Linga Evi Mavihambukiswa Siovaa

1. Oityi tyihole okulemena ovanthu aveho?

ONONTHIKI ambuho tuna okusoka evi matulingi. Vimwe viapepuka, ngeetyi okusoka etyi matuli, noola matukalangala-po. Mahi vimwe vialema mokonda pamwe oko kutei ekongoko lietu, nehambu lietu, no liovanthu tukala navo, nefendelo lietu. Tuhanda ovipuka aviho tulinga vitwetele ouwa onthwe mwene, na vakwetu tukala navo. Mahi haunene tuhanda evi tulinga vihambukiswe Siovaa. ​— Loma 12:1, 2.

2. Oityi matyikukwatesako olingi ovipuka nonondunge?

² Molingi vala ovipuka nonondunge tyina, (1) woovola okunoñgonoka nawa ovipuka aviho, (2) utala otyityi Siovaa asoka tyiyemba kweetyi wahanda okulinga, (3) usoka umwe nawa kweetyi molingi. Monthele ei, matulilongesa nawa ovipuka ovio, tupu maitukwatesako tutale oñgeni matulongo ounongo wetu wokupunga nawa ovipuka. ​— Omih. 2:11.

OVOLA OKUNOÑGONOKA NAWA OVIPUKA AVIHO

3. Oityi twesukisila umwe okwoovola ovipuka aviho viyemba kweetyi twahanda okulinga? Otyo tutyieleka natyi?

³ Otyipuka tyo tete tuna okulinga tutyivile okulinga ovipuka nonondunge, okwoovola okunoñgonoka umwe nawa ovipuka aviho. Oityi tyesukisila okulinga ngootyo? Otyo tyafwa vala etyi tyilinga ondotolo. Tyina yamaendelwa nomuvei, imuhakula vala tyehemutalele, nii tyehemupulile otyityi tyiihama? Au, hatyoko ilinga. Noonthwe opo tulinge ovipuka nonondunge nkhele tuna umwe okunoñgonoka ovipuka aviho viyemba kweetyi twahanda okulinga. Otyo matutyilingi ñgeni?

4. Omu mutyipopila Omihe 18:13, oñgeni monoñgonoka ovipuka aviho viyemba kweetyi wahanda okulinga? (Tala olutalatu.)

⁴ Opo unoñgonoke nawa ovipuka aviho viyemba kweetyi wahanda okulinga, una okulipula. Soka ñgeno una potyitalukiso wakongwa, mahi ou wokwetyihinda kumwii, neevi mavilingwa-po kuvii. Okuti moende? Tyina nkhele weheneende-ko, ou wokwekukonga upondola okumupula ñgaa: “Matyilingwa nalupi, ya opi matyilingilwa? Ovanthu veñgapi mavakala-po? Olie metyilulika? Ovalie mavakala-po? Oityi matyilingwa-po? Okuti mapakala ovikunwa?” Omakumbululo omapulo oo, maekupe ounongo, otyivili okukoya-po ei yaviuka. ​— Tanga Omihe 18:13.

5. Oityi una okulinga tyina wanoñgonoka umwe ovipuka aviho?

⁵ Tyina wamanoñgonoka umwe ovipuka aviho viyemba kweetyi wahanda okulinga, pahe soka oñgeni otyipuka otyo matyikaenda. Ine wiiva okuti potyitalukiso opo mapeya ovanthu vehesukile nonondunge mbuli m’Ombimbiliya, okuti hatyo, hamwe mapakala okunwa, mahi ovanthu aveho mwene velikwataila-mo vala petupu ou uveyunga, molingi ñgeni? Okutyisoka vala ngootyo, katyimoneka umwe okuti matyilingi otyipito tyombwandya? (1 Pet. 4:3) Ine oola matyilingwa otyitalukiso otyo, oola yeliongiyo lienyi, hamwe oola wenda movilinga viokwivisa, molingi ñgeni? Ine unoñgonoka ovipuka ovio aviho, opo pahe motyivili okulinga etyi tyaviuka. Mahi pena vali otyipuka otyikwavo una okulinga. Pahe ove wetyinoñgonoka umwe, neetyi molingi utyieete. Ya pahe Siovaa utyitala-vo ñgeni? ​— Omih. 2:6.

OVOLA OKUNOÑGONOKA ETYI SIOVAA ASOKA

6. Omu mutyipopila Tiaku 1:5 oityi twesukisila okwiita Siovaa etukwateseko?

⁶ Ita ku Siovaa ekukwateseko unoñgonoke etyi ngwe asoka. Siovaa wati metwavela ounongo wokupunga nawa ovipuka, tyina twahanda okulinga etyi tyimuhambukiswa. Siovaa ‘una otyali, upa ovanthu aveho ounongo, tyahakandukila.’ ​— Tanga Tiaku 1:5.

7. Oityi molingi umone etyi Siovaa asoka tyiyemba kweetyi wahanda okulinga? Tutyeeleka natyi?

⁷ Tyina pahe wamaiti ku Siovaa ekululike, tala umwe nawa oñgeni mekukumbulula. Linga umwe ngeetyi ulinga putyina wamavombo, pahe ovasi omunthu wii nawa apa uli, omupulu ondyila. Okuti momupulu vala omutyindamena, ngwe nkhele kenepopie? Au, hatyoko molingi. Motehelela umwe nawa tyina apopia. Na tyina wamaiti ounongo ku Siovaa, pahe ovola okunoñgonoka ovitumino vi’Ombimbiliya nonondunge mbulimo, mbuyemba kweetyi wahanda okulinga, umone etyi Siovaa mekupopila. Okukondoka vali koyotyitalukiso twapopia-ale, upondola okwoovola okunoñgonoka etyi Ombimbiliya ipopia tyiyemba kovipito viombwandya, no komapanga omavi, neetyi wesukisa okulinga upake tete Ouhamba wa Huku komutwe, ohesuku vala neevi mwene wahanda. ​— Mat. 6:33; Loma 13:13; 1 Kol. 15:33.

8. Oityi una okulinga ine wesukisa okupakailwamo vali? (Tala olutalatu.)

⁸ Natyina wamelikwambela ku Siovaa, pamwe nkhele mosukisa vali okupakailwamo na vakwenyi. Upondola okupopia nomukulu wii nawa ovipuka, ekupakailemo. Otyipuka otyikwavo tyipondola okukupa ounongo, okwoovola momikanda vietu. M’Omukanda Wokwovolola wo Nombangi mba Jeova, no momukanda Evi Ombimbiliya Ipopia Vikwatesako Ovanthu va Huku, nomikanda omikwavo, movasimo onondunge mbumwe onongwa. Mahi wahalimbwe-ko okuti etyi wesuka natyo, okulinga etyi matyihambukiswa Siovaa.

9. Oityi tuna okulinga tutyimone okuti etyi twahanda okulinga matyihambukiswa Siovaa? (Ova Efesu 5:17)

⁹ Oityi tuna okulinga, tutyimone okuti etyi twahanda okulinga matyihambukiswa Siovaa? Otyipuka tyotete tuna okulinga, okumunoñgonoka nawa. Ombimbiliya yati: ‘Okunoñgonoka Huku Ukola tyityita ekungunyiko.’ (Omih. 9:10) Ngwe tyili, enoñgonoko liotyotyili lituka kokunoñgonoka nawa Siovaa, no nomphango mbae, neetyi ehole, neetyi eyele. Lipula ñgaa: ‘Mwene etyi Siovaa ndyimwii, okuti etyi nahanda okulinga matyimuhambukiswa umwe?’ ​— Tanga Ova Efesu 5:17.

10. Oityi tutila okulandula onondunge mbuli m’Ombimbiliya tyesukisa vali tyipona okulandula ovituwa viombunga no viotyilongo?

¹⁰ Pamwe opo tuhambukiswe Siovaa, tuna umwe okulipona novetu. Soka ñgeno ovakulu vamwe vena omona omufikwena, avati onthwe omona wetu manepwa vala nomunthu unatyo, memufetela umwe etyi tyitiwa otyetyi, naapa omukwendye watyo ehena oupanga omuwa na Siovaa. Ovakulu ovo vapopia tupu ngootyo, okwesuka nomona wavo, vahanda ahakahepe, akatekulwe nawa. Mahi pahe, haa olie makwatesako omona wavo akale noupanga omuwa na Siovaa? Oityi mwene Siovaa ahanda? Ekumbululo tulivasa mu Mateusi 6:33. Motesitu omo, ovafendi va Huku vapewa ondundo vatwaleko ‘okwoovola tete Ouhamba.’ Naina, namphila onthwe twahanda umwe okupa omunkhima ovo tate, nokulinga onthilo ovanthu vo pomaumbo etu, mahi etyi tusuka vali natyo, okuhambukiswa Siovaa.

SOKA UMWE NAWA KWEETYI MOLINGI

11. Oityi tyapopiwa momukanda Ova Filipu 1:9, 10 matyikukwatesako okusoka umwe nawa kweetyi molingi?

¹¹ Tyina wamatale umwe nawa etyi Ombimbiliya ipopia tyiyemba kweetyi wahanda okulinga, pahe soka umwe nawa kweetyi molingi. (Tanga Ova Filipu 1:9, 10; tala okatoi m’Ombimbiliya yokulilongesa moputu apa pokwati, “pleno discernimento.”) Okukala nenoñgonoko liaoya matyikupe ounongo, otyivili okusoka oñgeni etyi wahanda okulinga matyiende. Pamwe, okusoka etyi molingi katyipwiya-le, mahi vimwe vipwiya umwe. Okukala nekungunyiko matyikukwatesako, otyivili okulinga ovipuka nounongo, na vina umwe vipwiya.

12-13. Oityi tutila okupunga nawa ovipuka, matyikukwatesako okulinga ovipuka nonondunge, tyina uti pokukoya etyi molingi?

¹² Soka ñgeno uli nokwoovola ovilinga utyivile okutekula eumbo. Apamoneka ovilinga vivali. Nkhele moovola umwe okunoñgonoka nawa ovipuka aviho, otyityi tyilingwa-mo, muundapwa onoola onoñgapi, okutunda apa ukala atee kovilinga oko moende-po onoola onoñgapi, novikwavo vali. Omono okuti ovilinga ovio aviho vikahi nawa, mutupu etyi tyilingwa-mo tyailikwa m’Ombimbiliya. Tyipondola mokoyo-po tyike povilinga ovio, etyi weete okuti etyi tyilingwa-mo ove utyivila, tupu vafeta vali nawa. Mahi pena vali ovipuka ovikwavo wesukisa okutala nawa, tyina uti pokusoka etyi molingi.

¹³ Ovikwavo una okutala nawa ovievi: Okuti mopetauka umwe liwa otyivili okwenda komaliongiyo? Ine ovilinga ovio mavikupolo omuvo ankho ñgeno ukala no vomeumbo liove, nokutomphola navo, nokulinga ovipuka mavipameka oupanga wavo na Huku? Okulipula ngootyo matyikukwatesako otyivili okulinga ovipuka “viesukisa vali” okufenda Siovaa, nokusuka neevi vomeumbo liove vesukisa, ohesuku vala nokwoovola omalumono. Ine ulinga ngootyo molingi etyi tyaviuka, Siovaa ekuyambe.

14. Oityi tutila okupunga nawa ovipuka nokuhumba vakwetu matyitukwatesako atwahalingi evi vivetokesisa?

¹⁴ Okupunga nawa ovipuka matyitukwatesako, atusoko oñgeni etyi twahanda okulinga matyikalesa vakwetu, atuliyungu kokulinga evi ‘vitokesisa vakwetu’. (Fili. 1:10) Otyo haunene tyisukisa umwe vali pokulihiwiswa, no komuvalo, no konohuki. Soka ñgeno una omuvalo uhole, no kokuviukisa onohuki una umwe etyi uhole. Mahi pahe vakwenyi tyilinge vomokati kewaneno, tyilinge vokondye, kavetyihande. Molingi ñgeni? Okupunga nawa ovipuka, matyikukwatesako okulinga onthilo etyi vasoka. Okuhumba vakwenyi ‘mosuku neetyi tyivepa ehambu’ opolo pokati. (1 Kol. 10:23, 24, 32; 1 Tim. 2:9, 10) Ine otyo tulinga ngootyo, matyimoneka umwe okuti tuhole vakwetu, tuvelinga onthilo.

15. Oityi twesukisila okupanga nawa tyina etyi twahanda okulinga otyinene?

¹⁵ Ine etyi wahanda okulinga otyinene, soka umwe nawa atyiho matyisukisa-po opo etyi wahanda okulinga utyivile. Sesusi wati, tyina tuna etyi twahanda okulinga, ‘nkhele tuna okupumphama atutale’ etyi matumanena-po. (Luka 14:28) Nkhele soka, opo etyi wahanda okulinga tyiviuke, matyikala omuwo ulifwepi, mapanyingila onombongo mbulifwe-pi, oityi ove mosukisa okulinga? Povipuka ngoopo, tyipondola motomphola na vakwenyi meumbo, utale etyi munthu na munthu esukisa okulinga opo etyi wahanda okulinga tyiviuke. Oityi tyesukisila okupanga ngootyo ovipuka? Omokonda pamwe, opo vala motyimonena okuti etyi wahanda okulinga, tyisukisa okupilululwa, tupu pamwe opo vala motyimonena okuti pena vali otyipuka otyikwavo tyikahi nawa una okulinga. Ine uti tyina una etyi wahanda okulinga, otomphola na vakwenyi meumbo, otehela-vo ei vena-yo, navo mavahambukwa, avetyivili okukukwatesako opo etyi wapanga tyiviuke. ​— Omih. 15:22.

PANGA UMWE ETYI MOVILI

16. Oityi matyikukwatesako etyi wahanda okulinga atyiviuku? (Tala okakasa kati, “Oñgeni Molingi Ovipuka Nonondunge.”)

¹⁶ Ine walandula umwe ovipuka aviho twapopia monthele ei, opo pahe molingi ovipuka nonondunge. Ove watala nawa ovipuka aviho, wanoñgonoka nawa onondunge mbuli m’Ombimbiliya, mambukukwatesako okulinga etyi matyihambukiswa Siovaa. Pahe otyikwavo upondola okulinga, okwiita ku Siovaa ekukwateseko etyi wahanda okulinga tyiviuke.

17. Ondyila patyi maikutwala kokulinga ovipuka viaviuka?

¹⁷ Namphila hamwe kohale wetyivilile-ale okulinga ovipuka ovinyingi aviviuku, wahalimbwe-ko okuti ondyila ikutwala kokulinga ovipuka nonondunge, okuyumba onthumbi mounongo wa Siovaa, hamounongo wove-ko no movipuka wevila-vila-le okulinga. O Siovaa vala mekwavela enoñgonoko liotyotyili, nekungunyiko, nounongo wokupunga nawa ovipuka, ngwe ovipuka ovio, ovio onondopio mbutunga ounongo. (Omih. 2:1-5) Siovaa mekukwatesako olingi evi vimuhambukiswa. ​— Ovii. 23:2, 3.