Omapulo Akumbululwa

◼ Oityi ovana vena okulongeswa opo vekule mopamphepo?

Ovohe Ovakristau vena okuendesila ovana vavo “mondongeso no movitumino via Jeova.” (Efé. 6:4; okatoi) Mongeleka, ovohe vamona okuti, otyiwa okutanga novana vavo otestu yonthiki apeho komuhuka. Mefendelo liombunga ine o momuvo omukuavo, ombunga ipondola okutala o novideo nokutomphola konthele yambo, nokupopia konthele yononthele mbukahi momukanda Os Jovens Perngutam (Ovakuendye Vapula), netyi vavasa Mombimbiliya, ine otyikuavo veete okuti matyikuatesako ovana. Mahi, tyina ovana “vekahi nokukola,” tupu vena okulongeswa otyili tyaya vali kohi Tyombimbiliya.​—Heb. 6:1.

Tala oñgeni tulongesa vana tuvasa movilinga viokuivisa. Tyina tuamavasi omunthu ine tukemutalelapo tulinga ononkhono mbokuhimbika okumulongesa Ombimbiliya nomukanda Oityi Ombimbiliya Tyili Ilongesa? Tyina tuameumane tuhimbika omukanda “Tualako Okukala Mohole ya Huku.” Omokonda yatyi? Omukanda Ombimbiliya Tyili Ilongesa ukuatesako omulongwa okuhimbika okunoñgonoka Ovihonekwa. Omukanda “Ohole ya Huku” uvekuateseko okuendela apeho mondonga mbo Mbimbiliya. Okulilongesa omikanda ovio vivali tyikuatesako ovape okukala “nomii” mu Kristu “nokupamena mekolelo.” (Col. 2:6, 7) Okuti omikanda ovio katupondola okulongesa navio ovana vetu? Naavo vesukisa okulongeswa konthele yofeto yeyovo, Nouhamba, nonkhalelo yo vokuankhia. Ovana tupu vesukisa okunoñgonoka omokonda yatyi Huku ayekelelako ononkhumbi nokuvekuatesuako okuimbuka okuti ouye uno ukahi konthyulilo. Vena okukuatesuako okutala okuti Onombangi mba Jeova vekahi motyili. Ovana tupu vesukisa okunoñgonoka ovitumino Viombimbiliya noñgeni vena okulilonga “onondunge mbokupunga etyi tyaviuka netyi tyapenga.” (Heb. 5:14) Tyotyili, ovohe vesukisa okutala eti liovana nokutala etyi vatokala okulongeswa. Mahi, ovana vamwe vena onondunge mbokunoñgonoka otyili tyaya kohi Tyombimbiliya tyina nkhele ovatutu.​—Luc. 2:42, 46, 47.