Okuhangununa Omatavelo Etu Konthele Yenima 1914

Ovihonekwa vitulunda tukale “tyafuapo pala okukumbulula kese umwe upula” konthele yomatavelo etu “okutyilinga nomutima wapoleya nonthilo onene.” (1 Ped. 3:15) Tyotyili pamwe tyipuiya okuhangununa otyili tyaya kohi Tyombimbiliya, ngo ñgeni tuanoñgonoka okuti Ouhamba wa Huku wahimbika okutumina 1914. Opo tutyivile, kualingwa ononthele onombali mbuna osapi yati “Etompho Konthele Yombimbiliya​—Onalupi Ouhamba wa Huku Wahimbika Okutumina?” Ononthele ombo mbukahi Momutala Womulavi matuave movilinga viokuivisa mu Kulindi na Kuhuhu. Tyina utanga ononthele ombo, tala omapulo ekahi pombwelo alekesa oñgeni omuivisi Cameron, ukahi mononthele ombo apopia monkhalelo ikalesa noupanga nomunthu avasa.

Oñgeni . . .

• apandula omulongwa opo vakale nolusoke lwike?​—Atos 17:22.

• alekesa okuti weliola omutima tyina ahangununa omatavelo ae?​—Atos 14:15.

Omokonda yatyi etyi alinga tyaviuka . . .

• okuhangununa etyi vapopia monondaka mbehehi?

• okutalama katutu-katutu otyo apula omunthu inkha wanoñgonoka etyi ahangununa?

• okuhapopi onondaka ononyingi?​—João 16:12

Tupandula unene Jeova, ‘Omulongesi wetu Wavilapo’ wetulongesa oñgeni tuhangununa otyili tyaya kohi Tyombimbiliya ku vana vena ondyala!​—Isa. 30:20.