Hetekela Ongeleka Yovauli—Jona
1. Ovituwa patyi oviwa ankho Jona ena?
1 Oityi uhinangela tyina usoka omuuli Jona? Vamwe vapondola okumutala ngatyina omukuawoma ine watena omutima. Tupu, oe ulekesa nawa okuti weliola omutima, nokuakola omutima, nokuhaundapela-ndyambi. Oñgeni tupondola “hetekela ongeleka” yovituwa oviwa via Jona?—Tia. 5:10.
2. Oñgeni tupondola okuhetekela Jona weliola omutima?
2 Okuliola omutima: Tete, Jona waile nkholo ahaende nokotyilongo atumwa. Otyo katyihuvisa mokonda ova Asiria ankho veiwe okuti ovaipai, iya o Ninive ankho aihanwa okuti “epundaumbo liokunengula ohonde.” (Nau. 3:1-3) Mahi, Jeova aviyula Jona, alekesa otyituwa tyokuliola omutima nokutavela otyilinga tyina apewa etyi atumwa otyivali. (Prov. 24:32; Jonas 3:1-3) Namphila ponthyimbi aanyene, Jona walingile ehando lia Jeova. (Mat. 21:28-31) Okuti nonthue tuatokola okuivisa onondaka onongwa, alo inkha tuaviyulwa ine tuna otelitoliu yepuiya?
3. Ovipuka patyi movilinga viove viokuivisa viesukisa okukola omutima nokuhaundapela-ndyambi?
3 Okukola Omutima Nokuhaundapela-Ndyambi: Etyi Jona aimbuka okuti walinga etokolo lihaviukile maipaesa ovatahi vowato, aholovona okuava omuenyo wae. (Jonas 1:3, 4, 12) Konyima, etyi afuisapo otyilinga tyae ko Ninive, waenda alo mokati kepundaumbo, tyafuile okuovola omphangu ikahi nawa opo ahimbike okuivisa ekoyeso lia Jeova. Otyo katyilekesa okuti ankho omukuawoma, mahi omuuli wa Huku wapama! (Jonas 3:3, 4) Iya onthue hono? Huku waava omutima wapama tuesukisa opo tuave oumbangi namphila tuyelwe. (Atos 4:29, 31) Okuhaundapela-ndyambi tyihanda okuava netyi tuna movilinga viokuivisa.—Atos 20:24.
4. Omokonda yatyi tuesukisila okuovola omuwo wokusokolola konongeleka onongwa mbovauli va Jeova?
4 Kese omuwo ove utanga ehipululo limwe konthele yovauli va Jeova, mopoloko ouwa inkha utala nawa atyiho valingile. Lipula okuti: ‘Oñgeni ñgeno nalinga? Oñgeni ndyipondola okuhetekela ovituwa viavo oviwa momuenyo wange?’ (Heb. 6:11, 12) Komutwe Ovilinga Vietu Viouhamba mavieta ononthele mbulekesa onondonga matulilongesila kovauli ovakuavo vekolelo va Jeova.