Okuti Utyihinangela?

Okuti welilongesa Omitala Viomulavi vienima lino? Naina omapulo aa weevila okweekumbulula:

Oityi tyitutwala kokupa omunkhima Siovaa?

Onthwe tunkhimaneka Siovaa mokonda tumulinga onthilo tumuhole unene. Tupu tunkhimaneka Siovaa mokonda twahanda ovanthu vemunoñgonoke. —Omutala Womulavi wa Kupupu wo 2025, pefo 3-4.

Ine pena ou wetunumanesa oityi matulingi tumwevele?

Wahaniange-ko vala, lipola onyengo nonkhongo opo mulivile na mukwenyi. —Omutala Womulavi wa Hitandyila wo 2025, pefo 15-16.

Oityi ovakwendye velilongesila ku Maluku?

Maluku ankho utavela ovilinga amapewa viokuundapela vakwavo. Namphila nthiki imwe ovipuka kaviaendele nawa atyimusoyesa mahi kayekele-ko. Walingile oupanga na Paulu novanthu ovakwavo vapama motyili. —Omutala Womulavi wa Tyikukutu wo 2025, pefo 27.

Oityi Sesusi ankho ahanda okupopia etyi ati: “Ame nevenoñgonokesa enyina liove”? (Swau 17:26)

Ovalongwa va Sesusi ankho vei-ale enyina lya Huku. Etyi Sesusi ankho eli nokupopia okuti, wevenoñgonokesa etyi Siovaa ekahi, neetyi ahandela ovanthu, nonomphango mbae, novipuka alinga, novituwa viae. —Omutala Womulavi wa Kapepo wo 2025, pefo 20-21.

Ine tulipaka koututu, oityi matutavela?

Matutavela okuti pena ovipuka ovinyingi twehei. Katutyii onalupi onthyulilo maiya, katwii nawa-nawa etyi Siovaa malingi etukwateseko, katwii etyi matyimoneka muhuka tupu otyipuka Siovaa etwii katutyivili-ale okutyisoka. —Omutala Womulavi wa Pepo Linene wo 2025 pefo 15-18.

Oityi tuna okulinga tukope oviwa melongomona okuti hatyo omweevi twatanga?

Lipula okuti: ‘Otyityi tyapopiwa matyikwatesako ovanthu? Okuti mwapopiwa omuhe ndyipondola okukalongesa nao? Olie mesuku neetyi tyapopiwa?’ —Omutala Womulavi wa Kakwenye wo 2025 pefo 19.

Oityi tulilongesila kweetyi Siovaa aevelele Ndaviti?

Ndaviti walingile ononkhali ononene, mahi etyi elivela apiluluka, Siovaa emweevela. (1 Oha. 9:​4, 5) Tyina Siovaa amaevela omunthu, onkhali yomunthu oo keihinangela vali. — Omutala Womulavi wa Kwenye Kunene wo 2025 pefo 17.

Ine omulongwa wove una etyi eli nokututumba natyo, oityi molingi?

Ine umona okuti etyi mamulilongesa, otyipuka eli nokututumba natyo, okutyipopila-po liwa matyimulingi navi, nkhele mupondola okutyilamba, haa amulilongesa-tyo nawa. — Omutala Womulavi wa Tungonkhe wo 2025, pefo 24.

Ombimbiliya yapopia okuti ‘ononkhono mbonkhali mbuyondya.’ (Hemb. 3:13) Otyo okutiwi?

Otyo okuti, onkhali oyo itutwala kokulinga ovipuka viapenga. Tupu oyo itutwala kokusoka okuti Siovaa ketuhole. — Omutala Womulavi wa Kulindi wo 2025, pefo 16.

Ovipuka patyi vitatu matulingi opo tyina tulikwambela tupopie umwe etyi tyili komutima?

(1) Okusoka kweetyi Siovaa ekahi. (2) Okusoka kweevi tuli nokukondya navio, atumupopila-vio. Na tyina pena ou tusukisa okweevela tupondola okutyipopia melikwambelo. (3) Okulikwambela ehimbwe. Opo matupopila Huku atyiho tyili momutima wetu. — Omutala Womulavi wa Kulindi wo 2025, pefo 19-20.

Oityi matulingi tukwateseko vokwakulupa?

Okwenda peumbo liavo, okuvelikalela, okuvehindikila kosipitali, nokwivisa navo. — Omutala Womulavi wa Kuhuhu wo 2025, pefo 6-7.

Oityi ava mavelinepe vena okulinga vahambukiswe Huku?

Okulinga etyi ovitumino vya kaputu vipopia. Monthiki velinepa vena okulinga ovipuka viomunthu ufenda Huku. Vena okulinga ovipuka vionondunge, avahalingi evi viailikwa m’Ombimbiliya. Okutomphola nawa pokupopia etyi mavaendeka ovipuka. — Omutala Womulavi wa Kayovo wo 2025, pefo 21-24.