Undapesa o Site Yetu Movilinga Viokuivisa​—“Omapulo Ombimbiliya Akumbululwa”

Monthele “Omalongeso Ombimbiliya” mo jw.org tupu muna ina yati “Omapulo Ombimbiliya Akumbululwa.” Inkha tunoñgonoka nawa omapulo oo, tupondola okutyivila okulekesa ovanthu oñgeni vapondola okuvasa omakumbululo Ombimbiliya mo jw.org. Omapulo oo apondola okutukuatesako okuhimbika etompho tyina tuivisa. Tupondola okupolamo epulo malisuku novanthu potyilongo, atuiti omunthu apopie etyi asoka, pahe atumupopila etyi Ombimbiliya ipopia, tyikahi mo jw.org. Konyima tupondola okumulekesa opi apondola okuvasa onondaka ombo. Tupu tupondola okumulekesa epulo mo site yatyo. Omukai umwe womutalelipo womawaneno ankho utomphola nawa novanthu, okuti: “Ovanthu ovanyingi velipula okuti, ‘o Huku uvelwa onombei mokonda yononkhumbi mbetu?’ Uhanda okunoñgonoka ekumbululo pehepano mono segundu 51?” Ngwe pahe ahikisa ekumbululo apola mo jw.org likahi mo telefone yae. Pokumanuhula emupopila okapitulu 11 komukanda Ombimbiliya Ilongesa.