OMWENYO WETU WOUKILISITAU
Lifwiika Pahetyino Tyina Nkhele Wehenevele
Omokonda yatyi wesukisila okulifwiika? Omokonda ouvela uuhulukila ovanthu aveho, pamwe ukahi umwe nawa, tyina ukati-ko vala ñga wauhulukilwa nonombela otualwa kosipitali. Otyo umwe tuesukisila okulifwiika pahetyino opo haa tyina tyiyapo etyi matulingi tutyii-ale. Ine otyo ulinga ngotyo tyina tyemeyapo motyivili umwe okuhakulwa ngetyi Siovaa ahanda, kumaliatela kotyitumino tyae tyayemba kohonde. — Ovil. 15:28, 29.
Oityi una okulinga ulifwiike?
Tete likuambela, pahe ohoneka omukanda wohonde (DPA).a Omuivisi wambatisalwa-le ine utupu omukanda oo, opo una okuita komukulu womikanda, emuavele-o. Vokuna ovana ovatutu, tupu vena okuita omukanda utiwa Cartão de Identificação, ngao vahoneka avewavela ovana vavo.
Ine umulemi ita kovakulu vewaneno omukanda utiwa Informações para Gestantes (S-401). Omukanda oo maukukuatesako okunoñgonoka oñgeni haa mohakulwa, haunene umwe tyina wemeya pokukutula.
Ine wavela atyitiwa motandwa hamwe avekuti mombasala, tyipopila ovakulu vewaneno, tupu opopila vomosipitali okuti pena ovakulu vamwe Onombangi maveya okumphahaula.
Oityi ovakulu vewaneno vapondola okulinga? Ovakulu vewaneno vapondola okukukuatesako okuhoneka omukanda wohonde (DPA). Mahi ovakulu vewaneno kamavekupopila etyi una okuhoneka pomukanda oo, oñgeni uhanda okuhakulwa ove muene utyii. (Loma 14:12; Gal. 6:5) Tyina wamapopila ovakulu vewaneno okuti vahanda okukuhakula nohonde, ovakulu ovo kamavasete-ale mavapopi novakulu vokukuatesako Onombangi Tyina Vameya Pokuhakulwa (Colih) vekukuateseko.
Oñgeni ovakulu vokukuatesako Onombangi Tyina Vameya Pokuhakulwa (Colih) mavekukuatesako? Ovakulu ovo vena otyilinga tyokupopila onondotolo novokuundapa monosipitali omokonda yatyi Onombangi vahahakulilwa nohonde, avevelekesa-tyo mo Mbimbiliya. Mavatomphola nondotolo ili nokukuhakula vatale ine upondola okuhakulwa novihemba ovikuavo. Vapondola okuvasa ondotolo imwe hamwe maikutavela okukuhakula tyehekupake ohonde.
TALA OVIDIU YATI: OITYI MOLINGI UHAKULWE NAWA, MAHI TUPU OHAMBUKISWA SIOVAA, PAHE OKUMBULULA OMAPULO AA:
Oityi welilongesila movidiu upondola okulinga ulifwiike tyina nkhele wehenevele?
a Omukanda Kalako Nomwenyo Apeho! pelongeso 39 maukukuatesako okunoñgonoka etyi una okulinga opo tyina wameya pokuhakulwa, olingi umwe ovipuka nonondunge, ohanumanesa Huku.