Vokuita Omikanda Vietu, Omphitilo Ongwa Yokuhimbika Okuvelongesa Ombimbiliya
1. Omokonda yatyi eongano lia Jeova liavelela ondundo ovaivisi opo vaavele omikanda vietu vana veviita?
1 Ovanthu ovanyingi kavahande okulongeswa nonthue Ombimbiliya, mahi vahanda okutanga Omutala Womulavi no Despertai!. Moluotyo, eongano lia Jeova liavela ondundo ovaivisi opo vaavela ovanthu ovo omikanda. Putyina ovanthu vatanga apeho omikanda vietu, vesuka vali Nondaka ya Huku. (1 Ped. 2:2) Okuhulililako, ovipuka vimwe vatanga vipondola okuvelunda okutavela okulongeswa Ombimbiliya.
2. Oñgeni matukuatesako vana vaita omikanda vietu, vakale nesuko?
2 ‘Tapelela’ Ombuto Yotyili: Uhaavele vala omunthu omikanda, mahi hipulula nae, ovola okulinga oupanga nae. Otyo matyikukuatesako okunoñgonoka onkhalelo yomuenyo wae, netyi esuka natyo, no kuetyi etavela, netyi matyikukuatesako okutomphola nae nounongo. (Pro. 16:23) Lipongiya ononthiki ambuho ukemutalelapo. Inkha tyitavela, popia tyahasete ononthele mbumwe mbomikanda, okulinga ngotyo ukahi nokutapelela ombuto yotyili momutima wae. (1 Cor. 3:6) Kese nthiki umutalelapo honeka omukanda wemuevela, netyi muatomphola, no notestu muatanga.
3. Tuñgapi tuesukisa okukatalelapo vana vaita omikanda vietu?
3 Tuñgapi Tuesukisa Okukemutalelapo? Wesukisa okukondokako onohanyi ambuho pala okumutuaila omikanda omipe. Mahi inkha utyivila iya omunthu una esuko, upondola okukemutalelapo ovikando ovinyingi. Mongeleka, tyina wamemuavela omikanda, apalambe osimano ike ine onombali, upondola okukondokako opopi okuti: “Neya kuno opo nkhulekese otyipuka tyimwe namona momikanda nekuavelele.” Otyo matyimulundu okutanga onthele oyo. Inkha weitangale, upondola okumupula oityi asoka konthele yetyi atangamo, amutomphola katutu konthele yotyo. Mahi inkha omunthu utyihole tyokutanga omikanda vietu, upondola okukemutalelapo omuavela o tratadu, ine ombruchula, ine omukanda tukahi nokuava mohanyi oyo.
4. Pamwe, oityi tupondola okulinga opo tutale inkha vana vetuiita omikanda vahanda okulilongesa Ombimbiliya?
4 Wahakevele omunthu ekuite opo umulongese Ombimbiliya. Ove uhimbika okupopia nae. Namphila hamwe, aanyene okulongeswa Ombimbiliya kohale, pamwe upondola okumupopila onthele yati “Omapulo Ombimbiliya Akumbululwa,” ikahi Momutala Womulavi otale inkha uhanda okutomphola nove. Upondola okuhimbika okulilongesa nae Ombimbiliya tyihasete. Mahi, inkha kahande okulongeswa Ombimbiliya, upondola okutualako okumutuaila omikanda opo akale vali nesuko.