Kuatesako Vana “Vahanda Omuenyo”
1. Ovalie Jeova ekahi nokuongiya hono?
1 Kese munthu una ehando limue momutima wae. (Mat. 12:35) Ombimbiliya ipopia konthele ya una “wokuna momutima ehando lio kulwa.” (Sal. 55:21) Vamue “vena ehando liokukala nonyengo.” (Pro. 29:22) Mahi, tupu kuna vana “vahanda omuenyo wahapu.” (Atos 13:48) Mononthiki mbetu, Jeova ukahi nokuongiya ovanthu ovo vokuhanda omuenyo. (Ageu 2:7) Oñgeni tupondola okuvevatela opo vakale ovafendeli va Jeova?
2.Ovilinga vietu viokulinga ovalongwa viakutikinya tyi?
2 Katalelepo Nombili Ovanthu Wapopia Navo: Okukala nolusoke luaviuka konthele yokukatalelapo ovanthu, tyakolela opo tufuisepo otyilinga tyetu tyokulinga ovalongwa. (Mat. 28:19, 20) Okuti tukatalelapo liwa vana vokualekesa esuko? Okuti matutualako okukatalelapo aveho vokuetavela omikanda ine valekesa esuko konondaka onongwa? Okuti tutualako nokulinga ononkhono opo tuvevatele okukala noupanga na Huku? Mokonda ovilinga vietu viakutikinya omuenyo, tuna okuovola okuyawisa esuko liavana vokualekesa esuko.
3. Oityi tuna okulinga tyina tuamatomphola nomunthu umue movilinga viokuivisa?
3 Putyina nkhele uhinangela etyi watomphola nomunthu walekesa esuko, honeka momukanda enyina liae, naapa akala. Honeka osapi yetyii muapopia, no notestu muatanga, nomukanda wemuavela. Konyima yotyo, uhalimbueko okukemutalelapo.
4. Oityi tupondola okulinga tyina tukatalelapo ovanthu?
4 Oityi Mopopi Tyina Ukatalelapo Omunthu: Tyina ukatalelapo omunthu, tyikahi nawa okulekesa ehambu, nokulekesa esuko komunthu wavasa meumbo. Popia monkhalelo yapepuka ovipuka vikahi Mombimbiliya. Pongiya nawa onthele Yombimbiliya mokapopia, iya pokumanuhula etompho, linga epulo mokumbulula tyina wamakondoka okukemutalelapo. Lityilika okupopia unene omalusoke ove muene konthele yotyipuka tyimue omunthu apopia, ohatange Mombimbiliya. Popia vali unene konthele yovipuka onwe amuho mutavela opo ulongese vali unene otyili tyo Mbimbiliya.—Col. 4:6.
5. Omokonda yatyi tuna okutualako okukatalelapo ovanthu?
5 Onkhalelo yovanthu ipiluluka. (1 Cor. 7:31) Pamue tyesukisa okulinga ononkhono ononene opo tuvase ovanthu pomaumbo avo. Inkha tukatalelapo ovanthu nombili, tupondola okukuatesako vana vahanda omuenyo okuendela mondyila ituala komuenyo wahapu.—Mat. 7:13, 14.