Kuatesako Ovamphoki Okunoñgonoka Jeova
1. Oñgeni Jesus alekesa okuti una okankhenda novamphoki?
1 Ankho kuakamba ononthiki mbehehi opo Jesus aipawe. Etyi ankho ekahi nokutunda mo Jerikoo, ovanthu vamwe ovamphoki veli popepi no Jerikoo, avahimbika okumulaveleya, avati: ‘Tatekulu, kala-vo nokankhenda nonthue!’ Namphila Jesus etyii okuti ankho kuakamba omuvo uhehi opo aipawe, watalama, aihana ovamphoki opo veye kwe iya, evehakula. (Mat. 20:29-34) Oñgeni tupondola okuhetekela ongeleka ya Jesus, etyi akalele nokankhenda novamphoki ovo?
2. Oñgeni tupondola okukuatesako omumphoki tuvasa tyina tuava oumbangi mounyingi?
2 Kala Omukuatesiko: Ankho uvasa omunthu omumphoki, namphila pamwe kuemuvasile meumbo liae mukukunya, ankho una etyi ekahi nokulinga, mukuatesako. Inkha uvekuvekuatesako vahambukua, mahi potete nkhele vapondola okukala nowoma. Mahi, okukala noundyandyi navo, nokulekesa okuti wesuka navo, tyipondola okuvekalesa nawa. Hinangela okuti ovamphoki velikalaila, ankho uvenoñgonoka, motyivili okuvekuatesako. Tyina wamemukuatesako, ankho tyitavela mupopila okuti ove ulongesa ovanthu Ombimbiliya. Mutangela otestu imwe Mombimbiliya, ngetyi o Salmo 146:8 ine Isaia 35:5, 6. Ankho utyivila okutanga o Braile, (omikanda vio vamphoki) mupula ankho uhanda omikanda ovio mavimukuatesako okunoñgonoka vali nawa Ombimbiliya. Tupu upondola okumukuatesako okupola mo jw.org ononthele mbatangwa. Ankho una o kombutador ina o programa yokutanga omikanda ovio, upondola okumupolela mo jw.org omikanda, pana pena RTF (Texto Formato Rico).—Tala okakasa “Putyina Ukuatesako Omumphoki. . .”
3. Opi tupondola okuovola ovamphoki potyilongo tyetu?
3 Ovolei Ovamphoki: Ha apeho tuvasa ovanthu ovamphoki movilinga viokuivisa umbo-na-umbo, mokonda vena owoma wokupopia novanthu vehei veya momaumbo avo. Moluotyo, tyesukisa okulinga ononkhono, pala ‘okuovola vana’ vahanda okutehelela opo uveavele oumbangi. (Mat. 10:11) Okuti pena omunthu wii omumphoki kovilinga viove, ine o kosikola? Ovola okutomphola nae. Ankho potyilongo tyenyi pena osikola mulongehiwa ovamphoki, veavela omikanda vietu viahonekwa mo Braile opo vatange. Okuti una omunthu wii una wavo omumphoki? Okuti potyilongo tyove pena ovanthu vena otyilinga tyokukuatesako ovamphoki, ine hamwe pena ondyuo omu vakala? Popila umwe mombunga yae ine omunthu wokutambula ava veya ine omutumini wondyuo oyo, okuti, Onombangi mba Jeova, vesuka nokukuatesako ovamphoki, nokuveavela omikanda vialingwa mo Braile, no nonthele ononkhuavo mbatangwa. Mulekesa omulao Wombimbiliya wokuti Huku makamanako oumphoki. Tupu upondola okumulekesa ovidiu ikahi mo jw.org, yati: Sem ela, eu me sentiria perdido, ipopia oñgeni omulume umwe omumphoki, apola ouwa kokutanga Ombimbiliya mo Braile. Ankho upopia nawa omokonda yatyi weila, matyikuavela omphitilo yokupopia nomumphoki.
4. Oityi tulilongesila kongeleka ya Janet?
4 Omphange umwe omumphoki utiwa Janet, wakatalelepo ovanthu vamwe ovamphoki mondyuo vakala. Omphange oo, atomphola nomuhikuena umwe avasamo. Janet apopila omuhikuena okuti: “Jesus wahakulile ovanthu ovamphoki opo alekese etyi meiya okulinga ovanthu aveho vahamonopo.” Janet emutangela omukanda wa Revelação 21:3, 4, ahangununa oñgeni eulo olio maliya okufuisuapo Nouhamba wa Huku. Omuhikuena ahuvu unene, ati: “Ame nalumwe neivile omunthu umwe omumphoki upopia otyipuka ngotyo. Ovanthu ovanyingi vapopia okuti, aluho ovanthu vamwe vakalela ovamphoki, omokonda vena etyi valingile, ine hamwe ovakuaukulu vavo.” Jenet emutumu omukanda Ombimbiliya Ilongesa, mo internete. Pehepano Janet ulilongesa Ombimbiliya nomuhikuena oo, tuvali mosimano.
5. Namphila tuhevili okuhakula ovamphoki nga Jesus, oñgeni okukala nokankhenda navo tyitukuatesako?
5 Tyotyili, onthue katutyivili okuhakula ovamphoki ngetyi Jesus alingile, mahi, tupondola okukuatesako ovanthu okunoñgonoka otyili Tyondaka ya Huku, havo vana vala huku youye uno atuikisa momalusoke, mahi alo umwe ovamphoki. (2 Cor. 4:4) Jesus wahakulile ovanthu vevali ovamphoki ankho vekahi popepi notyilongo tyo Jerikoo, mokonda “yokuakala nokankhenda” navo. (Mat. 20:34) Ankho nonthue tukala nokankhenda novanthu vokuheetepo, matukala nehambu liokuvekuatesako vanoñgonoke Jeova, una makamanako oumphoki.