Ivisa Nondyanga!

1. Elondolo patyi lia Paulu liesukisa okutalwa nawa mononthiki mbetu?

¹ “Ivisa ondaka. Undapa nondyanga.” (2 Tim. 4:2) Omokonda yatyi elondolo lia Paulu liakolela unene mononthiki mbetu? Oñgeni onondaka ombo mbuhongiliya omuenyo wetu nomuenyo wavakuetu?

2. Omokonda yatyi tuovola nombili vana nkhele vehene tehelele onondaka onongwa?

² Muakutikinya Omuenyo Wovanthu: Ovanthu ovanyingi mouye auho vesukisa okutehelela onondaka onongwa Mbouhamba mbupondola okuvetuala keyovo. (Rom. 10:13-15; 1 Tim. 4:16) Ovanthu ovanyingi vokuna omutima waviuka vekahi nokuvasiwa mo notelitoliu mbuundapwa apeho. Inkha tukevetalelapo monthiki imwe yelikalela ine momuvo omukuavo, tupondola okuvasa omunthu umue welikalela. Ombili yatyo oyo yokuovola ovanthu, maitukalesa nomutima wasukuka nokuhena onkhali yohonde.—Atos 20:26.

3. Oñgeni tupondola okuundapesa omuwo wetu nonondunge tyina tukahi movilinga viokuivisa?

³ Namphila Ovakristau votete vamonesilwe emone, ovo ‘veyulisile o Jelusalei aiho nelongeso liavo.’ (Atos 5:28) Nonthue tuatokola “okuava oumbangi nombili”? (Atos 10:42) Okuti tuundapesa omuwo nonondunge tyina tukahi movilinga viokuivisa? Inkha tukahi nokukevela vakuetu vakatalelapo ovanthu vokualekesa esuko, okuti onthue tuovola okupopia novanthu vekahi nokulamba?

4. Oñgeni okuivisa nondyanga tyitukuatesako okutualako tyalunguka?

⁴ Tutualeiko Okukala Tyalunguka: Nonthyulilo youye uno ikahi popepi, tuna okutualako tyalunguka. (1 Tes. 5:1-6) Tyina tupopia apeho konthele yekevelelo lietu Liouhamba, tulityilika okusukalala unene novipuka viouye uno. (Luc. 21:34-36) Iya tyina “tunoñgonoka nawa” onthiki ya Jeova, tupewa ondundo pala okuyawisa ombili yetu movilinga viokuivisa pala okuyovola omuenyo wovanthu.—2 Ped. 3:11, 12.

5. Oñgeni onthilo tuna nomuenyo ituhindila movilinga viokuivisa?

⁵ Tyina tuivisa nondyanga, tuhetekela onkhalelo ya Jeova yokutala omuenyo: “Oe kahande na umwe ahanyueko, mahi uhanda ovanthu aveho velivele.” (2 Ped. 3:9; Eze. 33:11) Tutokolei okupopia novanthu ovanyingi motelitoliu yetu, opo aveho vahivilike Jeova!—Sal. 109:30.