“Ondaka ya Huku ina . . . Ononkhono Ononene”

1. Oityi tyikukalesa nonthumbi yokuti Ondaka ya Huku ina epondolo? (Tala olutalatu pefo pahimbikila onthele.)

OVANTHU va Jeova vena onthumbi yokuti ondaka yae “ina omuenyo nononkhono ononene.” (Hebreus 4:12) Onthue tuhole okumona epondolo Liombimbilia momienyo vietu, no mu vakuetu. Etyi ankho vehenekale Onombangi mba Jeova, vamwe ankho ovimphulu, nokupuena omapangwe nokulinga oundalelapo. Tupu ovakuavo ankho vankhimana mokonda vena onombongo, mahi no ngotyo ankho velitehelela okuti pena otyipuka tyimwe tyakamba momuenyo wavo. (Eclesiastes 2:3-11) Moluotyo, ovanthu ovanyingi ankho vetupu ekevelelo, mahi pahe vavasa ehongolelo nekevelelo. Momutala Womulavi tutanga-mo onongeleka ononyingi mbononthele mbuna osapi yati: “Ombimbiliya Ipilulula Omuenyo Wovanthu.” Iya alo tyina vambatisalwa Ombimbiliya, itualako okupameka oupanga wavo na Jeova.

2. Oñgeni epondolo Liondaka ya Huku liakuatesileko ovanthu pomuvo wo Vakristau votete?

² Otyo katyihuvisa okuti ovanthu ovanyingi valinga omapiluluko omanene tyina velilongesa otyili. Alo umwe Ovakuatate vetu no nomphange kohale vana ankho vena ekevelelo liokuenda keulu yatuaileko okuvekuatesako. (Tanga 1 Coríntios 6:9-11.) Etyi Paulu apopia vana vahakapiñgana Ouhamba wa Huku, tupu ati: “Vamwe puonwe otyo muali ngotyo.” Ondaka ya Huku nospilitu sandu yae viakuatesako ovanthu ovo okulinga omapiluluko. Alo umwe vambatisalwa, konyima vamwe avalingi oviponyo ovinene. Mongeleka, Ombimbiliya ipopia omukuatate umwe ankho omulembulwa, wapolelwe mewaneno. Mahi konyima alingi omapiluluko iya akondoka vali mewaneno. (1 Coríntios 5:1-5; 2 Coríntios 2:5-8) Otyo tyikuatesako ovakuatate vetu no nomphange okulinga omapiluluko omanene mokonda Ondaka ya Huku ina epondolo.

3. Oityi matulilongesa monthele ei?

³ Ondaka ya Huku ina epondolo enene. Jeova wetuavela-yo iya onthue tuna okukala nonthumbi yokuti tukahi nokuyundapesa nawa. (2 Timóteo 2:15) Monthele ei matulilongesa oñgeni tupondola okuundapesa epondolo Liondaka ya Huku (1) momuenyo wetu, (2) movilinga viokuivisa iya (3)  tyina tulongesa kotilimbuna. Etyi tukahi nokulilongesa apa matyitukuatesako okulekesa ohole nolupandu ku Tate yetu keulu, utulongesa okupolako ouwa.​—Isaías 48:17.

MOMUENYO WETU

4. (a) Oityi tuesukisa okulinga opo Ondaka ya Huku itukuateseko? (b) Oityi ove ulinga opo ukale nomuvo wokutanga Ombimbiliya?

⁴ Opo Ondaka ya Huku itukuateseko, tuesukisa okuitanga apeho. Tuna okuitanga kese nthiki. (Josué 1:8) Ovanyingi puonthue vena ovilinga ovinyingi, mahi katupondola okuyeka otyipuka natyike, okukutikinya-mo ovilinga vietu, vitutyilike okutanga Ombimbiliya. (Tanga Efésios 5:15, 16.) Tupondola okutanga komuhuka ine o kounthiki ine o kongulohi. Onthue tulitehelela ngomuhoneki wo salmu wati: “Ame ndyihole unene ovitumino viove! Ndyisukalala navio onthiki aiho.”​—Salmo 119:97.

5, 6. (a) Omokonda yatyi tuesukisila okusokolola? (b) Oñgeni okusokolola tyipondola okutukuatesako? (c) Oñgeni okutanga Ombimbiliya nokusokolola kuetyi watanga tyekukuatesako?

⁵ Mahi, okutanga vala Ombimbiliya katyituuka. Tuesukisa okusokolola nawa-nawa kuetyi tukahi nokutanga. (Salmo 1:1-3) Okulinga ngotyo, matutyivili okuundapesa momuenyo wetu etyi tuatanga. Tyilinge tutangela Ombimbiliya motelefone ine monkhalelo onkhuavo, mahi etyi tuhanda okuyeka Ondaka ya Huku itupilulule nokutuavela ondundo.

⁶ Oñgeni okusokolola kuetyi tuatanga tyipondola okutukuatesako? Tyina tutanga Ombimbiliya, tuesukisa okutalama katutu atulipulu okuti: ‘Oityi otyo tyindongesa konthele ya Jeova? Oñgeni mandyiundapesa momuenyo wange etyi natanga? Omapiluluko patyi nkhele nesukisa okulinga?’ Tyina tusokolola Kondaka ya Huku iya nokulikuambela konthele yetyi tukahi nokutanga, matyitulundu okuendela-mo. Konyima matumono epondolo lio Mbimbiliya momienyo vietu.​—2 Coríntios 10:4, 5.

MOVILINGA VIOKUIVISA

7. Oñgeni tupondola okuundapesa nawa Ondaka ya Huku movilinga viokuivisa?

⁷ Tyakolela okuundapesa Ondaka ya Huku apeho tyina tuivisa natyina tulongesa. Omukuatate umwe wati: “Inkha muna Jeova movilinga viokuivisa umbo na umbo, okuti ove vala mopopi ine moyeke nae apopie?” Tyina tutangela omunthu umwe Ombimbiliya, ngotyo tukahi nokuyeka Jeova nae apopie. Okuholovona nawa o testu imwe Yombimbiliya, ina vali epondolo tyipona kese tyipuka tupopia. (1 Tessalonicenses 2:13) Tyina ukahi movilinga viokuivisa, okuti uundapesa Ombimbiliya ovikando ovinyingi?

8. Omokonda yatyi okutangela vala omunthu otestu Yombimbiliya katyituuka?

⁸ Okutangela otestu Yombimbiliya ovanthu tuivisa, katyituuka. Ovanthu ovanyingi kavanoñgonoka etyi Ombimbiliya ipopia. Tyotyili, otyo tyamonekele pomuvo wo apostolu iya na hono tyimoneka. (Romanos 10:2) Onthue katupondola okusoka okuti omunthu tuavasa manoñgonoka etyi o testu tuatanga ihangununa. Tupondola okumukuatesako tyina tuwana onondaka ine olusoke lwo testu iya konyima atumupopila oityi tyihangununa. Monkhalelo oyo, Ondaka ya Huku ipondola okuhika komitima viovanthu.​—Tanga Lucas 24:32.

9. Oñgeni tupondola okukuatesako ovanthu okukala nonthilo Nombimbiliya muetyi tupopia tyina tuhimbika okutanga otestu? Ava ongeleka.

⁹ Etyi tupopia tyina nkhele tuhenetange otestu tupu tyipondola okukuatesako omunthu okukala nonthilo Nombimbiliya. Mongeleka, tupondola okupopia okuti, “Tutale etyi Omutungi wetu apopia motestu ei.” Inkha tupopila omunthu mahi ombunga yae kavelilongesa, tupondola okuti: “Tala oityi Ovihonekwa Vikola vitupopila.” Inkha tuavasa omunthu uhena ngeleya tupondola okumupula okuti: “Weiviliale onondaka ombu mbo kohale?” Inkha tuhinangela okuti kese omunthu una ongeleya yae, matulingi atyiho tuvila opo tuhimbike etompho monkhalelo yaviuka.​—1 Coríntios 9:22, 23.

10. (a) Oityi tyaendele nomukuatate umwe? (b) Popia oñgeni ove wamuene epondolo Liondaka ya Huku tyina wivisa?

¹⁰ Ovanthu ovanyingi vaimbuka okuti Ondaka ya Huku ina epondolo enene liokukuatesako ovanthu valongesa. Mongeleka, omukuatate umwe ankho wakatalelapo omukulu umwe ankho utanga omikanda vietu omanima omanyingi. Onthiki imwe, etyi emutuaila Omutala Womulavi omupe emutangela otestu. Watanga 2 Coríntios 1:3, 4 yati: “Tate wokankhenda okanene, Huku weungumaneso aliho . . . utuungumanesa mononkhumbi mbetu ambuho.” Onondaka ombo ambuhiki unene komutima womukulu oo apopila omukuatate opo eitange vali. Konyima omukulu ati, oe nomukai wae vesukisa okupamekwa. Mokonda yo testu oyo ahande okunoñgonoka vali Ombimbiliya. Okuundapesa Ondaka ya Huku movilinga viokuivisa ina ononkhono ononene!​—Atos 19:20.

TYINA ULONGESA KO TILIMBUNA

11. Otyilinga patyi ovakuatate vokulongesa ko tilimbuna vena?

¹¹ Onthue tutyihole tyokuenda komaliongiyo, no kovionge. Mokonda oyo onkhalelo imwe yakolela yokufenda Jeova. Tupu tupola ouwa kuetyi tulilongesa. Ovakuatate valongesa kotilimbuna, vena elao enene notyilinga tyakolela. (Tiago 3:1) Vena okukala nonthumbi yokuti etyi valongesa tyitunda Mondaka ya Huku. Inkha una elao olio oñgeni moundapesa epondolo lio Mbimbiliya, opo uhike komitima vio vateheleli?

12. Oñgeni omulongomoni apondola okukala nonthumbi yokuti elongomona liae liapolwa Mombimbiliya?

¹² Okuundapesa Ombimbiliya otyipuka tyakolela melongomona. (João 7:16) Moluotyo wesukisa okulunguka tyina ulinga elongomona, opo onongeleka wava mbuhakale otyipuka tyakolela vali tyipona Ombimbiliya. Tupu, una okuhinangela okuti okutanga Ombimbiliya tyelikalela nokulongesa Ombimbiliya. Moluotyo, inkha utanga onotestu ononyingi, ovanthu ovanyingi ha kamavahinangela vali otestu naike. Ngotyo, holovona nawa onotestu uhanda okutanga. Konyima ovola omuvo wokutanga, ohangununa, oave ongeleka iya opopi oñgeni ovateheleli mavaendela-mo. (Neemias 8:8) Tyina upewa elongomona lipongiya nawa nokutanga onotestu mbuli-mo. Ovola okunoñgonoka inkha elongomona lielikuata no notestu. Konyima oundapesa onotestu mbumwe opo ulongese ononthele mbakolela vali mbelongomona. (Momukanda Beneficie-se da Escola do Ministério Teocrático melongeso 21 alo 23 muna onondonga mbukuatesako okuundapesa nawa onotestu tyina ulinga elongomona.) Iya tyakolela vali, ita ku Jeova opo ekukuateseko okupopia omalusoke ae akolela Ombimbiliya.​—Tanga Esdras 7:10; Provérbios 3:13, 14.

13. (a) Oñgeni omphange umwe akala etyi eiva otestu imwe meliongiyo? (b) Oñgeni onkhalelo Ombimbiliya yuundapeswa momaliongiyo etu yekukuatesako?

¹³ Omphange umwe ukala ko Australia etyi ankho omona, akala novitateka ovinyingi iya alo umwe etyi anoñgonoka Jeova, ankho ketavela okuti Jeova umuhole. Meliongiyo, omphange eivi otestu yemuhika unene komutima. Asokolola kotestu oyo iya alingi omaovololo, atualako okutanga ono versikulu ononkuavo Mbombimbiliya. Pahe akala nonthumbi yokuti Jeova umuhole.a (Tala okatoi.) Okuti nove weivile-ale otestu imwe meliongiyo ine omo tyonge, aikuhiki komutima?​—Neemias 8:12.

14. Oñgeni tupondola okulekesa okuti tuapandula iya tuhole Ondaka ya Jeova?

¹⁴ Okuti katupandula unene Jeova mokonda Yondaka yae Ombimbiliya? Jeova walaa okuti maitualako iya wafuisapo omulao oo. (1 Pedro 1:24, 25) Moluotyo, tuhanda okutanga Ombimbiliya apeho iya nokuiundapesa momuenyo wetu, nokukuatesako nayo vakuetu. Tyina tulinga ngotyo, tulekesa okuti tuna ohole iya tuapanda olumono olo, tupu tyakolela vali, tulekesa okuti tuhole Jeova Huku, Hekulu yo Mbimbiliya.