Onomphitilo Mbokuhivilika Jeova
1. Efuiko patyi epe malikuatesako “okuhilivika unene Jeova”?
1 Mohanyi yokualamba ya Tyitalale, kualingwa efuiko epe malikuatesako ovaivisi okukala ovakokoli ndyila vapola pokati okuava onovola 30 mu Tyitalale na Tyikukutu no mohanyi omutalelipo womawaneno apila ewaneno. Inkha omutalelipo upila ewaneno okuhimbikila konthyulilo yohanyi akavitulila monkhuavo, ovaivisi vapondola okuholovona ohanyi mavakala ovakokoli ndyila okulinga onovola 30. Ovakokoli-ndyila vapola pokati vapondola okukala peliongiyo aliho malingi novakokoli-ndyila ovakuavo. Otyo tyilekesa okuti inkha okulinga onovola 50 katutyivili, pahe tupondola “okuhilivika unene Jeova” movilinga vioukokoli-ndyila wapola pokati tukuana menima okulinga onovola 30!—Sal. 109:30; 119:171.
2. Oityi ovakokoli-ndyila ovo mavahambukilwa tyina vapilwa nomutalelipo womawaneno?
2 Tyina Omutalelipo Apila Ewaneno: Pahe ovanyingi vapondola okukala ovakokoli ndyila tyina ewaneno litalelwapo nokulipameka otyikati tyina tuundapa nae movilinga viokuivisa. (Rom. 1:11, 12) Ovakokoli-ndyila ovanyingi vapondola okuita kovilinga onthiki ike opo vaundape nomutalelipo womawaneno. Vana venda kovilinga mokati kosimano vapondola okumuita opo vaundape nae Motyasapalo ine Tyalumingu. Tupu otyo matyipameka unene ovakokoli-ndyila vapola pokati tyina vamakala peliongiyo liovakokoli-ndyila no vokuevilapo!
3. Omokonda yatyi Pehinangelo lia Tatekulu omuvo ukahi nawa pala okukala omukokoli-ndyila wapola pokati?
3 Mu Tyitalale na Tyikukutu: Vana ankho vetyiliya okukala ovakokoli-ndyila ohanyi ike okuundapa onovola 30 Pehinangelo lia Tatekulu, pahe vapondola okuundapa onohanyi onombali okuyawisa “otyilikutila tyavo tyehiliviko”! (Heb. 13:15) Ohanyi ya Tyitalale na Tyikukutu mbukahi nawa pala okuyawisa ovilinga vioukokoli-ndyila. Omanima aeho monohanyi ombo tuna ehambu liokukonga ovanthu opo veye Kehinangelo lia Tatekulu. Tupu, mokonda ovanyingi mavayawisa ovilinga viavo viokuivisa pomuvo Wehinangelo, matuundapa novaivisi velikalaila. Konyima Yehinangelo, tukatalelapo vana valekesa esuko nokuvelunda opo veye kelongomona liakolela. Okuti mohambukilwa onomphitilo ombo opo ukale omukokoli-ndyila wapola pokati?—Luc. 6:45.