“Kalei Nombili Onene Mospilitu”
1. Otyituwa patyi matyituvatela movilinga vietu viokuivisa?
1 Tukahi nokuundapa apeho movilinga vietu Vioukristau. Moluotyo, tukahi nokuavelwa ondundo: “Yokukala nombili onene mospilitu, novapika va Jeova.” (Rom. 12:11) Mahi, kuna ovipuka ovinyingi vipondola okutepulula ombili yetu movilinga viokuivisa. Oñgeni tupondola okulunda ombili yetu, nondundo movilinga viokuivisa Ouhamba?—2 Tim. 1:6, 7.
2. Oñgeni okulinga elilongeso lioulike tyelikuata kumwe nombili movilinga viokuivisa?
2 Okulinga Elilongeso Lioulike: Omuivisi omunongo Wouhamba, oyouna una ohole notyitumino tya Huku, nokulundwa notyili tyikahimo. (Sal. 119:97) Tyina tulilongesa otyili Tyombimbiliya mokueenda kuelilongeso lietu lioulike, otyo tyilunda omutima wetu, nokuyawisa ombili yetu. Ohole tuna Nomuavi wotyili otyo, nehando lietu liokuivisa onondaka onongwa kuvakuetu, tyitulunda okuhivilika Huku nokuivisa enyina liae. (Heb. 13:15) Tyotyili, okuivisa onondaka onongwa nombili, tyilekesa okuti tuna olupandu olunene nonondaka ombo.
3. Oñgeni ospilitu ya Huku ipondola okutuvatela movilinga vietu viokuivisa?
3 Likuambela Okuita Ospilitu ya Huku: Ovilinga vietu viokuivisa kavitei kononkhono mbetu. Tuna ombili yotyotyili mokonda yombatelo yospilitu ya Huku. (1 Ped. 4:11) Okufuena popepi Nondyivindyivi ‘yononkhono,’ matyituavela ononkhono mbokuava oumbangi tyihena owoma. (Isa. 40:26, 29-31) Etyi apostolu Paulu alwa novitateka movilinga viae viokuivisa, ankho “uvatelwa na Huku.” (Atos 26:21, 22) Ospilitu ya Jeova ipondola okutukuatesako okukala nombili onene movilinga viokuivisa, mahi, tuesukisa okulikuambela okuita ospilitu oyo.—Luc. 11:9-13.
4. Oityi ombili ipondola okulunda, mahi, elondolo patyi tuna okulandula?
4 Okuivisa nombili Ouhamba wa Huku tyilunda ombili onene pokati Kovakristau. (2 Cor. 9:2) Motelitoliu, ovanthu vakala vali tyafuapo pala okutehelela onondaka onongwa, tyina tupopia noundyandyi nonthumbi. Mahi, ombili ina okulandulwa apeho nepoleyo nonondunge onongwa. (Tito 3:2) Ovikando vimue, tuesukisa okulekesa onthilo komunthu tupopia nae, nonkhalelo yae yokusoka.
5. Elondolo patyi Liombimbiliya tuesukisa okuundapesa?
5 Ngovaivisi Vouhamba, apeho “tukalei nombili onene mospilitu.” Tuovolei okukala nombili pokulinga elilongeso lioulike, nokulikuambela ku Jeova, una upondola okutuavela ospilitu sandu. Moluotyo, nombili tupondola okufuisapo ovilinga vietu viokuivisa “nospilitu sandu nonthumbi onene.”—1 Tes. 1:5.