Panda Elao Liove Liokuundapa Movilinga Viokuivisa
1. Oñgeni ovanthu ovanyingi mouye vatala ovilinga vietu viokuivisa?
1 Ovanthu ovanyingi mouye wa Satanasi vatala ovilinga vietu viokuivisa “ngowova.” (1 Cor. 1:18-21) Inkha katulunguka, olusoke olo luapenga lupondola okutusoyesa nokutepulula ombili yetu. (Pro. 24:10; Isa. 5:20) Omokonda yatyi tyesukisa okupanda elao lietu liokukala Onombangi mba Jeova?—Isa. 43:10.
2. Omokonda yatyi ovilinga viokuivisa viihanwa okuti “ovilinga vikola”?
2 ‘Otyilinga Tyimwe Tyikola’: Apostolu Paulu wapopia ovilinga viokuivisa okuti “ovilinga vikola.” (Rom. 15:15, 16) Oñgeni ovilinga viokuivisa “ovilinga vikola”? Okuundapa movilinga ovio tukala “ovaundapi kumwe na Huku” nokukuatesako opo enyina lia Jeova lisukukiswe. (1 Cor. 3:9; 1 Ped. 1:15) Jeova utala ovilinga vietu “ngotyilikutila tyehiviliko,” moluotyo ovilinga viokuivisa onthele imwe yakolela mefendelo lietu.—Heb. 13:15.
3. Omokonda yatyi ovilinga viokuivisa onondaka onongwa elao limwe enene?
3 Okuivisa onondaka onongwa elao limwe enene ovanthu ovanyingi vehena. Onoandyu mbuhambukwa okufuisapo otyilinga otyo iya tyotyili ñgeno mbetyilinga nawa. (1 Ped. 1:12) Mahi, Jeova waholovona ovanthu ovakuankhali, vekahi “ngonombiya mboluma” pala otyilinga otyo tyakolela!—2 Cor. 4:7.
4. Oñgeni matulekesa okuti tupanda ovilinga viokuivisa?
4 Vipaka Tete Momuenyo: Mokonda tupanda unene elao lietu, tutala ovilinga viokuivisa ‘ngotyipuka tyakolela vali’ momuenyo wetu. (Fil. 1:10) Ngotyo, tuovolei onosimano ambuho pala okuundapa movilinga ovio. Omuimbi upanda elao liae liokuimba kumwe novanongo ovakuavo vankhimana ulipongiya nawa pala okukaimba nokulinga ononkhono opo ayawise ounongo wae. Tupu, nonthue tulipongiyei tyina nkhele tuheneende movilinga viokuivisa opo tutyivile “okuundapesa nawa ondaka yotyili” nokulinga ononkhono opo tuyawise ‘ounongo wetu wokulongesa.’—2 Tim. 2:15; 4:2.
5. Olie upanda ovilinga vietu viokuivisa?
5 Wahayeke olusoke luapenga luovanthu ovanyingi lukusoyese. Hinangela okuti nkhele kuna ovanthu ovanyingi motelitoliu yetu vapanda okuvetalelapo. Moluotyo, onthue katuovola okupandwa novanthu. Tyakolela vali okunoñgonoka oñgeni Jeova elitehelela, iya oe upanda ononkhono tulinga.—Isa. 52:7.