ONTHELE YOKULILONGESWA 7
Onthue Tuhole Unene Tate Yetu Siovaa
“Onthue tuna oluembia, mokonda Huku wakala noluembia no onthue tete.” — 1 SUAU 4:19.
OTYIIMBO 3 Ononkhono Mbetu, Ekevelelo Lietu, Onthumbi Yetu
ETYI MATULILONGESAa
1-2. Oityi Siovaa alinga opo etuete mombunga yae iya omokonda yatyi?
SIOVAA wetukonga opo tumufende atukala mombunga yovaumbili vae. Olio elao lihevilwa okuelekwa! Ombunga yetu ina ehambu. Mongeleka, tuna ovakuatate no nomphange velipakula ku Siovaa, iya vena ekolelo motyilikutila Tyomona wae Sesusi. Tupu, tuna omuenyo ukahi nawa pahetyino, iya tukevelela okukakala apeho, tyilinge o keulu ine o mouye omupe pano pohi.
2 Siovaa wetueta mombunga yae mokonda yoluembia ena no onthue. Mahi opo etyilinge, wesukisile okuava otyipuka tyakolela unene kwe. (Suau 3:16) Onthue ‘tualandwa nofeto onene.’ (1 Kol. 6:20) Ofeto yeyovo, yaikula ondyila opo tukale noupanga wapama na Siovaa. Tala okuti Omunthu wakolela vali mouye auho, o Tate yetu! Iya ngetyi tuelilongesa monthele yokualamba, Siovaa, o Tate ukahi vali nawa ku aveho.
3. Omapulo patyi pamwe tulipula? (Tupu tala okakasa kati: “Okuti Siovaa Wesuka na Ame?”)
3 Onthue pamwe tulitehelela ngo muhoneki woviimbo welipulile okuti: “Oityi mandyikondolela Siovaa, mokonda yovipuka aviho oviwa andingila?” (Sal. 116:12) Ekumbululo liepulo olio olieli: Onthue nalumwe matutyivili okukondolela Tate yetu wo keulu. Mahi oluembia ena no onthue lutulunda okumuhumba. Apositolu Suau wahoneka okuti: “Onthue tuna oluembia, mokonda Huku wakala noluembia no onthue tete.” (1 Suau 4:19) Mahi oñgeni tupondola okulekesa okuti tuhole Tate yetu?
TUALAKO OKUFUENA KU SIOVAA
Onthue tulekesa okuti tuhole unene Tate yetu wo keulu Siovaa, tyina tulikuambela apeho, na tyina tumutavela, na tyina tukuatesako vakuetu okumunoñgonoka (Tala ono palagrafu 4-14)
4. Ngetyi tyipopia Tiaku 4:8, omokonda yatyi tuesukisila okulinga ononkhono mbokukala omapanga a Siovaa?
4 Siovaa uhanda tukale omapanga ae. Otyo etupopilila okuti tuesukisa okutomphola nae. (Tanga Tiaku 4:8.) Utulunda ‘tutualeko okulikuambela’ nonthumbi yokuti apeho metutehelela. (Loma 12:12) Siovaa nalumwe metupopila okuti ‘nkhele nakuata omapita; ine hono naponwa.’ Mahi no onthue tuesukisa okumutehelela. Tumuiva tyina tutanga Ombimbiliya, nomikanda omikuavo, na tyina tutehelela nawa momaliongiyo. Ngetyi okutomphola tyikuatesako ovana okukala omapanga novo tate yavo, tupu okutomphola na Siovaa tyitukuatesako okutualako okukala omapanga ae.
Tala opalagrafu 5
5. Tyina tulikuambela oityi tuesukisa okulinga opo tupopie umwe etyi tyikahi momutima wetu?
5 Nkhele soka komalikuambelo ove! Siovaa uhanda tumuikulile omutima wetu tyina tulikuambela. (Sal. 62:8) Otyiwa tulipule okuti: ‘Okuti tyina ndyilikuambela ndyipopia umwe etyi tyikahi kohi yomutima wange, ine okombanda vala ngatyina otyiso?’ Tutyii okuti ove uhole unene Siovaa iya uhanda okutualako noupanga wapama nae. Mahi opo oupanga wenyi upame, wesukisa okutomphola nae momalikuambelo. Mupopila etyi tyikahi monthulo yove. Tyina wahambukwa mutolela-tyo; iya tyina wanumana uhanyine onyengo. Kala nonthumbi yokuti Siovaa apeho mekukuatesako.
6. Oityi tuesukisa okulinga opo tutualeko okukala omapanga a Tate yetu wo keulu?
6 Opo tutualeko okukala epanga lya Tate yetu wo keulu tupu tuesukisa okumupandula. Onthue tulitehelela ngetyi tyahonekele omuhoneki woviimbo okuti: “Ove walinga ovipuka ovinyingi Siovaa Huku yange. Omalusoke ove novilinga viove oviwa unene pala onthue. Kutupu nawike weelekua nove. Katyitavela okuvalula ovilinga viove nokupopia konthele yavio, mokonda ovinyingi unene!” (Sal. 40:5) Katyituuka vala okupandulila momutima, mahi tupu tuesukisa okutyilekesa movipuka tupopia nevi tulinga. Onthue tukahi mouye muna ovanthu vahapandula ovipuka Huku evelingila. Atee umwe Ombimbiliya yapopia okuti “kononthiki mbahulilila” ovanthu kamavakapandula. Ngotyo, tyina onthue tupandula tulekesa okuti tuelikalela navo. (2 Tim. 3:1, 2) Onthue katuhande okukala ovanthu vokuhapandula!
7. Oityi Siovaa ahanda tulinge, iya omokonda yatyi?
7 Ovohe kavahande ovana vavo vakalele vala okulitala komulungu. Vahanda vakale omapanga. Na Siovaa otyo ahandela ovana vae. Uhanda velivile, avahakalela vala okulitala komulungu. Oluembia tuna pokati ketu, oluo lutuimbukisa okuti tuvafendeli votyotyili va Huku. (Suau 13:35) Ongetyi tyaimbile omuhoneki umwe woviimbo okuti: “Otyiwa ngatyi tyina ovakuatate vakala kumwe aveho newaneko!” (Sal. 133:1) Tyina tuna oluembia novakuatate no nomphange, ngotyo tulekesa okuti tuhole Siovaa. (1 Suau 4:20) Otyiwa okukala mombunga ina ‘ohole, nokankhenda!’ Ombunga oyo, ovakuatate vetu no nomphange. — Efe. 4:32.
TAVELA SIOVAA OPO ULEKESE OKUTI UMUHOLE
Tala opalagrafu 8
8. Ngetyi tyipopia omukanda wa 1 Suau 5:3, omokonda yatyi tutavelela Siovaa?
8 Siovaa uhanda ovana vetavele kovohe, iya uhanda atuho tumutavele. (Efe. 6:1) Onthue tuna okutavela Siovaa mokonda oe wetutunga, utuavela etyi tuesukisa opo tutualeko nomuenyo, iya omunongo vali kovohe aveho. Mahi haunene tumutavela mokonda tumuhole. (Tanga 1 Suau 5:3.) Tyayandyuluka nawa okuti tuna omahunga omanyingi opo tutavele Siovaa. Mahi no ngotyo, ketukuluminya okulinga etyi ahanda, mokonda wetuavela ounongo wokuliholovonena. Naina, otyo Siovaa ahambukilwa unene tyina tuholovona okulinga etyi ahanda opo tulekese okuti tumuhole.
9-10. Omokonda yatyi tyakolela okunoñgonoka ovitumino vya Huku nokuendela-mo?
9 Ovohe vahanda ovana vavo vakale nawa. Otyo vapopilila ovana vavo okuti: ‘Linga etyi, etyi katyilingwa!’ Atyiho otyo o pala ouwa wovana vavo. Tyina ovana vaendela muetyi vapopilwa novohe, valekesa okuti vena onthilo navo iya veveyumba onthumbi. Mahi haunene, tuesukisa okunoñgonoka ovitumino vya Tate yetu wo keulu, atulingi ononkhono mbokuendela-mo. Tyina tulinga ngotyo, tulekesa okuti tumuhole iya tuna onthilo nae. Tyihe-otyo vala, tukala nomuenyo ukahi nawa. (Isa. 48:17, 18) Mahi vana vahaendela movitumino vya Siovaa, vakala novitateka ovinyingi. — Gal. 6:7, 8.
10 Tyina tuendela movitumino vya Siovaa, tulityilika ovipuka ovinyingi vipondola okutuvelesa, nokutuetela oluihamo. Iya haunene tuyakulila oupanga wetu na Tate yetu wo keulu. Siovaa wii etyi tyitukalesa nawa. Omphange umwe ukala ko Estados Unidos utiwa o Aurora, wati: “Ndyityii okuti inkha apeho ndyitavela ku Siovaa, omuenyo wange maukala nawa.” Etyi Aurora apopia, otyili! Soka komuenyo wove, olipulu okuti: Oñgeni okutavela Siovaa tyihole okunkhuatesako?
11. Okulikuambela tyitukuatesako okulinga-tyi?
11 Okulikuambela ku Siovaa, tyitukuatesako okumutavela atee umwe tyina tyihapepukile. Pamwe tyitupuiya okutavela ku Siovaa mokonda tuvakuankhali. Mahi tuesukisa okutualako okuluisa eyembelo olio. Nthiki imwe, omuhoneki woviimbo welivondelele ku Siovaa okuti: “Paka momutima wange ehando liokukutavela.” (Sal. 51:12) Omphange umwe omukokoli-ndyila utiwa o Denise, wati: “Tyina tyamemphuiya okutavela otyitumino tyimwe tya Siovaa, ndyilikuambela opo ankhuateseko okulinga etyi tyaviuka.” Tupondola okukala nonthumbi yokuti Siovaa apeho makumbulula omalikuambelo ngoo. — Luka 11:9-13.
KUATESAKO VAKUENYI OKUHUMBA TATE YETU
12. Ngetyi tyipopia Ova Efesu 5:1, oityi tuesukisa okulinga?
12 Tanga Ova Efesu 5:1. Mokonda onthue ‘tuvana ononthyolwe’ va Siovaa, tulinga ononkhono mbokumuhetekela. Mahi oñgeni matuhetekela ovituwa vya Siovaa? Oputyina tukala noluembia na vakuetu, nokankhenda, atuveevela tyina vetulinga otyipuka tyitunumanesa. Okulinga ngotyo tyakolela mokonda tyina vana vahaumbila Siovaa vamona ovituwa vietu oviwa, mavahande okumunoñgonoka. (1 Pet. 2:12) Ovohe vesukisa okulinga ononkhono mbokuhetekela Siovaa monkhalelo vatekula ovana vavo. Tyina ovohe vahetekela Siovaa, tyilunda ovana okuhanda okukala omapanga a Tate yetu woluembia.
Tala opalagrafu 13
13. Oityi tuesukisa okusoka opo tukole omutima?
13 Ovana ovatutu vena otyituwa tyokulimphandela ovo tate yavo. No onthue tulimphandela Tate yetu wo keulu Siovaa iya tuhanda vakuetu navo vemunoñgonoke. Tulitehelela ngo Hamba Daviti wahonekele okuti: “Ame mandyilimphandela Siovaa.” (Sal. 34:2) Mahi hamwe kupopi unene mokonda una ohonyi. Oityi matyikukuatesako okupopila vakuenyi konthele ya Siovaa? Otyipuka matyikukolesa omutima, okusoka kehambu Siovaa makala nalio, no ñgeni omuenyo wovanthu maukala nawa inkha uvepopila konthele ya Tate yetu wo keulu. Uhesuke, Siovaa mekuavela etyi wesukisa na ukole omutima. Ngetyi akuatesileko ovaumbili vae potyita tyo tete okuhatili owoma, no ove mekukuatesako. — 1 Tes. 2:2.
14. Omokonda yatyi tyakolela okupopila vakuetu onondaka onongwa?
14 Siovaa utupu okapungulula. Iya uhambukwa unene tyina atala okuti no onthue tuna oluembia na vakuetu, tyihatale kotyivala. (Ovil. 10:34, 35) Onkhalelo imwe yokukala nokankhenda na vakuetu, okuvepopila onondaka onongwa Mbouhamba. (Mat. 28:19, 20) Oñgeni ovilinga ovio vihole okukuatesako ovanthu? Vana vetavela onondaka onongwa, vakala nomuenyo ukahi nawa pahetyino iya vakevelela okukakala apeho mouye omupe. — 1 Tim. 4:16.
HUMBA TATE YETU OPO UKALE NEHAMBU
15-16. Omahunga patyi tuna opo tukale nehambu?
15 Mokonda Siovaa o Tate wokuna oluembia novana vae, uhanda ombunga yae ikale nehambu. (Isa. 65:14) Onthue tuna ovipuka ovinyingi vipondola okutuetela ehambu pahetyino, atee umwe inkha tuna ovitateka. Mongeleka, onthue tutyii nawa okuti Tate yetu wo keulu Siovaa, una oluembia no onthue. Tuna enoñgonoko liafuapo Liondaka ya Huku Ombimbiliya. (Jer. 15:16) Onthue tuna ombunga ina vali ehambu konombunga ambuho, mokonda tuna ovakuatate no nomphange vehole Siovaa, vena oluembia na vakuavo iya vaendela movitumino vyo Mbimbiliya. — Sal. 106:4, 5.
16 Onthue tupondola okutualako nehambu mokonda tutyii okuti omuenyo maukakala vali nawa komutwe wandyila. Tutyii okuti apa katutu, Siovaa makamanako ovivi aviho. Pokati kouhamba wae, Siovaa makapilulula ohi, aikala omphangu imwe ongwa. Tupu tukevelela omuvo Siovaa makatutilisa vetu vokuanyima opo tukakale vali atuho. (Suau 5:28, 29) Matukahambukwa ngatyi! Iya tyakolela vali, tutyii okuti apa katutu, aveho keulu na pano pohi, matukafenda, nokuhilivika Tate yetu woluembia Siovaa.
OTYIIMBO 12 Jeova Huku, Omunene
a Onthue tutyii okuti Tate yetu Siovaa una oluembia olunene no onthue, iya wetukonga mombunga yovaumbili vae. Mokonda yotyo, onthue tumuhole unene. Monthele ei, matulilongesa ovipuka vimwe tupondola okulinga opo no onthue tulekese okuti tuhole unene Tate yetu woluembia.