Onthwe Katwike-ko

1-2. (a) Oityi tutila povitateka katwike-ko? (b) Oityi matulilongesa monthele ei?

TYINA tuna ovitateka tupondola okukala ngatyina uti tuli vala atwike motyiteta tyimwe otyinene. Mahi movitateka onthwe katwike-ko. Tate yetu wokeulu wii ovitateka tuli nokukondya navio, ya wati metukwatesako okuvikoleleya. Siovaa wapopila ovanthu vae okuti: ‘Ame mandyimuyake.’ — Isa. 41:10.

² Monthele ei matutale ovipuka Siovaa alinga etukwateseko. (1) Utululika, (2) utwaavela etyi twesukisa, (3) utuyakulila, (4) utupameka. Siovaa wetupopila okuti ngatukala-kala novitateka kemetulimbwa, kemetuyeke-po. Povitateka katwike-ko.

SIOVAA UTULULIKA

3-4. Siovaa utululika natyi? (Oviimbo 48:14)

³ Tanga Oviimbo 48:14. Siovaa utyii okuti onthwe katutyivili okulihongolela tusukisa okululikwa nae. Mahi hono Siovaa ovanthu vae uvelulika natyi? Tyimwe evelulika natyo Ondaka yae Ombimbiliya. (Ovii. 119:105) Etyi Siovaa etupopila m’Ombimbiliya, tyitukwatesako okukala nehambu pehepano atulingi ovipuka nonondunge, komutwe wandyila atukakala nomwenyo wahapu.a Siovaa utulongesa okweevela vakwetu atuhevepakela onkhongo, nokulinga ovanthu votyili movipuka aviho, nokuhumba vakwetu, olwembia lwetu alutuku umwe komutima. (Ovii. 37:8; Hemb. 13:18; 1 Pet. 1:22) Tyina tulinga ovipuka ovio, matyiti umwe onthwe matutekula nawa ovana vetu, onthwe matukala notyinepo tyikahi nawa tupu atukala omapanga omawa.

⁴ Tupu m’Ombimbiliya Siovaa wetupopila ovanthu vamwe navo vakondyele novitateka ngeevi onthwe tukondya navio, ovanthu vala ngoonthwe. (1 Kol. 10:13; Tia. 5:17) Tyina tutanga etyi tyalingile vakwetu atulingi etyi twelilongesila kuvo, tyitukwatesako movipuka evi vivali. Tete, tutyimona okuti, ovitateka tuli nokukondya navio vakwetu navo vakondyele-ale navio, avetyivili umwe okuvikoleleya. (1 Pet. 5:9) Vali, tulilongesa etyi matulingi tukoleleye ovitateka ovio, atutwalako nehambu. — Loma 15:4.

5. Ovalie Siovaa atuma vetululike?

⁵ Tupu Siovaa wetwaavela vakwetu tufenda navo vetululike.b Ovakulu ovapili vomawaneno veya okutupilila-po vetupameke, omalongomona avo apameka onthumbi yetu, etukwatesako atutwalako tyelikwata-po. (Ovil. 15:40–16:5) Tupu momawaneno ovakulu vewaneno vakwatesako ovaivisi aveho. (1 Pet. 5:​2, 3) Vokuna ovana vakwatesako ovana vavo okuhumba Siovaa, nokukula motyili. Vevekwatesako opo, tyina vena etyi vahanda okulinga avasoko ku Siovaa, tupu avalingi ovana vonondunge. Vevelongesa okutanga apeho Ombimbiliya, nokweenda komaliongiyo no movilinga viokwivisa. (Omih. 22:6) Mewaneno ovakai vekula motyili, vakwatesako ovahikwena novakwendye okupama motyili, movipuka valinga, na tyina vevepakela-mo, na tyina vevepameka. — Titu 2:​3-5.

6. Oityi tuna okulinga tupole ouwa kokululikwa na Siovaa?

⁶ Siovaa wetwaavela umwe atyiho twesukisa tulinge ovipuka nonondunge atukala nehambu. Pahe oityi matulingi tyimoneke okuti tupanda otyipuka Siovaa etululika? Omukanda Omihe 3:​5, 6 wati: “Yumba onthumbi mu Siovaa nomutima wove auho, wahayumbe onthumbi mekungunyiko liove mwene.” Tyina tuyumba onthumbi mu Siovaa, ngwe ‘maviukisa [onondyila mbetu],’ etukwatesako atuhelipake movipuka mavitweetela, atukala nehambu. Tupandula unene Siovaa mokonda utwii nawa, utuhole, utuviyula umwe nawa! — Ovii. 32:8.

SIOVAA UTWAAVELA ETYI TWESUKISA

7. Oityi Siovaa etwaavela? (Ova Filipu 4:19)

⁷ Tanga Ova Filipu 4:19. Tyihekutululika vala tukale noupanga omuwa nae, Siovaa tupu utukwatesako tumone okulia, nomuvalo, neumbo, novipuka ovikwavo vali twesukisa. (Mat. 6:33; 2 Tes. 3:12) Tyili pamwe tulinga otyiho atulipulu ine matumono ovipuka ovio, mahi Siovaa wetupopila okuti mwahalingei otyiho novipuka ovio. (Tala okatoi m’Ombimbiliya yokulilongeswa moputu, mu Mateusi 6:25.) Oityi tuhalingila otyiho? Omokonda Tate yetu wokeulu kayeke-po ovaumbili vae, kevetyindamena tyina vesukisa okukwateswako. (Mat. 6:8; Hemb. 13:5) Tupondola okuyumba onthumbi mweetyi apopia m’Ondaka yae, etyi ati metukwatesako okumona etyi twesukisa.

8. Oityi Siovaa alingilile Ndaviti?

⁸ Tutalei etyi Siovaa alingile akwateseko Ndaviti. Ndaviti wakalele omanima omanyingi mohika, okuholama Ohamba Saulu ankho uhanda okumwipaa, mahi no ngootyo Siovaa aavela Ndaviti nomafwalali ae, etyi vesukisa vatwaleko nomwenyo. Etyi pahe Ndaviti asoka etyi Siovaa emulingilile momuvo oo, ahoneka ati: “Nali omukwendye pahe nakulupa, mahi nkhele nali hinemone omuviuki wayekwa-po, nii ovana vae vaita-ita okulia.” (Ovii. 37:25) Nga Ndaviti, tyipondola noove uhole-ale okumona etyi Siovaa ehole okulinga akwateseko vakwenyi mufenda navo.

9. Hono, povihuna oityi Siovaa alingila ovanthu vae? (Tala omalutalatu.)

⁹ Tupu no povihuna Siovaa waavela ovanthu vae etyi vesukisa. Pomuvo w’ovatumwa, etyi mo Selusalei ondyala yatokota, Ovakwa-Kilisitu vo kovilongo ovikwavo, avatumu okulia ku vakwavo vehulilwa. (Ovil. 11:​27-30; Loma 15:​25, 26) Na hono ovanthu va Huku vena otyali, vakwatesako vakwavo vehulilwa. Tyina kotyilongo tyimwe kwamatumbuka ovihuna, Siovaa utuma ovanthu vae vakakwateseko vakwavo, aveveavela okulia nomeva nomuvalo, novihemba. Ava veli movilinga viokutunga, avapindula-po onondywo mbovakwatate ovo, nonondywo Mbomaliongiyo. Ovanthu va Siovaa kavasete-ale, tyina vakwavo vasiwapo novavo, vapeseka koviavo, vevekengelela, nokuvepameka.c

10-11. Etyi tyaendele na Borys tyekulongesa-tyi?

¹⁰ Tupu Siovaa ulinga otyali ovanthu vana vehemufende-ale. Noonthwe otyo tuna okulinga, tuna okwovola onomphitilo mbokutekula nawa ovanthu aveho, na vana umwe vahafende Siovaa. (Ngal. 6:10) Tyina tutekula nawa vana vahafende Siovaa, navo vesuka nokulilongesa otyili. Tutalei etyi tyaendele na umwe utiwa o Borys, ukala mo Ucrânia ululika osikola imwe. Namphila Borys ankho Hambangi-ko ya Siovaa, mahi ankho utekula nawa Onombangi valongeswa mosikola oyo, uvelinga onthilo, kapopi omapita evi vetavela. Pahe etyi ovilwa mo Ucrânia viatokota, Borys asoko okutunda apa ankho akala ende kokukwavo. Vakwetu tufenda navo, avemukwatesako. Etyi pakala, Borys eya pehinangelo Liononkhia mba Kilisitu. Etyi asoka etyi akwateswako, apopi ati: “Onombangi ovanthu vekahi nawa vandinga olwembia lumwe olunene, vankhwatesako unene. Ndyipandula unene Onombangi mba Siovaa, hipopi-ale.”

¹¹ Noonthwe tuna okuhetekela Tate yetu wokeulu una okankhenda, atulingi olwembia ovanthu vatyo aveho vehulilwa na vana Vehenombangi. (Luka 6:​31, 36) Tutyii okuti okuvelinga onkhenda vapondola okusoka okulilongesa, kumbi avalingi Onombangi. (1 Pet. 2:12) Tyilinge ovanthu ovo vakoya-po okufenda Siovaa, tyilinge kavemufende, mahi no ngootyo onthwe matukala nehambu lituka kokwaava. — Ovil. 20:35.

SIOVAA UTUYAKULILA

12. Siovaa wati malingila-tyi ovanthu vae? (Oviimbo 91:​1, 2, 14)

¹² Tanga Oviimbo 91:​1, 2, 14. Hono Siovaa wapopia okuti metuyakulila pahamoneke natyike tyinyona oupanga wetu nae. Siovaa kamayeke Satanasi litalameke ovanthu vae, avehemufende ngeetyi ahanda. (Swau 17:15) Mahi tyina ‘ononkhumbi ononene’ mbamahimbika, tuyumbei-ko onthumbi okuti, Siovaa malingi etyi apopia tyokuyakulila ovanthu vae, kameveyakulila vala koupanga wavo nae, meveyakulila umwe no kovipuka ovikwavo vipondola okuvenyona. — Ehol. 7:​9, 14.

13. Oityi Siovaa ayakulila natyo munthu na munthu?

¹³ Oityi Siovaa alinga ayakulile munthu na munthu? Siovaa utuyakulila n’Ovihonekwa, etukwatesako okupunga etyi tyaviuka kweetyi tyapenga. (Hemb. 5:14) Tyina tweendela mweetyi Huku apopia m’Ondaka yae, tuyakulila oupanga wetu nae, tupu tuyakulila olutu lwetu kweevi vipondola okutweetela. (Ovii. 91:4) Otyikwavo Siovaa etwaavela tuyakulile oupanga wetu nae, omawaneno etu. (Isa. 32:​1, 2) Mokonda tuli pokati ka vakwetu vehole Siovaa, valinga etyi tyipopia Ondaka yae, tupamekwa atumono ononkhono, atuhalingi etyi tyapenga. — Omih. 13:20.

14. (a) Siovaa ketuyakulila movitateka aviho mokonda yatyi? (b) Etyi tyipopia Oviimbo 9:10 tyitwaavela onthumbi yatyi? (Tala okatoi.)

¹⁴ Kohale tyina ankho pena ou uhanda okwiipaa ovanthu va Siovaa, Siovaa ankho ulipaka-po eveyakulila. Mahi haveho Siovaa weveyakulilile. Noonthwe, pamwe tupondola okutumbukilwa novihuna mokonda “kavilae.” (Omup. 9:11) Tupu, Siovaa wayekele vamwe vokumufenda vamoneswe ononkhumbi, vamwe avaipaelwa-po umwe, tyimoneke okuti Satanasi onkhembi. (Som. 2:​4-6; Mat. 23:34) Noonthwe hono haityo-ñgo. Namphila Siovaa ehemetupolo ovitateka vietu, mahi tupondola okuyumba-ko onthumbi okuti, Siovaa kayeke-po vana vemuhole.d — Ovii. 9:10.

SIOVAA UTUPAMEKA

15. Oñgeni elikwambelo, n’Ondaka ya Huku, na vakwetu tufenda navo vetupameka? (2 Ova Kolindu 1:​3, 4)

¹⁵ Tanga 2 Ova Kolindu 1:​3, 4. Pamwe tuhulilwa, tulinga otyiho, twihamenwa. Tyipondola hamwe, pehepano pena tyimwe uli nokukondya natyo, pahe usoka okuti wike vala. Mahi okuti tyili wike umwe vala, petupu ou wii etyi uli nokukondya natyo? Kwiike-ko, Siovaa wii etyi uli nokukondya natyo. Siovaa utyimona tyina tweihamenwa, tupu “utupameka mononkhumbi ambuho tumona.” Utupameka ñgeni? Tyina twamelipopi Kwe melikwambelo, Siovaa utwavela ‘ombembwa yae yehevilwa-le okwiikungunyika.’ (Fili. 4:​6, 7) Tupu tupama omutima tyina tutanga etyi apopia m’Ondaka yae Ombimbiliya. Tyina tutanga m’Ondaka yae onondaka apopia mbulekesa okuti utuhole, utulongesa nounongo, tulinge ovipuka nonondunge, otyo tyitwavela omphamekelo. No momaliongiyo tupamekwa tyina twiiva etyi tyipopia Ombimbiliya, tupu tupama okukala na vakwetu vetuhole.

16. Oityi welilongesila koo Nathan na Priscilla?

¹⁶ Opo tumone umwe etyi Siovaa alinga etupameke, etuungumanese n’Ondaka yae, tutalei etyi tyaendele noo Nathan na Priscilla, vakala ko Estados Unidos. Omanima amwe konyima oku, ovalinepi ovo vailukilile oku kwesukisa ovaivisi. Nathan wati: “Atuyumbu-ko onthumbi yokuti Siovaa metukwatesako ovipuka aviende nawa.” Mahi vati vala hikee, avavele, onombongo mbavo ambupu-po. Ovalinepi ovo oko vaile avatundu-ko avakondoka keumbo liavo, mahi no ngootyo nkhele avakala umwe tyihena onombongo. Nathan wati vali: “Ankho ndyilipula oityi Siovaa ehetukwatesilileko, ovipuka avitwende nawa. Pahe andyihimbika okusoka okuti, tyafwa pena tyimwe nalinga tyapenga.” Etyi pakala avetyimono okuti naina Siovaa keveyekele-po-ale. Nathan wapopia vali wati: “Pomuvo watyo opo, Ombimbiliya oyo yalingile epanga lietu likahi nawa, ankho oyo itupameka, oyo ituhongolela. Okusoka umwe nawa kweetyi Siovaa Huku alinga tukoleleye ovitateka vina, atuhaiki omutwe motyitateka tyatyo, tyetulongesa etyi matulingi tukoleleye ovitateka ovikwavo maviya.”

17. Otyityi tyapamekele Helga? (Tala olutalatu.)

¹⁷ Pena vali otyipuka otyikwavo vakwetu tufenda navo vapondola okulinga vetupameke. Oityi vapondola okulinga? Tutalei etyi tyaendele nomuhikwena umwe utiwa Helga, ukala ko Hungria. Helga wakondyele novitateka ovinyingi, pahe ankho ulinga vala otyiho, usoka okuti kesilivila. Mahi no ngootyo uhinangela etyi vakwavo mewaneno valingile vemupameke. Helga wati: “Tyina Siovaa amamono okuti naponwa mokonda yovilinga, nokutekula omona wange ankho uvela, novikwavo vali, ankho unkhwatesako. Ndyili-ale nokukondya novitateka ovio omanima 30, mahi petupu onthiki Siovaa ahankhwatesileko. Pamwe ankho umpha ononkhono tyina vakwetu vakumbulula momaliongiyo, na tyina vamphameka. Pamwe vakwetu ankho vanthuma omesasi, pamwe okamukanda kena onondaka mbupameka, etyi vamalingi avamphandula.”

18. Oityi tupondola okulinga tupameke vakwetu?

¹⁸ Onthwe tuna elao liokuhetekela Huku yetu, atupameka vakwetu. Matutyilingi ñgeni? O putyina tuti, tyina tutomphola navo, atuvetehelela nawa tyapwa elundo, pokupopia atupopi onondaka mbuungumanesa, atuvekwatesako umwe. (Omih. 3:27) Onthwe tulikwatehila, tupameke ovanthu aveho vaihamenwa, na vana umwe vahafende Siovaa. Tyina ava twelitungaila navo vavela, valinga otyiho, vehulilwa, twenda pomaumbo avo, atutomphola navo atuvetehelela nawa, pahe atuvepopila tyimwe tyipameka tyili m’Ombimbiliya. Tyina tuhetekela Siovaa, “Huku utupameka,” matyiti umwe onthwe tukwatesako ava tufenda navo okukoleleya evi veli nokukondya navio, onthwe tupu tuneñgenesa omitima vya vana vahafende Siovaa, kumbi haa avemufende. — Mat. 5:16.

SIOVAA APEHO METUKWATESAKO

19. Oityi Siovaa etulingila, ya oityi tuna okulinga tumuhetekele?

¹⁹ Siovaa usuka unene novanthu vatyo aveho vemuhole. Tyina tuna ovitateka, Siovaa ketutyindamena. Siovaa utekula nawa ovafendi vae vakakatela mwe, ngeetyi tyilinga he una olwembia utekula nawa ovana vae. Siovaa utululika, utwaavela etyi twesukisa, utuyakulila, utupameka. Pahe onthwe tuhetekela Tate yetu wokeulu, tyina tukwatesako vakwetu nokuvepameka. Tyili tupondola atutumbukilwa novitateka, mahi tuyumbei-ko onthumbi, Siovaa una onthwe. Mwene Huku oe wetupopila okuti: “Wahatile owoma, mokonda ame ndyina ove.” (Isa. 41:10) Onondaka ombo mbutuyumbisa-ko onthumbi yokuti, movitateka katwiike-ko, tuna Siovaa.