Ovilinga Viokuivisa Ehinangelo Liononkhia Mba Tatekulu!
1. Ovilinga patyi ovaivisi Vouhamba mavalingi mouye auho, okupolelela mu 21 ya Kapepo yo 2009? Omokonda yatyi?
1 Mukuana 9 ya Tyikukutu yo 2009, ovafendi va Jeova Huku mouye auho maveliongiya pala okuhinangela elekeso enene yohole Huku ena novanthu. (Rom. 5:6-8) Onthue tuhanda ovanthu ovanyingi veye okuliongiya nonthue tyina tuhinangela ononkhia mba Jesus. Ovilinga viokukonga ovanthu veye Kehinangelo Liononkhia mba Tatekulu, mavihimbika mouye auho mu 21 ya Kapepo.
2. Ononthele patyi una okuhinangela tyina wava okamukanda kokukonga?
2 Ononthele Tuna Okuhinangela: Undapesa omalutalatu, nomapulo, no notestu mbukahi mokamukanda kokukonga. Mongeleka, ove upondola okupopia konthele yolutalatu lukahi pefo liotete, opopi okuti: “Ame ndyikahi nokukukonga opo ukahinangele nonthue ononkhia mba Jesus, mukuana 9 ya Tyikukutu yo 2009.” Popia osapi yokamukanda kokukonga nomapulo ekahimo. Popila omunthu wavasa meumbo okuti oe tupu upondola okukonga ombunga yae novanthu ovakuavo oe ahanda veye kumue nae.
3. Tyina ovilinga viokuava okamukanda kokukonga viamapu, iya ove nkhele unavio, oityi una okulinga?
3 Inkha ewaneno liove lina otelitoliu onene, ovakulu vewaneno mavemutolela opo musepo omikanda ovio pomaumbo ana muhavasile nawike. Movityasapalo, notyalumingu, upondola okuava okamukanda kokukonga kumue Nomutala Womulavi no Despertai! Ovola okukonga vana uhole okukatalelapo, ovalongwa vove Vombimbiliya, ombunga, vana ulilongesa navo kosikola, na vana uundapa navo, ovomunthele, novakuavo vali. Enima liokualamba, omphange umue wakonga ovanthu 30 mombunga yae, iya apeho ankho uvehinangelesa esilivilo yonthiki oyo. Oe wahambukua unene etyi ovanthu 25 mombunga veya Kehinangelo, iya konyima, ovanthu 4 avetavela okulilongesa Ombimbiliya!
4. Epongiyo patyi tuna okulinga pahetyino? Iya omokonda yatyi?
4 Lipongiya Pahetyino Opo Uundape Movilinga Ovio: Ovaivisi ovanyingi vapondola okuyawisa vali kovilinga viavo viokuivisa mokueenda kua Tyitalale na Tyikukutu. Inkha una ovana ine ovalongwa Vombimbiliya vekahi nokukula mopaspilitu, ou omuvo omuwa opo vakale ovaivisi vehenembatisalwe. Pahe, ou omuvo wokuhimbika okulipongiya opo uundape nombili movilinga viokukonga ovanthu veye Kehinangelo liomalekeso evali omanene ohole.—João 3:16; 15:13.