Nalinga Vala Etyi Ankho Ndyina Okulinga

Ame natyitwa mo 1954, natyitilwa mepunda-umbo lyo Saint Paul, Minnesota, ko Estados Unidos. Onthue tuatyitwa vetano, ame ndyikwai kotyiveli. Ankho tyati atuhena-tyo, tupu atuahahepele. Ombunga yange ankho ovo Katolika. Andyipakwa mosikola yo Katolika, tupu ankho ndyina oulinga umwe mongeleya. Mahi no ngotyo ankho hanoñgonokele nawa Ombimbiliya. Ankho ndyityii umwe okuti kouye kuna Huku, wokuatunga ovipuka aviho, mahi ankho hiyumbu onthumbi mongeleya.

ETYI NANOÑGONOKA OTYILI

Menima lyo tete nahimbika okulilongesa okuamena ovanthu mosikola onene ankho itiwa William Mitchell, Onombangi mba Siovaa aveya meumbo liange. Monthiki veya, ankho ndyikahi nokukoha, andyivetumu veye onthiki onkhuavo. Etyi onthiki onkhuavo veya, andyivepulu ovipuka vivali: “Omokonda yatyi ovanthu ovakalavi vakalela nomuenyo omuwa, tyipona ovanthu ovawa? Oityi nesukisa okulinga opo ndyikale nehambu?” Avamphe omukanda A Verdade Que Conduz à Vida Eterna no Mbimbiliya. Pomuvo opo, Ombimbiliya ankho ongole. Andyitavela okulilo-ngesa Ombimbiliya, andyinoñgonoka ovipuka ovinyingi. Andyinoñgonoka okuti Ouhamba wa Huku ukahi vali nawa tyipona omautumini aeho ovanthu. Mahi tupu na ame ankho ndyityeete umwe okuti tyina ovanthu vatumina, vaetela vala vakuavo ononkhumbi.

Konthyimbi yenima lyo 1982, andyilipakula ku Siovaa, andyiya okumbatisalwa motyonge tyononthiki ononthatu ankho tyina osapi yati: “Otyili Tyouhamba.” Otyonge otyo, tyalingililwe mondyuo imwe onene ko Saint Paul. Osimanu yalandulako, andyikondoka ko Minnesota ndyikalinge opolova opo ndyikale omuameni. Mohanyi ya Outubro, andyipopilwa okuti napasala. Pahe ankho ndyipondola okuhimbika okuamena ova-nthu monombonge.

Motyonge otyo, andyinoñgonoka-mo omukuatate umwe ankho uundapa mo Mbetele yo ko Brooklyn, utiwa Mike Richardson. Amphopila okuti mombala yetu muesukisa ovanthu vaamena eongano, novakuatate monombonge. Andyihinangela onondaka mbomulume wo ko Etiopia mbuvasiwa mu Ovilinga 8:36, andyihoneka omukanda wokukaundapa mo Mbetele (opetisau).

Etyi nakala Ombangi ya Siovaa, ovo tate avehetyihande. Tate amphulu okuti: ‘Ove ñga tyina ukaundapa mo Mbetele, mopoloko-tyi?’ Andyimupopila okuti himafetwa, mahi onohanyi ambuho mandyipewa okambongo, opo ndyilande ovipuka nesukisa.

Mo 1984, andyimane ovilinga ankho ndyina-vyo mombonge, andyikaundapa mo Mbetele yo ko Brooklyn, Nova York. Andyiundapa moseketa yokuamena eongano novakuatate. Nalingile naundapele omanima evali mombonge, moko-nda tyankhuatesako okukala tyafuapo pala ovilinga ovinyingi tuakalele navio.

TUALANDA ONDYUO ITIWA STANLEY

Mohanyi ya Novembro yo 1983, eongano alilande ondyuo imwe onene ko Jersey City, mepunda-umbo lyo Nova Jersey. Ovakuatate avahonekela ovatumini omukanda okuita opo vaviukise omalusi, novikuavo vali. Etyi velivasa novatumini, avevepopila okuti ankho vahanda o Stanley ikale ondyuo yokulingila ovionge. Otyo atyieta onondaka mona wange, mokonda ovitumino ankho vipopia okuti onongeleya kambupondola okutungila pokati konovenda, ngwe o Stanley ankho ili pokati konovenda. Ovakuatate avelivondela, nii vala ovatumini avehetavela ikale ondyuo yovionge.

Mosimanu nehika mo Mbetele, eongano aliende kombonge okukelikesala mokonda kavayekelwe o Stanley ikale ondyuo yokulingila ovionge. Ankho netyiliya-le onomphela ngo ombo tyetyi naundapele omanima evali mombonge yo Saint Paul, Minnesota. Umwe povaameni vetu, apopila ovakoyesi okuti mondyuo muna, mualingililwe-ale ovipuka ovinyingi. Ovanthu

ankho omo vatalela onosinema, novaimbi omo ankho vaimbila. Opo omokonda yatyi mamuhalingililwa ovionge? Etyi ovakoyesi vatomphola poyavo, omphela aiyembe kovatumini vo Jersey City. Avevepopila okuti ankho vena okuyeka Onombangi mba Siovaa valingile-mo etyi vaha-nda. Andyimono okuti oseketa yokuamena onomphela mbeongano, ankho ikahi nokukuatesako Siovaa okufuisapo etyi ahanda. Ankho nahambukwa unene etyi ndyikahi nokukuatesako Siovaa monkhalelo ngoyo.

Ovakuatate avaviukisa-mo ovipuka ovinyingi, nii avahakala enima. Mu 8 ya Setembro yo 1985, amulingilwa eliongiyo liokuvitula osikola yo Gileade 79. Ku ame, ankho elao limwe enene okuundapa moseketa yokuamena onomphela mbeongano no mbovakuatate. Etyi nehenenyingile mo Mbetele, ankho ndyihole umwe ovilinga viange mombonge. Mahi pahe ehambu ankho ndyinalyo, lilamba, mokonda ankho ndyityii okuti ndyikahi nokuundapela Siovaa. Mahi pomuvo opo, ankho hityii okuti komutwe wandyila mandyiamena onomphela ononyingi mbeongano no mbovakuatate.

OKUAMENA OVAKUATATE OPO VAHAPAKWE OHONDE

Kohale, onondotolo ankho kavetavela tyina omunthu umwe Ombangi evepopila okuti kahande okupakwa ohonde, haunene omulemi. Ankho vapopia okuti omulemi haeko upopia inkha mapakwa ohonde ine kamapakwa ohonde. Ovakoyesi ankho vapopia okuti ine omulemi kapakwa ohonde, upondola okunkhia, omona esala ngotyo.

Monthiki 29 ya Dezembro yo 1988, omphange umwe utiwa Denise Nicoleau apululukwa okana okamukuendye. Olukula alumutundu unene (apumu), ondotolo aimupopila okuti una okupakwa ohonde. Denise ehetavela. Komuhuka, ondotolo oyo no vakuavo vaundapa mosipitali, avaende komukoyesi umwe, avakaita Denise apakwe ohonde. Omukoyesi etavela vala, nii okupopia okuti omphela ina okukoyeswa, nii okupopia na Denise yatyo, nii omulume wae.

Pahe Mutano 30 ya Dezembro, avemupake ohonde, na apa omulume wae, nombunga yae vetyianya. Kounthiki, vamwe mombunga ya Denise, avatualwa mokaleya. Ngoti nomukulu wewaneno wike uti vevali-ale katwii, vatuailwe mokaleya. Tyatiwa ankho vapakwa mokaleya mokonda ankho vekahi nokuanya Denise apakwe ohonde. Tyina tyiti Tyasapalo komuhuka, ovakuatate ovo avapopiwa unene mo jornale, no molaliu, no motelevisau.

Tyasikunda komuhuka, andyikapopia nomutumini wo vakoyesi utiwa Milton Mollen. Andyimupopila atyiho tyaendapo. Andyipopi okuti omukoyesi una wokuatuma okumupaka ohonde, wapengesa unene. Anthumu ndyikondoke-ko

komakumbi tutomphole ovitumino vielikuata nomphela oyo. Omukuatate Philip Brumley anthyindikila. Omukoyesi Milton tupu aihana ovaameni vo mosipitali. Ovipuka avitokota unene, atee umwe omukuatate Philip anthyonekela momukanda wae opo ndyitule omutima. Walingile wahonekele, mokonda pahe ankho ndyina nokunumana.

Atukala oola nokulinana-nana. Omukoyesi Milton apopi okuti hahe tueile muhuka komuhuka, omphela yetu ngayo itetekela. Puetyi ankho tukahi nokulupuka, Omukoyesi apopila ovaameni vo mosipitali okuti: “Muhuka ovipuka mavileme, kuatesei!” Onondaka ombo ankho mbulekesa okuti ovaameni vo mosipitali vena okutala nawa. Andyilitehelela ngatyina Siovaa ankho ena noku-tupopila okuti tualeiko, mamutyivili. Ankho otyiwa okumona okuti onthue Siovaa atuma opo afuisepo etyi ahanda.

Atulala nokulilongesa etyi matukapopia komuhuka. Mokonda ombonge ankho ikala vala popepi no Mbetele, ovanyingi vo moseketa yokuamena avaendela vala pohi. Etyi tuehika oko, atupopila ovakoyesi vekuana etyi ankho tusoka. Ondaka aiwila komukoyesi wokuatumine Denise apakwe ohonde. Ovakoyesi avatetulula omphela, avapopi okuti omphange Denise ñgeno ankho kapakwa ohonde. Tyihe-otyo vala, avahindi otyitumino tyokuti omunthu kapondola okupakwa ohonde, ahapopilwa.

Pahe konyima, Ombonge Ononene yo ko Nova York, nayo aipopi okuti muene ñgeno ankho o Denise yatyo upopia ine uhanda okuhakulwa nohonde ine kahande. Oyo, omphela yo tete nakuatesako okutetulula yelikuata nohonde. Akuya vali onomphela ononkhuana, mahi ohonde vala. (Tala okakasa kati: “Onomphela Mbumwe Tuaamena Konombonge Ononene.”) Tupu naamenene eongano novakuatate monomphela mbelikuata nonondyuo, nonohika, novana, nokulihenga.

OMBUNGA YANGE

Etyi tuelinoñgonoka na Dawn, ankho una ovana vetatu. Omuenyo wae ankho kawapepukile. No ngotyo ankho uundapa opo atekule ovana vae otyo omukokoli-ndyila. Ovipuka ovio ankho vinthyuvisa unene! Mo 1992, tuali notyonge tyononthiki ononthatu mo Nova York, ankho tyina osapi yati: “Tuatyinda Otyimimi.” Andyimupopila okuti ndyikuhanda, etavela. Etyi pakala enima, atulinepe. Omukai wange ondyandyi, usuka unene nokutualako noupanga omuwa na Siovaa. Tuna vala ehambu tunde apa tuelinepa. Dawn, elao liange Siovaa ampha. — Pro. 31:12.

Etyi tuelinepa na Dawn, otyiveli tyatyo ankho una omanima 16, omukuavo una 13, okankhelo katyo ankho kena 11. Andyililongesa nawa etyi omikanda vietu vipopia konthele yokukala he yovana. Ankho ndyihanda okuvetekula nawa. Tuakalele novitateka vimwe. Mahi ovana ankho vanthala ngatyina ndyi tate yavo, atukala noupanga omuwa. Meumbo lietu ankho muya unene ovana mokonda ya vakuavo. Ankho tutyihole omapita navi!

Mo 2013, atuilukila ko Wisconsin tukakalele ovo tate vakulupa. Ankho ndyisoka okuti oku-undapa mo Mbetele tyapuila opo. Mahi pamwe-pamwe ndyiihanwa ndyikevekuateseko movilinga vimwe.

OMUENYO WANGE WAPILULUKA

Mu Setembro yo 2018, andyihimbika okuvela engongoliwa. Etyi napita kosipitali, ondotolo yokuanthala ayahamono natyike. Onthiki onkhuavo etyi nakondoka-ko vali, ondotolo imwe ai-mphopila ndyiovole ondotolo yokuhakulaowongo. Etyi naovola ondotolo oyo,mo- anyi ya Janeiro yo 2019, aimphopila okuti ndyina ouvela mowongo. Ouvela oo, ankho ukahi nokukula liwa-liwa.

Apalambe vala ononthiki ononthatu, andyituguka pononkheka-nkheka mbenkhanya lyo kokulio. Etyi natoka, andyityimono umwe okuti hikahi nawa, mokonda etyi tyanthokesa otyipuka ankho netyiliya-le okulinga otyo nahatoko. Ouvela wange aukulu liwa, pahe ankho hityivili vali okuliviya nawa, nokupopia nawa, nokunyina.

Tyinthyambukiswa okutala okuti etyi nalonge-swa kosikola tyankhuatesako okuundapela nawa Siovaa meongano liae. Nahonekele ovipuka vimwe viapakwa mono jornale, viyakulila Onombangi mba Siovaa okuhapakwa ohonde. Tupu naile kovilongo ovinyingi okukalinga omalongomona konosikola mbokulongesa okuhakula, opo ndyipopie omokonda yatyi Onombangi mba Siovaa vahapakelwa ohonde. Ame ndyilitehelela ngetyi tyapopiwa mu Luka 17:10: ‘Ame ndyimupika wahasilivila. Nalinga vala etyi ankho ndyina okulinga.’