Okulikuambela Nokusokolola Nawa—Tyesukisa Pala Vana Vena Ombili Movilinga Viokuivisa
1. Oityi tyakuatesileko Jesus opo ahayekepo ovilinga viae viavilapo viokuivisa?
1 Jesus wakala otyinthiki atyiho nokuhakula ovanthu nokuvepola ovilulu. Etyi ovalongwa vae vemuvasa onthiki onkhuavo, vapopia okuti: “Aveho vekahi nokukuovola,” avemulondola opo atualeko novilinga viae ovinene. Mahi, Jesus ankho kapondola okutalukwa ayekepo ovilinga viae viavilapo viokuivisa onondaka onongwa Mbouhamba. Oe wakumbulula okuti: “Tuendei komphangu onkhuavo, pomaumbo opopepi, opo ndyikaivise, mokonda otyo neila.” Oityi tyakuatesileko Jesus opo atualeko novilinga viae? Oe ankho upindukapo kombimba opo elikuambele nokusokolola. (Mar. 1:32-39) Oñgeni tupu elikuambelo nokusokolola vipondola okutukuatesako opo tukale ovaivisi vombili?
2. Oityi tupondola okusokolola opo tyitukuateseko okutualako nombili movilinga viokuivisa?
2 Okusokolola konthele yatyi? Jesus wamona okuti ovanthu “ankho vakunyauninwa vala kononthele ambuho, ngo nongi mbuhena omunthita.” (Mat. 9:36) Tupu, nonthue tupondola okusoka kovanthu ovanyingi vesuka nonondaka onongwa. Tupondola okusoka komuvo ukahi nokukanyauka. (1 Cor. 7:29) Tupondola okusoka kovilinga novituwa via Jeova, kelao lietu liokukala Onombangi mba Jeova, no komalumono akolela opaspilitu tuelilongesa Mondaka ya Huku, nkhele ahanoñgonokelwe novanthu vo potyilongo tyetu.—Sal. 77:11-13; Isa. 43:10-12; Mat. 13:52.
3. Onalupi tupondola okusokolola?
3 Okusokolola nalupi? Ngetyi Jesus alingile, vamwe vapindukapo kombimba tyina kuahiliya. Ovakuavo vatala okuti otyiwa okusokolola kokangulohi tyina nkhele vehenelangalepo. (Gên. 24:63) Namphila tuna ovilinga ovinyingi, tupondola okuvasa omuwo wokusokolola. Vamwe valinga ngotyo tyina vaendela movituku-tuku. Ovakuavo vasokolola pomuvo wokulia. Ovanthu ovanyingi vatala okuti okusokolola tyina nkhele veheneende movilinga viokuivisa, namphila vala okamuvo kehehi, tyivekuatesako okuivisa nombili onene nokuhena owoma.
4. Omokonda yatyi tuesukisa okusokolola?
4 Okusokolola nelikuambelo matyiyawisa ehando lietu liokuumbila Jeova, matyitukuatesako okutala efendelo lietu ngatyina otyipuka tyakolela vali momuenyo wetu, nokupameka etokolo lietu liokutualako novilinga viokuivisa. Jesus, Omuivisi Wavilapo wa Huku, wapolako ouwa kokusokolola, nonthue matupoloko ouwa.