“Uhakale Nowoma”
1. Ovitateka patyi vielifua no via Jeremia tupondola okukala navio hono?
1 Etyi Jeremia aholovonwa opo akale omuuli ankho wasoka okuti kemetyivili. Mahi, Jeova emupameka nonondaka ombu: “wahakale nowoma” iya nohole emuavela ondundo opo afuisepo otyilinga tyae. (Jer. 1:6-10) Mononthiki mbetu, okukala nohonyi ine okuhena onthumbi tyipondola okutepulula ombili yetu movilinga viokuivisa. Okukala nowoma wokusoka oñgeni ovanthu mavakumbulula ine oñgeni mavetutale tyipondola okututyilika okuava Oumbangi. Oñgeni tupondola okufinda owoma, iya ouwa patyi mautundililako?
2. Oñgeni okulipongiya nawa tyitukuatesako okutepulula owoma movilinga viokuivisa?
2 Lipongiya Nawa: Okulipongiya nawa tyitukuatesako okutepulula owoma. Mongeleka, inkha tupitulula onthele yati oñgeni matukumbulula vana vetuteta ondaka, matukala tyafuapo pala okukumbulula omapulo valinga. (Pro. 15:28) Omokonda yatyi mokueenda Kuelilongeso Liombunga muhelipongiya pala ovitateka ovinyingi mupondola okukala navio kosikola nomovilinga viokuivisa? —1 Ped. 3:15.
3. Oñgeni okuyumba onthumbi mu Jeova matyitukuatesako okuhakala nowoma?
3 Yumba Onthumbi mu Jeova: Okuyumba onthumbi mu Huku matyituvatela okuhakala nowoma. Jeova walaa okuti oe metukuatesako. (Isa. 41:10-13) Epamo patyi enene tupondola okukala nalio? Tupu, Jesus wetupameka okuti namphila tutumbukilwa novitateka, ospilitu sandu ya Huku maituavela ounongo wokuava oumbangi monkhalelo ongwa. (Mar. 13:11) Moluotyo, tuesukisa okuita apeho ku Jeova ospilitu sandu yae.—Luc. 11:13.
4. Ononkhano patyi onongwa matukala nambo inkha tutualako novilinga viokuivisa namphila tuna ovitateka?
4 Ononkhano Onongwa: Inkha tutualako novilinga vietu viokuivisa namphila tuna ovitateka, matupewa ononkhono opo tufinde nounongo ovitateka komutwe wandyila. Tuesukisa okukala nomutima wakola nokuhena owoma, ovituwa via vana veyula ospilitu sandu. (Atos 4:31) Tupu, putyina tufinda owoma nombatelo ya Jeova, tupameka ekolelo lietu nokuyumba onthumbi mokuoko kwae kueyovo. (Isa. 33:2) Tupu, tukala nehambu liokunoñgonoka okuti tukahi nokuhambukiswa Tate yetu keulu. (1 Ped. 4:13, 14) Tuhakalei nowoma wokupopia onondaka Mbouhamba nondundo, okuyumba onthumbi apeho mombatelo ya Jeova!