“Yekei Otyitei Tyenyi Tyiliaime”
1. Onthue tuna elao liokulinga tyi?
1 Okupolelela komuhuka alo ekumbi linyingila, ouwa wekumbi uhivilika Jeova Huku. Mahi, kuna otyimimi otyikuavo Jesus apopila ovalongwa vae vakale natyo—“otyimimi tyomuenyo.” (João 8:12) Okukala notyimimi otyo tyopaspilitu elao limwe ewa muakutikinya ovilinga ovinene. Jesus walongesa okuti: “Yekei otyitei tyenyi tyiliaimine ovanthu,” opo tyietele vakuenyi ouwa. (Mat. 5:16) Mokonda ovanthu vekahi menthiki liopaspilitu, kuna esuko enene liokuvekuatesako okutunda menthiki olio! Ngetyi tyalingile Kristu, oñgeni tupondola okuyeka otyitei tyetu tyiliaime?
2. Oñgeni Jesus alekesa esilivilo liokunoñgonokesa otyitei tyopaspilitu?
2 Pokuivisa: Jesus waundapesile omuwo wae, nononkhono, nomalumono ae opo anoñgonokese otyitei tyotyili kovanthu kese apa vapondola okuvasiwa, momaumbo avo, pana valandesila, no konthongo-nthongo yomphunda. Oe ankho wiimbuka esilivilo liokuava otyitei tyotyili tyopaspilitu. (João 12:46) Opo akuateseko vali ovanthu, Jesus walongesile ovalongwa vae opo vakale “otyimimi tyouye.” (Mat. 5:14) Ovo vayekele otyimimi tyavo tyiliaime pokulinga ovipuka oviwa oomunthele yavo nokupopia otyili tyopaspilitu.
3. Oñgeni tupondola okulekesa olupandu olunene kotyitei tyotyili?
3 Ovanthu va Huku vapaka momutima otyilinga “tyokutualako okuenda ngovana votyitei,” iya vaivisa kese apa pavasiwa ovanthu. (Efé. 5:8) Okutanga Ombimbiliya ine omikanda omikuavo pokati kovanthu mokueenda kuovilinga ine kosikola tyipondola okuikula ondyila pala okupopia konthele Yombimbiliya. Pokulinga ngotyo, omphange umwe omufikuena wahimbika okulongesa omunthu Ombimbiliya iya aave kuvana elilongesa navo kosikola omikanda 12!
4. Omokonda yatyi ‘okuyeka otyitei tyetu tyiliaime’ muakutikinya ovituwa oviwa?
4 Pokulinga Ovilinga Oviwa: Okuyeka otyitei tyetu tyiliaime tupu muakutikinya omuenyo wetu wa kese nthiki. (Efé. 5:9) Kovilinga, kosikola, no konomphangu ononkuavo, ovituwa oviwa vio Mukristau vina okumoneka kuvakuavo nokuovola onomphitilo mbokupopia otyili Tyombimbiliya. (1 Ped. 2:12) Mongeleka, ovituwa oviwa viomona womanima etano vialunda omulongesi wae okuihana ovohe. Oe wati, “Hinemone omona utyivila okupunga nawa otyivi notyiwa!” Tyotyili, ovilinga vietu viokuivisa novituwa oviwa vikokela ovanthu “motyimimi tyomuenyo” nokuhivilika Huku yetu.