1 | Elikwambelo ‘Pakulei Otyiho Tyenyi Atyiho Kwe’

OMBIMBILIYA YATI: ‘Pakulei otyiho tyenyi atyiho [ku Huku], mokonda ngwe wesuka no onwe.’ — 1 PETULU 5:7.

Oityi Otesitu Oyo Yahanda Okupopia

Siovaa Huku wetuti tupondola okumupopila atyiho tyetutokotesa omutwe. (Salmo 55:22) Tyilinge otyitateka tyatyo otyinene, tyilinge otyitutu, otyiwa tulikwambele ku Huku atumupopila-tyo, mokonda etyi tyitwiihama na Siovaa tyimwiihama. Okulikwambela kwe otyo otyipuka tyikahi nawa tuna okulinga matyitukalesa umwe nomutima upumphi. — Ova Filipu 4:6, 7.

Oñgeni Otyo Tyipondola Okutukwatesako

Tyina una ouvela wokulinyengwa, upondola naapa umwe uli pokati ka vakwenyi ulitehela ngoti wike vala, mokonda vakwenyi pamwe kamavanoñgonoka-le etyi tyili nokukwiihama. (Provérbios 14:10) Mahi tyina tulikwambela ku Huku atumupopila umwe atyiho tyili komutima, ngwe metwiivi umwe nawa, nokankhenda. Siovaa utulwete, nononkhumbi tuli nokumona umbulwete, neevi tuli nokututumba navio uvilwete, ya wahanda tulikwambele kwe atumupopila atyiho tyetutokotesa omutwe. — 2 Crônicas 6:29, 30.

Okupopia na Siovaa melikwambelo tyipameka vali onthumbi yetu okuti ngwe usuka noonthwe. Ine otyo tulinga otyo, matukala umwe nga umwe wapopiwa m’Ombimbiliya welikwambelele ati: “Ove wamona ononkhumbi mbange; wanoñgonoka emone ndyina-lio.” (Salmo 31:7) Okunoñgonoka okuti Siovaa utyilwete etyi tuli nokulwa natyo, matyitwavela umwe ononkhono atutyivili okukoleleya. Ngwe katale vala ovitateka tuna-vio kwapwa, mahi nae vimwiihama, ya utukwatesako tupamene mweevi Ombimbiliya ipopia.

Ombimbiliya Ina Umwe Nokukwatesako Ovanthu Julian

Apa Ndyili Vala Omutima Kaupumphi-ale

“Ame napanga nouvela umwe wokulinyengwa, ndyiti vala nga nalinga andyilimbililwa (OCD). Ndyiti pamwe andyikala umwe nawa, mahi pamwe ndyikatehela tyeya vali, mahi tyetyeeta otyo nehetyii-vo otyityi. Otyo haunene tyiya umwe vali tyina ndyili povanthu. Ame ndyisoka vala unene okuti tyina ovanthu vanthala vati-vo ñgaa walinga-tyi.

“Omapanga ange vokundyi umwe nawa oñgeni ndyikahi, veli umwe nokunkhwatesako. Namphila pamwe vapopia umwe ovipuka vimwe aviahankhala nawa komutima, mahi ndyipandula umwe unene etyi valinga, veli-ale nokulikwatehila.

“Pamwe ñgaa nokulikwambela umwe tyihole okumphona mokonda youvela oo ndyina-o. Tyina tyameya, momutwe watyo muya vala ovipuka ovinyingi. Pahe noove olimbililwa vala, nokupumphama ulikwambele ku Siovaa okulikwatehila umwe. Tyina pahe pamwe tyameya umwe unene, neevi vala pahe ndyilinga hivimono-ale vali, nonondaka-vo vala mandyipopila Siovaa ndyimutolele etyi ndyiivite neetyi tyili komutima, himbumono.”

Ombimbiliya Ina Umwe Nokunkhwatesako

“Pokulilongesa Ombimbiliya nanoñgonoka okuti omalikwambelo kaesukisile okulinga omalaale opo Huku eetehelele, tupu kaesukisa-le okweeovolela onondaka mbokwehiviswa. Pamwe ndyilitehela ñgaa ndyitupu-ale vali etyi ndyipopia, andyiti vala: ‘Siovaa nkhwateseko-vo mbaa.’ Na tyina ndyamapopi vala ngootyo ndyityimona umwe okuti Siovaa wendyiva, wampha umwe etyi nesukisa poola yatyo opo. Tyehelikwambelo vala, tupu ankhaovola umwe onondotolo ndyikatalwe. Ame ndyipandula unene ovipuka ovio viankhwatesako pahe ndyina ehambu, ndyikahi vali nawa. Mbili pamwe tyimphwilisa umwe unene okulikwambela ku Tate yange keulu ndyimwiite ankhwateseko, mahi ame ndyityilinga umwe, mokonda ndyityii okuti ngwe unthyole, uhanda umwe okunkhwatesako.”