke oupanga wavo na Jeova.