“Muhalimbueiko Okutambula Ovaenda”

1, 2. (a) Omapiluluko patyi ovanthu vatunda kovilongo ovikuavo valinga hono? (Tala olutalatu pefo pahimbikila onthele.) (b) Elondolo patyi apostolu Paulu aava, iya omapulo patyi matulilongesa?

PALAMBALE omanima 30 tunde apa Osei, ankho Wehembangi ya Jeova atunda ko Gana akakala ko Europa.^[1] (Tala okatoi konthyulilo yonthele.) Wati: “Pakala vala katutu andyiimbuka okuti ovanthu kavanthyande. Otyilongo tyelikalela noku natunda. Motyilongo ankho ndyikala tyitokota. Etyi nailukila tyitenda unene. Outalala umwe ankho neheneive momuenyo wange, andyihimbika okulila.” Mokonda ankho katyapepukile ku Osei okulilongesa elaka lio tyilongo otyo, akala omanima omanyingi tyihena ovilinga. Iya mokonda wasapo otyilongo tyae, ankho wiivaluka ombunga yae nokulitehelela okuti omulike.

² Soka inkha ove ukahi motyitateka ngotyo, oñgeni molitehelela. Ove tyotyili upondola okuyakula nawa ovaenda aveho veya Mondyuo Yomaliongiyo ohatalela kotyivala ine otyilongo apa atunda. Ngotyo, Ombimbiliya ipopila Ovakristau votyotyili okuti “muhalimbueiko okutambula ovaenda.” (Hebreus 13:2) Pahe matutale omapulo amwe: Oñgeni Jeova atala onongendi? Okuti tuesukisa okupilulula olusoke luetu monkhalelo tukala ovaenda? Iya oñgeni tupondola okuyakula nawa omunthu umwe watunda kotyilongo otyikuavo weya mewaneno lietu?

OÑGENI JEOVA ATALA ONONGENDI

3, 4. Ngetyi tyipopia Êxodo 23:9, oñgeni Huku ankho ahanda ova Isilayeli vatekule onongendi, iya omokonda yatyi?

³ Konyima yetyi Jeova ayovola ovanthu vae koupika mo Egitu, weveavela ovitumino vievelongesa okukala nokankhenda no nongendi mbukala pokati kavo. (Êxodo 12:38, 49; 22:21) Namphila okukala ongendi katyapepukile, Jeova noluembia olunene ankho uvetekula. Mongeleka, ankho vapondola okupupulula momapia.​—Levítico 19:9, 10.

⁴ Jeova kaavelele vala ova Isilayeli otyitumino tyokukala nonthilo no nongendi, mahi ankho uhanda vahinangele oñgeni ankho velitehelela puetyi ankho onongendi. (Tanga Êxodo 23:9.) Puetyi ova Isilayeli vehenekale ovapika mo Egitu, ova Egitu ankho kavevehande mokonda velikalela. (Gênesis 43:32; 46:34; Êxodo 1:11-14) Omuenyo wova Isilayeli mo Egitu ankho kawapepukile. Jeova ankho uhanda vetyihinangele iya avakala nokankhenda no nongendi vakala pokati kavo.​—Levítico 19:33, 34.

5. Oityi matyitukuatesako okukala nokankhenda no nongendi nga Jeova?

⁵ Jeova kapilulukile. Ngotyo, tyina ovaenda veya mewaneno lietu, onthue katupondola okulimbuako okuti Jeova nkhele una okankhenda novanthu ovo. (Deuteronômio 10:17-19; Malaquias 3:5, 6) Talama osoko kovitateka ovinyingi onongendi vena. Mongeleka, kavetyivili okupopia elaka liotyilongo vailukila, tupu kavetyihande okulingwa onya. Tulingei ononkhono mbokuvekuatesako, nokukala nokankhenda navo.​—1 Pedro 3:8.

OKUTI TUESUKISA OKUPILULULA ONKHALELO TUTALA ONONGENDI?

6, 7. Oityi tyilekesa okuti Ovakristau ova Judeu velilongesa okuhalingi okapungulula?

⁶ Ovakristau votete velilongesile okuhalingi okapungulula otyipuka ankho tyilingwa unene nova Judeu. Motyipito tyo Pendekoste tyenima lio 33, Ovakristau ova Judeu ankho vakala mo Jerusalei, vayakulile nawa ovanthu vatunda movilongo vielikalela. (Atos 2:5, 44-47) Otyo tyalekesa okuti Ovakristau ova Judeu vanoñgonoka nawa oityi tyihangununa ondaka “okuyakula nawa ovaenda” ine “okukala nokankhenda no vaenda.”

⁷ Motyipito otyo, apamoneka otyipuka tyimwe. Ova Judeu ankho vapopia o Gregu veliyava mokonda ovahepe vavo kavekahi nokutekulwa nawa. (Atos 6:1) Opo vatetulule otyitateka otyo, ono apostolu avaholovona ovalume epandu-vali vendeko opo ovanthu aveho vahatekulwe onya. Ono apostolu vaholovona ovalume vena omanyina o Gregu, tyafuile opo tyipameke ovahepe.​—Atos 6:2-6.

8, 9. (a) Omapulo patyi maetukuatesako okulitala nawa inkha tuna okapungulula? (b) Oityi tuna okulipola? (1 Pedro 1:22)

⁸ Tyilinge tutyiimbuka ine katutyimbuka, ovituwa vietu vihongilinyua naapa tuekulila. (Romanos 12:2) Tupu, tutehelela ovanthu tukala navo pomaumbo, nava tuundapa navo, ine ava tulongeswa navo vapopia omapita ovanthu vatunda kovilongo ovikuavo, velaka ekuavo ine votyivala otyikuavo. Okuti tukahi nokuhongilinyua nomalusoke oo apenga? Oñgeni tukala tyina umwe apopia omapita otyilongo tyetu ine elaka lietu?

⁹ Pomuvo umwe, apostolu Petulu ankho utala omapita ovanthu ankho veheva Judeu. Mahi katutu-katutu elilongesa okulipola omalusoke oo ahaviukile. (Atos 10:28, 34, 35; Gálatas 2:11-14) Tyelifwa notyo, inkha tuimbuka okuti tutala omapita vakuetu ine tuna omalityindailo, tuna okulinga ononkhono opo tulipole omalusoke oo. (Tanga 1 Pedro 1:22.) Oityi tyipondola okutukuatesako okulinga ngotyo? Hinangela okuti atuho tuvakuankhali, katyesukisile otyilongo patyi tukala, atuho tuesukisa eyovo. (Romanos 3:9, 10, 21-24) Nongotyo katupondola okusoka okuti tuevila-po vali ku vakuetu! (1 Coríntios 4:7) Tuna okulitehelela ngetyi apostolu Paulu elitehelela. Wapopila Ovakristau vakuavo okuti “muhalimbueko onongendi” mokonda “ovanthu vombunga ya Huku.” (Efésios 2:19) Onthue atuho tuesukisa okuyekapo omalusoke omavi atulivaleka omunthu omupe.​—Colossenses 3:10, 11.

OÑGENI MATULEKESA OKANKHENDA KO NONGENDI

10, 11. Oñgeni Boasi ahetekela onkhalelo Jeova atala onongendi?

¹⁰ Omulume wekolelo Boasi wahetekela onkhalelo Jeova atala ovaenda. Oñgeni ngotyo? Etyi Boasi akatala ovaundapi vae vekahi nokuteya, amono Rute ongendi watunda kotyilongo tyo Moabe. Ankho ukahi nokulinga ononkhono ononene putyina ekahi nokupupulula. Ovitumino viapelwe Moisesi, ovahepe nga Rute ankho vapewa elao liokupupulula. Mahi Boasi ahuvu unene etyi Rute emuita inkha upondola okupupulula mepia liae, emupopila opo apupulule apa pekahi nawa.​—Tanga Rute 2:5-7, 15, 16.

¹¹ Etyi tyamoneka-po konyima tyalekesa nawa okuti Boasi wesuka unene na Rute tupu ankho wii ovitateka vikala no nongendi. Wemuita opo aundape novahikuena vakuavo opo ahalingwe onya novalume ankho vekahi nokuundapa mepia liae. wemuavela okulia nomaande, ngetyi alinga novaundapi vae. Boasi wakala nonthilo apameka omukai una omuhepe tupu ankho wahepa.—Rute 2:8-10, 13, 14.

12. Oñgeni vakuetu vakala tyina tuvelekesa okankhenda?

¹² Boasi walekesa okankhenda okanene na Rute, hamokonda vala Rute ankho uhole unene inaivi, Noemi, mahi omokonda Rute umbila Jeova iya ankho utyii okuti memuyakulila. Etyi Boasi alekesa okankhenda nae, walekesa okuti uhetekela okankhenda ka Jeova. (Rute 2:12, 20; Provérbios 19:17) Tyelifwa notyo, tyina tuna okankhenda tyituavela omphitilo “yokukuatesako ovanthu vatyo aveho” okulilongesa otyili nokuimbuka okuti Jeova uvehole unene.​—1 Timóteo 2:3, 4.

13, 14. (a) Omokonda yatyi tuna okukukunya nawa onongendi Mondyuo Yomaliongiyo? (b) Oityi tyipondola okutukuatesako okupopia nomunthu watunda kotyilongo otyikuavo?

¹³ Onthue tupondola okulekesa okankhenda konongendi tyina tuvetambula nawa Mondyuo Yomaliongiyo. Ovanthu vekahi nokuilukila kovilongo ovikuavo pamwe kavelitehelela nawa pokati kovanthu vehetyiliyile. Mokonda yotyilongo oku ekulila ine yotyivala tyae pamwe upondola okulitehelela okuti kesilivila kuvakuavo. Ngotyo tuesukisa okuvekukunya nokulekesa okuti tuvehole. Upondola okulilongesa oñgeni JW Language app tyikukunyua melaka liae mo JW language.​—Tanga Filipenses 2:3, 4.

¹⁴ Tyotyili vamwe kavelitehelela nawa okupopia nomunthu watunda kotyilongo otyikuavo. Opo wehelitehele ngotyo, upondola okupopia otyipuka tyimwe konthele yove muene. Moimbuka okuti muna ovipuka ovinyingi mupondola okutomphola. Hinangela okuti kese tyilongo tyina ovipuka oviwa novivi.

KUATESAKO VAKUENYI OKULITEHELA NAWA

15. Oityi tyipondola okukuatesako vana vatunda kovilongo ovikuavo?

¹⁵ Opo uyakule nawa ovanthu vatunda kovilongo ovikuavo veya Mondyuo Yomaliongiyo, lipula okuti: ‘Inkha ame ndyili kotyilongo otyikuavo, nahanda okutekulwa ñgeni? (Mateus 7:12) Pwa-elundo na vana vailukila motyilongo tyenyi. Ponthyimbi tupondola okuhanoñgonoka nawa onkhalelo valinga ovipuka ine vasoka. Tuhakevelei valinge ovipuka nokusoka ngovanthu vomo tyilongo tyetu. Mahi omokonda yatyi onthue tuhetavelela onkhalelo yavo vekahi?​—Tanga Romanos 15:7, outoi.

16, 17. (a) Oñgeni tupondola okulinga oupanga nomunthu vatunda kotyilongo otyikuavo? (b) Ovipuka patyi tupondola okulingila ovakuatate vailukila motyilongo tyetu?

¹⁶ Inkha tutaindya omuvo wokulilongesa konthele yotyilongo tyimwe kuatunda onongendi, matyitupepukila okuvenoñgonoka nawa. Mefendelo lietu liombunga, tupondola okulilongesa ovipuka vimwe konthele yotyilongo tyovanthu wailukila mewaneno lietu. Onkhalelo imwe yokunoñgonoka onongendi okuvekonga vakalie keumbo lietu. Jeova “waikulila omalongo ombundi yekolelo,” ngotyo nonthue tupondola okumuhetekela putyina tuikulila ondyuo yetu onongendi “vana tufenda navo.”​—Atos 14:27; Gálatas 6:10; Jó 31:32.

¹⁷ Tyina tukala omuvo omunyingi nombunga imwe yailukila mewaneno, otyo matyitukuatesako okunoñgonoka nokupanda ononkhono valinga opo vakale motyilongo tyetu. Tupondola okuimbuka okuti vahanda okulongeswa elaka lio motyilongo tyetu. Upondola okuvekuatesako okuvasa eongano likuatesako okukala nondyuo ine ovilinga. Okukuatesako ovakuatate vetu no nomphange movipuka ovitutu ngovio, tyivehambukiswa unene.​—Provérbios 3:27.

18. Ongeleka patyi yonthilo nolupandu onongendi vena okuhetekela hono?

¹⁸ Onongendi, valinga atyiho vevila opo vetyivile okukala motyilongo vailukila. Rute ongeleka ongwa konthele oyo. Tete, walekesa onthilo novituwa viotyilongo tyina, etyi apula ankho upondola okupupulula. (Rute 2:7) Kasokele okuti una okupupulula vala mokonda omuhepe ine vakuavo vena okumulingilako ovipuka. Vali, liwa-liwa wapandula aveho vemulekesa okankhenda. (Rute 2:13) Tyina onongendi valekesa ovituwa oviwa ngovio, ovakuatate no nomphange novanthu vopotyilongo mavakala nonthilo navo.

19. Omahunga patyi etukuatesako opo tuliepese nawa onongendi?

¹⁹ Onthue tupandula Jeova ukahi nokulekesa okankhenda okanene opo ovanthu vatyo aveho vatehelele onondaka onongwa. Kovilongo vatunda vamwe ankho kavelilongesa Ombimbiliya ine ankho kavaende komaliongiyo onombangi mba Jeova. Mahi pahe vekahi nokuliongiya nonthue komaliongiyo, onthue tuesukisa okuvekuatesako opo vehelitehelele okuti onongendi. Hamwe tutupu onombongo ine tutupu ounongo wokukuatesako ovanthu, mahi tyina tulekesa okankhenda tukahi nokuhetekela Jeova. Mokonda “tuvahetekeli va Huku” tuna okulinga atyiho tuvila opo tuyakule nawa ovaenda!​—Efésios 5:1, 2.