“Ove Upondola Okukala Omukokoli-ndyila Umwe Omuwa!”
1. Oñgeni omphange umwe elitehelela konthele yovilinga viae vioukokoli-ndyila?
1 Kathe B. Palm wati: “Ame hinevase ovilinga ovikuavo vipondola okumpha vali ehambu mopaspilitu.” Oe wakala omanima omanyingi ngomukokoli-ndyila okuava oumbangi kononthele ambuho mbo Chile, no ko Amelika yo Sul. Okusoka kehambu liavana vekahi movilinga viomuwo auho, pamwe omunthu umwe ukupopila okuti: “Ove upondola okukala omukokoli-ndyila umwe omuwa!”
2. Hangununa omokonda yatyi ehambu liotyotyili litunda kokuundapa movilinga via Huku.
2 Onkhalelo Yomuenyo Wehambu: Ongeleka yetu Jesus, wavasile ehambu mokulinga ehando lia Tate yae. (João 4:34) Moluotyo, Jesus walongesile ovalongwa vae okuti ehambu liotyotyili litunda kokuundapa nomutima auho movilinga vielikuata nefendelo lia Jeova. Onthue tuhambukwa tyina tuundapa movilinga vipandwa na Jeova. Tupu, tyina tuava omuwo, nononkhono, nomalumono pala okuvatela vakuetu, tuyawisa ehambu lietu.—Atos 20:31, 35.
3. Ehambu patyi tupondola okukala nalio pokukala omuwo omunyingi movilinga viokuivisa?
3 Tyina tukala vali omuwo omunyingi movilinga viokuivisa, tupu matukala vali nonomphitilo mbokukala nehambu liokuhimbika okulongesa ovanthu Ombimbiliya. Alo umwe potelitoliu pana ankho tutala okuti ovanthu kavahande okutehelela, tyina tuhimbika ovilinga vioukokoli-ndyila tupondola okutala okuti ovanthu pahe vekahi nokututehelela. Tyina ovakokoli-ndyila vatuukisa enima movilinga ovio, vapita Mosikola Yovilinga Vioukokoli-ndyila, vapondola okuundapesa etyi valongeswa mosikola oyo. (2 Tim. 2:15) Putyina tukoleleya, tutualeiko okukuna onombuto mbotyili mambukaava ovinyango komutwe.—Ecl. 11:6.
4. Oityi ovakuendye novafikuena vena okulinga putyina vekahi nokumanuhula okulongesiwa kosikola?
4 Ovakuendye Novafikuena: Putyina ukahi nokumanuhula okulongeswa kosikola, okuti ukahi nokusoka nawa etyi mokalinga komutue? Alo pahe, ovilinga viove viokosikola vikahi nokumana omuvo wove. Oñgeni moundapesa omuwo ankho umanena kosikola? Omokonda yatyi uhalingi elikuambelo opo utale inkha upondola okuundapa movilinga vioukokoli-ndyila, tyipona okuovola ovilinga vimuvo auho mukaputu? Ounongo mokelilongesa—okuava oumbangi ovanthu velikalela, okutetulula ovitateka, okulikondola omutima, nokukala omunongo kokulongesa, matyikuvatela momuenyo auho.
5. Oñgeni ovohe newaneno vapondola okuavela ondundo ovilinga vioukokoli-ndyila?
5 Vohe, mukahi nokukuatesako ovana venyi opo vaholovone ovilinga viomuwo auho? Onondaka mbenyi nongeleka ongwa, mbupondola okuvatela unene ovana opo vapake tete momuenyo Ouhamba wa Huku. (Mat. 6:33) Ray, wahimbika ovilinga vioukokoli-ndyila etyi amana osikola yapola pokati, uhinangela okuti: “Me yange apeho ankho usoka okuti ovilinga vioukokoli-ndyila vieta ehambu enene momuenyo.” Aveho mewaneno vapondola okuavela ondundo ovilinga viovakokoli-ndyila monondaka mbavo nokuvevatela. Jose wo ko Espanha, wati: “Ewaneno liange litala ovilinga vioukokoli-ndyila ngatyina otyilinga tyimwe otyiwa pala ovakuendye novafikuena. Onondaka mbavo, nolupandu kovilinga vioukokoli-ndyila, kumwe nombatelo yavo tyankhuatesako okuhimbika ovilinga vioukokoli-ndyila.”
6. Oityi tupondola okulinga inkha onthue tutupu ehando liokukala omukokoli-ndyila?
6 Okutetulula Ovitateka: Mahi, inkha ove uti, ‘ndyitupu ehando liokukala omukokoli-dyila.’ Inkha ove ongotyo ulitehelela tete, likuambela ku Jeova konthele yonkhalelo ove welitehelela omupopila okuti: ‘Hityii inkha ovilinga vioukokoli-ndyila o pala ame, mahi, ame nahanda okulinga etyi tyikuhambukiswa.’ (Sal. 62:8; Pro. 23:26) Iya otale kehongolelo liae aavela Mondaka yae no mewaneno. Ovakokoli-ndyila ovanyingi tete “vahimbika” ngovakokoli-ndyila vapola pokati, iya ehambu vapolako livehindila okunyingila movilinga viomuwo auho.—Sal. 34:8.
7. Oñgeni motetulula olusoke ankho una tete opo utyivile okuava ono ola 70 mbuitua kese hanyi?
7 Oityi una okulinga inkha utupu onthumbi yokuti motuukisa ono ola 70 mbuitua kese hanyi? Omokonda yatyi kupopila novakokoli-ndyila ankho vasoka ngove? (Pro. 15:22) Iya olingi ono programa ononyingi opo utale oipi maikuvatela. Ove upondola okutala okuti okuyekapo okulinga ovipuka viahasukisile unene opo ukale nomuwo pala ovilinga viokuivisa matyikuvatela unene.—Efé. 5:15, 16.
8. Omokonda yatyi tuna okutala onkhalelo yetu kese nthiki?
8 Tala Vali Nawa Onkhalelo Yove: Onkhalelo yovanthu apeho ipiluluka. Otyiwa kese omuwo okutala onkhalelo yove. Mongeleka, okuti mokonda yomanima waundapa movilinga via kaputu apa katutu moyekepo okuundapa, okala vala pondyuo nokutambula ononmbongo? Randy wapeua omphitilo oyo wati: “Etokolo olio liankhuatesako okuhimbika ovilinga vioukokoli-ndyila nomukai wange, iya otyo tyetuavela omphitilo opo tuende kuna kuesukisa vali unene ovaivisi. Natambula ononkhano ononyingi onongwa mokonda yetokolo liange, mahi ononkhano mbavilapo vali okukala nomutima omuwa.”
9. Oityi ovalinepi vesukisa okutala?
9 Ovalinepi vamwe vatala okuti kavesukisile okuundapa aveho movilinga via kaputu. Tyotyili, otyo matyisukisa ombunga okutepulula ovipuka vimwe monkhalelo yavo yomuenyo, mahi otyo tyesukisa okulinga ononkhono. João, una omukai wayekapo ovilinga opo aundape vali movilinga viokuivisa wati: “Petupu natyike otyiwa tyipona okunoñgonoka okuti omukai wange ukahi nokuundapa movilinga via Jeova mokueenda kuonthiki aiho.”
10. Oityi tyaavela ondundo Ovakristau okusoka kovilinga vioukokoli-ndyila?
10 Elekeso Liohole Nekolelo: Jeova ukahi nokulinga ovilinga viokuivisa vikale ovilinga viakolela vali tyipona kese umue puonthue apondola okulinga. Ouye uno apa katutu mauhanyaunwako, iya vana vaihana enyina lia Jeova ovo vala mavayovolwa. (Rom. 10:13) Omutima weyula ohole na Huku, nolupandu mokonda yetyi ekahi nokulinga pala onthue, matyituavela ondundo yokutavela otyilinga tyo Mona wae tyokuivisa nombili. (Mat. 28:19, 20; 1 João 5:3) Tupu, okukala nekolelo liokuti tukahi kononthiki mbokuhulilila matyituavela ondundo opo tulinge atyiho tupondola movilinga viokuivisa tyina nkhele pena omuwo, tyipona okuundapesa unene ouye.—1 Cor. 7:29-31.
11. Oñgeni matutyitale inkha omunthu umwe etupopila okuti tupondola okukala omukokoli-ndyila umwe omuwa?
11 Ovilinga vioukokoli-ndyila hakuava vala ono ola mbaitua; elekeso liokuti tuna onthilo na Huku. Ngotyo, inkha omunthu umue ekupopila okuti ove upondola okukala umukokoli-ndyila umwe omuwa, tyitala ngatyina ekahi nokukuhilivika. Iya soka nokulikuambela konthele yokuliwaneka novanthu vana vekahi nokulinga ovilinga ovio via Huku vihambukiswa.
[Ehangununo liolutalatu pefo 4]
Vohe, mukahi nokukuatesako ovana venyi opo vaholovone ovilinga viomuwo auho?
[Onondaka Mbavilapo pefo 5]
Jeova ukahi nokulinga ovilinga viokuivisa vikale ovilinga viakolela vali tyipona kese umue puonthue apondola okulinga.