Eiho Liove Liayela?

1. Okukala ‘neiho liayela’ tyihangununa tyi?

¹ Etyi tutala tyihongiliya unene etyi tulinga. Onondaka mba Jesus mbaviuka: “Otyimimi tyolutu eiho. Inkha eiho liove liyela, olutu luove aluho malumimikilwa!” (Mat. 6:​22) Tyina eiho lietu “liayela” ngetyi Jesus apopile, litala vala kotyipuka tyike​—⁠okulinga ehando lia Huku. Tupaka tete momuenyo wetu Ouhamba iya atuhatalukwa novipuka viehesukisile ine ovilinga vitutyilika okuundapa movilinga viokuivisa.

2. Oityi tyipondola okunyona olusoke luetu, mahi oityi matyituvatela?

² Tuesukisa Okulitala Nawa: Olusoke luetu lupondola okunyonwa netyi tyipopiwa molaliu, mo televisau konthele yetyi tuesukisa ine etyi vakuetu vena. Tyina nkhele tuhene ovole ovilinga ine okulanda otyipuka tyimwe tyitumana omuvo, onombongo, ine ononkhono, ‘otyiwa okutala’ inkha tuna onombongo mbutuuka olipulu: ‘Okuti otyo matyiyawisa ovilinga viange ku Jeova ine manthyinthyilika?’ (Luc. 14:28; Fil. 1:​9-​11) Tupu, otyiwa okutala apeho oñgeni tupondola okutepulula ovipuka vimwe tuehesukisile opo tuundape vali unene movilinga viokuivisa.​—⁠2 Cor. 13:5; Efé. 5:⁠10.

3. Oityi tupondola okulilongesila komphange umwe walinga omapiluluko momuenyo wae?

³ Etyi omphange umwe ehimbika ovilinga vioukokoli-ndyila, waholovona okukala movilinga viae, namphila ovilinga viokuundapa vala komuhuka ankho vimuavela onombongo mbutuuka opo elitekule. Konthyulilo oe watala okuti “Nawike upondola okukala omupika wovahona vevali. Ankho ndyina okuyekapo omahando ange opo ndyikale vala novipuka nesukisa. Ame naimbuka okuti inkha natuaileko okuovola ovipuka ankho ndyisoka okuti viesukisa, otyo ñgeno tyemphuilisa unene.” Oe walinga omapiluluko, atepulula ovipuka vimwe ankho ehesukisile, iya aovola ovilinga ovikuavo, opo etyivile okutualako novilinga vioukokoli-ndyila.

4. Omokonda yatyi tyakolela okutualako neiho liayela pahetyino?

⁴ Mokonda tukahi komuvo wahulililako, tyakolela unene tutualeko neiho liayela. Kese onthiki ilamba, itufueneka vali popepi nonthyulilo youye uno, nonthyimbi youye omupe wa Huku. (1 Cor. 7:​29, 31) Inkha tuundapa unene movilinga viokuivisa, matuliyovola onthue muene na vana vetutehelela.​—⁠1 Tim. 4:⁠16.