Omanima 100 Okuivisa Ouhamba wa Huku!
1. Oityi ovanthu va Jeova valundwa okulinga omanima omanyingi konyima?
1 “Talei, Ohamba ikahi nokutumina! Onwe muvaivisi vae. Moluotyo, ivisei, ivisei, ivisei, Ohamba nouhamba wae.” Onondaka ombo mbuava ondundo, mbapopia Nomukuatate Rutherford omanima omanyingi konyima. Ovanthu va Jeova avapewa ondundo yokuyandyanesa onondaka Mbouhamba wa Huku mouye auho. Iya nonthue otyo tukahi nokulinga! Ngo Vakristau votete, onthue tuivisa onondaka onongwa Mbouhamba wa Huku “kovanthu aveho mombuelo yeulu.” (Col. 1:23) Tyina tutala kotyita tyomanima okualamba, oityi tualinga opo tuivise Ouhamba wa Huku? Oñgeni matutualako okuivisa Ouhamba oo, putyina uhungi kokutukisa omanima 100 tunde apa wavialekua?
2. Oñgeni omikanda vietu vikahi nokuivisa Ouhamba wa Huku?
2 Okutala Konyima: Mokueenda kuomanima omanyingi, omikanda vietu vikahi nokuivisa Ouhamba wa Huku. Tunde mo 1939 Omutala Womulavi, omukanda tuundapesa vali una osapi yati: Omutala Womulavi Wivisa Ouhamba wa Jeova. Omukanda oo, upopia unene konthele Youhamba wa Huku netyi maukalinga. Omukanda o Despertai!, tupu nao upopia unene okuti Ouhamba wa Huku oo vala maukamanako ovitateka viovanthu. Omikanda ovio vivali, hono ovio vikahi nokupitiyua vali nokuawa mouye auho!—Rev. 14:6.
3. Ononkhalelo patyi mbumwe tuaundapesa opo tuivise Ouhamba wa Huku?
3 Ovanthu va Jeova vekahi nokuundapesa ononkhalelo ononyingi pala okuivisa Ouhamba wa Huku. Ponthyimbi ankho tuundapesa omatuku-tuku okuhikisa, nolaliu, no nofonografu. Ononkhalelo ombo mbetukuatesako okuyandyanesa onondaka onongwa kovanthu ovanyingi motyikando tyike, puetyi ankho kuna vala ovaivisi vehehi Vouhamba oo. (Sal. 19:4) Momanima ano, tukahi nokuundapesa o jw.org, pala okuivisa Ouhamba wa Huku kovanthu ovanyingi, alo umwe ku vana vekahi movilongo muna ovilinga vietu viailikwa.
4. Onkhalelo patyi vali yavilapo tukahi nokuundapesa?
4 Ovanthu va Jeova tupu vekahi nokuundapesa onkhalelo imwe yavilapo opo vayandyanese onondaka Mbouhamba wa Huku. Mongeleka, okuhimbikila momanima 1990, tulinga ononkhono mbokuyawisa ovilinga vietu viokuivisa umbo na umbo, na pana pavasiwa ovanthu ovanyingi, na pana patalama omatuku-tuku, no ponovenda. Momanima ano, kuaonganekwa otyilinga tyavilapo tyokuivisa mo mapundaumbo omanene mouye auho. Tupu omawaneno omanyingi ekahi nokuundapesa outuku-tuku womikanda no nomesa movilinga vokuivisa potyilongo tyavo, vipakwa paenda ovanthu ovanyingi. Mahi, otyilinga tyetu tyokuivisa Ouhamba wa Huku umbo na umbo tyitualako.—Atos 20:20.
5. Enima epe liovilinga, maliavela ovanyingi onomphitilo patyi?
5 Okutala Komutwe: Menima epe liovilinga malihimbika mu Tungonkhe, ovanyingi mavahimbika ovilinga vioukokoli-ndyila. Okuti nove upondola okukala omukokoli-ndyila? Inkha katyitavela, okuti ovikando vimwe upondola okukala omukokoli-ndyila wapola pokati? Tyilinge upondola okukala omukokoli-ndyila ine kutyivili, tyotyili Jeova mekuyambe mokonda yononkhono ulinga, opo uundape vali unene movilinga viokuivisa Ouhamba.—Mal. 3:10.
6. Kulindi yo 2014 maikala ohanyi yavilapo mokonda yatyi?
6 Mohanyi ya Kulindi yo 2014, Ouhamba wa Huku matuukisa omanima 100 tunde etyi wavialekua. Tupu, Omutala Womulavi wounyingi wohanyi oyo, maupopi unene konthele Youhamba wa Huku. Linga ononkhono mbokutambula omikanda ominyingi viohanyi oyo. Putyina tutala komutwe, tutualeiko kese umwe puonthue, “okuivisa onondaka onongwa Mbouhamba wa Huku,” kovanthu aveho mavatehelela.—Atos 8:12.