Okuava Oumbangi mo Telefone Tyipondola Okuvatela Unene
1 Omokonda yatyi tuesukisa okuundapesa otelefone pala okuava oumbangi movilinga vietu viokuivisa? Mokonda oyo onkhalelo onkhuavo yokuvatela vakuetu opo vakale nenoñgonoko liafuapo pala eyovo. (2 Ped. 3:9) Namphila okuivisa umbo na umbo onkhalelo yakolela vali movilinga viokuivisa Ouhamba wa Huku, onthue tuhanda okuundapesa ononkhalelo ononkhuavo pala okupopia navana tuhevili okuvasa peumbo.—Mat. 24:14; Luc. 10:1-7; Rev. 14:6.
2 Oñgeni Oumbangi Motelefone Wonganekwa: Ngetyi tyionganekwa ovilinga viokuivisa umbo na umbo, tupu okuava oumbangi motelefone tyionganekwa novaivisi. Okuava oumbangi motelefone tyipondola okulingwa awike ine ovaivisi vevali ine vetatu. Tyina muavela oumbangi motelefone, holovonei omphangu imue yahiliya muhena ovanthu vaviela. Ovanyingi tyina vaava oumbangi motelefone vaumphama komesa nomikanda vehole okuundapesa tyina vakaivisa umbo na umbo.
3 Oñgeni Tyiavelwa Oumbangi Motelefone: Tyina tuava oumbangi motelefone, tuna okupopia ngatyina tukahi nokutomphola. Vamue vekahi nokuhimbika pahetyino, vapondola okutangela omunthu etyi vahanda okupopia, mahi monkhalelo imue ilekesa okuti vekahi nokutomphola. Onondaka mbokuhimbika etompho mbuvasiwa momukanda Raciocínio, Ovilinga Vietu Viouhamba, notratadu Okuti Ove Uhanda Okunoñgonoka Otyili? mbupondola okutuvatela konthele oyo. Tyina wamapopi enyina liove, popia osapi waholovona, ovola okulinga epulo konthele yosapi waholovona, nokukala tyafuapo pala okutangela omunthu onotestu mbumue mbuavela ekumbululo. Upondola okumuavela omikanda mukahi nokuava umbo na umbo. Landula omahinangeleso aa: Uhakale nowoma, uhapopie liwa. Popia nonthilo, kala noupwa lundo, noundyandyi, mokonda otyo tyipondola okunoñgonokwa motelefone. Tehelela tyina omunthu ekahi nokupopia, noñgonoka olusoke luae iya olekesa olupandu kuetyi apopia. Uhapopie konthele yokuava onombongo pala okuvatela ovilinga viokuivisa, mokonda omunthu upondola okutyitala ngatyina ukahi nokumuita opo afete otelefone.
4 Upondola okupopia motelefone nomunthu uvela ine ukahi apeho kovilinga iya auhevili okumuvasa tyina wivisa umbo na umbo. Pena vakuavo vakala momaumbo omanene okuaikwa notyimato iya pombudi yeumbo apakala omunthu pala okuyunga. Moluotyo, opo tufuisepo nawa ovilinga vietu viokuivisa, tuundapesei onkhalelo yokuava oumbangi notelefone.
[Omapuko Elongeso]
1. Omokonda yatyi okuava oumbangi motelefone onthele yakolela movilinga vietu viokuivisa?
2. Oñgeni okuava oumbangi motelefone tyionganekwa?
3. Oityi tuna okuhinangela tyina tuava oumbangi motelefone?
4. Oityi oumbangi motelefone upondola okutuvatela okulinga motelitoliu yetu?