Omapulo Ovatangi
Monthiki Sesusi auka Ondalelo ya Tatekulu, ovalongwa vana 70 atumine vakaivise ankho velipi? Okuti ankho vemuyeka-po-ale?
Katupondola okuti ovalongwa ovo 70, mokonda vala onthiki Sesusi auka Ondalelo ya Tatekulu ankho kavepo, ngootyo ankho vemuyeka-po. Monthiki omo Sesusi ankho uhanda umwe vala okukala novatumwa vae.
Tyilinge ovo vokuna 12, tyilinge vokuna 70, aveho ankho ovalongwa va Sesusi. Sesusi povalongwa vae aveho, wakoyele-po vala ovalume 12, eveti ovatumwa. (Luka 6:12-16) Nthiki imwe etyi Sesusi eli ko Ngalileya novatumwa vae 12, eveihana “evetumu vakaivise Ouhamba wa Huku, otyo vahakula.” (Luka 9:1-6) Etyi pakala, nthiki imwe etyi Sesusi eli ko Sundeya, “aholovona vali ovalongwa 70, evetumu vende vevali-vevali.” (Luka 9:51; 10:1) Naina, Sesusi wali novalongwa momapunda-umbo omanyingi ankho mwiviswa oviwa ovipe.
Ova Sundaa vokwali ovalongwa va Sesusi, pomuvo opo nkhele ankho valia Opasikwa. Mokutala ankho veilia umwe no vo momaumbo avo. (Oku. 12:6-11, 17-20) Tyina ankho onthiki Sesusi maipawa ihungi-po, Sesusi novatumwa vae, avai ko Selusalei. Mahi kaihanene ovalongwa vae aveho opo valinge Opasikwa, ovalongwa vae voko Sundeya no voko Ngalileya no voko Peleya. Mokutala monthiki oyo Sesusi ankho uhanda umwe vala okukala novatumwa vae. Wapopilile ovatumwa vae okuti: “Ankho ndyityihanda-le etyi tyokulia noonwe Opasikwa ei tyina nkhele nehenemone emone.” — Luka 22:15.
Natyo ankho omo umwe, ankho kwakamba vala kapii opo aipawe, mokonda Oe “Ondyona ya Huku ipola onkhali mouye!” (Swau 1:29) Otyipuka otyo ankho tyina okulingilwa mo Selusalei mokonda omo ankho mulingilwa-le ovilikutila vipakulwa ku Huku nkhele tya kohale. Ononkhia mba Sesusi ankho ombo mambuyovola umwe nawa-nawa ovanthu, kamambulingi ngongi ova Isilayeli valililile momaumbo avo etyi vatunda ko Isitu (1 Kol. 5:7, 8) Otyipuka otyo ankho Sesusi alingile, ankho otyo matyikwatesako ovatumwa 12, valinge onomphandyi mbatyo Mbewaneno Liovakwa-Kilisitu. (Efe. 2:20-22) Ya ngwe soka, o Selusalei, epunda-umbo likola, “ipumphi komamanya 12” kwahonekwa “omanyina 12 ovatumwa 12 Vondyona.” (Ehol. 21:10-14) Tyotyili ovatumwa ovo, ankho pahe mavakala notyilinga tyimwe otyinene, mokufwiswapo kwomphango ya Huku. Naina, otyo ankho Sesusi esukila umwe natyo tyokukala navo monthiki oyo mali navo Opasikwa. Etyi vamana okulia Opasikwa, pahe auku Ondalelo ya Tatekulu.
Ovalongwa 70, novalongwa ovakwavo vali kavalile Ondalelo na Sesusi. Mahi aveho vahayekele-po Sesusi, vapolele ouwa kondalelo ya Tatekulu. Ovalembulwa, navo veli momphango oyo Youhamba Sesusi alingile novalongwa vae motyinthiki tyatyo otyo. — Luka 22:29, 30.