Vakuendye “Tualeiko Okuundapa pala Eyovo Lienyi”

1. Omokonda yatyi ombatisimu yakolela unene? (Tala olutalatu pefo pahimbikila onthele.)

OMANIMA aeho ovalongwa ovanyingi vo Mbimbiliya vambatisalwa. Ovanyingi puvo ovana, novakuendye. Vamwe vekulila mombunga ililongesa otyili. Okuti nove wekulila mombunga ngoyo? Inkha wekulila mombunga ngoyo iya pahe wambatisalwa, walinga nawa. Ovakristau aveho vesukisa okumbatisalwa. Iya ombatisimu yakolela unene tukakale nomuenyo uhapu.—Mateus 28:19, 20; 1 Pedro 3:21.

2. Omokonda yatyi uhapondola okukala nowoma wokulipakula ku Jeova?

² Etyi wambatisalua, Jeova wahimbika okukuavela ononkhano onongwa. Mahi otyo tyekuetela ovilinga ovikuavo. Omonkhalelo patyi? Monthiki wambatisalua, omukuatate walinga elongomona liombatisimu, wekupula okuti: “Motyilikutila tya Jesus Kristu, okuti welivela umwe ononkhali mbove olipakula ku Jeova opo ulinge ehando liae?” Ove okumbulula okuti yoo. Mokualinga ngotyo, ove walaa ku Jeova okuti mokala nohole nae iya okumuumbila matyikala otyipuka tyakolela vali momuenyo wove. Okuti wesukisa okulivela mokonda yomulao oo walinga wakolela unene? Au, kuesukisile okulivela! Ove nalumwe molivele inkha uyeka Jeova ekuhongolele. Vana vehei Jeova valinga onthele youye wa Satanasi. Inkha Eliapu kaliesukile novanthu valinga onthele youye walio, noñgonoka okuti tupu kaliesukile nove. Eliapu malihambukwa inkha ove uyekapo Jeova iya opumbwa omuenyo uhapu.

3. Oñgeni Jeova ekuyamba mokonda yetokolo walinga liokulipakula kwe?

³ Soka vala oñgeni Jeova ekuyamba mokonda yetokolo walinga yokulipakula kwe iya ombatisalwa. Ove waava omuenyo wove ku Jeova iya mokonda yotyo upondola okupopia nonthumbi okuti: “Jeova ukahi ponthele yange, himakala nowoma. Oityi omunthu apondola okundinga?” (Salmo 118:6) Petupu otyipuka tyituhambukiswa vali unene tyipona okukala konthele ya Jeova nokupandwa nae.

OTYILINGA TYOVE

4, 5. (a) Omokonda yatyi tupopila okuti okulipakula ku Jeova otyilinga tya kese munthu? (b) Ovitateka patyi Ovakristau aveho vena?

⁴ Ove kupondola okutala oupanga wove na Jeova ngatyina okulia, ulandelwa vala novo tate yove. Namphila ukala no tate yove mahi otyilinga tyokupameka oupanga wove na Jeova otyove. Omokonda yatyi otyo tyakolela okuhetyilimbwa? Omokonda petupu omunthu nawike wii oñgeni ekolelo liae malikalolwa komutwe wandyila. Mongeleka, hamwe ove wambatisalua puetyi ankho umona. Mahi pahe wekula vali iya onkhalelo ulitehelela yapiluluka, tupu una vali ovitateka ovikuavo. Omuhikuena umwe wati: “Omona kamayekepo vala okukala Ombangi ya Jeova mokonda yokuhalingi onthele movipito vio kosikola. Mahi putyina ekula, omahando okulinga otyihola eliyawisa, iya tyina otyo tyimoneka-po una okukala nonthumbi yokuti okutavela ovitumino via Jeova otyipuka tyaviuka.”

⁵ Ha vakuendye vala mavakala novitateka. Alo umwe ovakulu tyina vambatisalwa vakala novitateka vilola ekolelo liavo mononkhalelo mbelikalaila. Vamwe vena ovitateka motyinepo, vamwe ovitateka viekongoko iya ovakuavo valolwa oku vaundapa. Katyesukisile omanima eñgapi tuna, kese umwe ponthue wesukisa okukala omukuatyili ku Jeova tyina avasiwa novitateka vielikalaila.—Tiago 1:12-14.

6. (a) Okulipakula ku Jeova nomutima auho tyihangununa-tyi? (b) Oityi tupondola okulilongesila ko testu ya Filipenses 4:11-13?

⁶ Opo utualako okukala omukuatyili, hinangela okuti kualaele okuumbila vala Jeova tyina wehena ovitateka. Otyo tyilekesa okuti walaa okuumbila Omukulami Wouye Auho, namphila ulambela movitateka iya alo umwe tyina omapanga novo tate yove vayekapo okuumbila Jeova. (Salmo 27:10) Ita apeho ku Jeova ekukuateseko okufuisapo omulao walinga.—Tanga Filipenses 4:11-13.

7. Oityi tyihangununa okuundapa pala eyovo liove “nonthilo iya nonthekete”?

⁷ Jeova uhanda ove ukale epanga liae. Mahi tyesukisa ononkhono pala okutualako okupameka oupanga wove na Jeova nokuundapa pala eyovo liove. Filipenses 2:12 yati: “Tualeiko okuundapa pala eyovo lienyi nonthilo iya nonthekete.” Otyo tyilekesa okuti tuesukisa okusoka nawa konthele yovipuka matulingi opo tufuene vali ku Jeova nokutualako noukuatyili tyina pamoneka ovitateka. Onthue katupondola vala okusoka okuti ovipuka aviho maviende nawa. Hinangela okuti vamwe vokuali ovakuatyili ku Huku, hono vayekapo otyili. Ovipuka patyi upondola okulinga mavikukuatesako okuundapa pala eyovo liove?

OKULILONGESA OMBIMBILIYA TYAKOLELA UNENE

8. Oityi tyakutikinya okulinga elilongeso lioulike? Omokonda yatyi otyo tyakolela unene?

⁸ Opo tukale omapanga a Jeova, tuesukisa okumutehelela nokupopia nae. Onkhalelo yakolela unene yokutehelela Jeova oputyina tulilongesa Ombimbiliya. Otyo tyakutikinya okutanga iya nokusokolola Kondaka ya Huku nomikanda ovikuavo. Mahi, onkhalelo tulilongesa Ombimbiliya yelikalela nonkhalelo tulilongesa pala okulinga ono polova kosikola. Okulilongesa Ombimbiliya tyelifwa nokulinga oungendi pala okunoñgonoka ovipuka ovipe konthele ya Jeova. Ove mofuene vali ku Jeova iya ngwe mafuene vali kuove.—Tiago 4:8.

9. Oviti patyi vipondola okukukuatesako okulinga elilongeso lioulike?

⁹ Eongano lia Jeova lituavela oviti ovinyingi vipondola okukukuatesako okulilongesa nawa. Mongeleka, mo site jw.org muna onthele yati “Exercicios Biblicos” (Ovilinga opo Unoñgonoke Nawa Ombimbiliya) pana pati “Ovakuendye,” vipondola okukukuatesako okuendela muetyi ulilongesila komahipululo Ombimbiliya. Tupu mo jw.org movasimo onthele yati Omahongolelo Okulilongesa “Oityi Ombimbiliya Tyilityili Ilongesa,” Oviti ovio vipondola okukukuatesako okukala nekolelo liapama nokupopila vakuenyi omatavelo ove. Upondola okuvasa vali onondonga ononkhuavo pala elilongeso lioulike monthele yati “Jovens Perguntam . . . Como Tornar a Leitura da Bíblia Agradável?” mo Despertai! ya Abril yo 2009. Okulilongesa nokusokolola tyesukisa unene opo uundape pala eyovo liove.—Tanga Salmo 119:105.

OKULIKUAMBELA TYAKOLELA UNENE

10. Omokonda yatyi Omukristau wambatisalwa wesukisa okulikuambela?

¹⁰ Onthue tutehelela Jeova tyina tulilongesa Ombimbiliya iya tupopia nae tyina tulikuambela. Katupondola okusoka okuti elikuambelo otyiso vala ine otyipuka tulinga tyina tuhanda ovipuka viende nawa. Okulikuambela okupopia umwe no Nomutungi wetu. Soka vala kuetyi: Jeova uhanda okutehelela etyi ove uhanda okumupopila! (Tanga Filipenses 4:6.) Ngotyo, tyina usukalala unene notyipuka tyimwe, Ombimbiliya yati “pakula omulemo wove ku Jeova.” (Salmo 55:22) Ovakuatate ovanyingi no nomphange vapondola okukupopila oñgeni elikuambelo lievekuatesako. Nove elikuambelo lipondola okukukuatesako!

11. Omokonda yatyi apeho una okupandula Jeova?

¹¹ Mahi onthue katupondola okulikuambela vala tyina tuhanda Jeova etukuateseko. Ombimbiliya itupopila okuti: “Kalei ovanthu vokupandula.” (Colossenses 3:15) Pamwe, tusukalala unene novitateka vietu iya atuhatale ovipuka oviwa tuna. Ngotyo, hetekela okulinga ñga: Ononthiki ambuho, soka kovipuka vitatu oviwa viekumonekela mokueenda konthiki iya opandula Jeova mokonda yovipuka ovio. Omuhikuena umwe utiwa Abigail, wambatisalua etyi ankho ena omanima 12, wati: “Ame ndyisoka okuti Jeova watokala okupandwa vali unene tyipona omunthu omukuavo. Apeho tyina tuna omphitilo yokutyilinga tuna okupandula ovipuka oviwa Jeova etuavela.” Pamwe Abigail ulipula okuti: “Inkha muhuka ndyikala vala novipuka ndyina-le hono, opo oityi mandyipandula vali ku Jeova?”a (Tala onondaka pokatoi.)

OUWA UTUNDILILA KOVIPUKA VIAENDA MOMUENYO WOVE

12, 13. Ovipuka patyi viekukalesa nonthumbi yokuti Jeova omuwa? Omokonda yatyi tyakolela okusoka konthele yoñgeni Jeova ekukuatesako?

¹² Jeova wakuatesileko Ohamba David okukoleleya movitateka ovinyingi. Otyo David apopila okuti: “Hetekelei amutale okuti Jeova omuwa. Una ehambu oyouna uyumba onthumbi mwe.” (Salmo 34:8) Oversikulu ei ilekesa okuti tuesukisa okutala ovipuka oviwa Jeova etulingila. Tyina utanga Ombimbiliya nomikanda vietu nokuenda komaliongiyo etu, moimbuka oñgeni Huku akuatesileko vakuetu okukala ovakuatyili. Mahi putyina oupanga wove na Jeova ukala vali tyapama, wesukisa okutala oñgeni Jeova ekahi nokukukuatesako. Oñgeni ove muene waimbuka okuti Jeova ukahi nokukulingila ovipuka oviwa?

¹³ Ovakristau aveho vamona okuti Jeova wevelingila ovipuka oviwa monkhalelo imwe yakolela. Jeova ukonga kese umwe puonthue opo afuene kwe no Komona wae. Jesus wati: “Nawike upondola okuya kuame, inkha Tate wanthuma kemukokele.” (João 6:44) Okuti ulitehelela okuti Jeova wekukokela kwe? Ine usoka okuti ‘Jeova wakoka vo tate yove iya pahe ove ukahi vala nokuvelandula’? Hinangela okuti etyi welipakula ombatisalua wahimbika okukala noupanga wakolela unene na Jeova. Ombimbiliya itupopila okuti: “Inkha omunthu umwe uhole Huku, omunthu oo wiiwe na Huku.” (1 Coríntios 8:3) Apeho hambukilwa ovilinga Jeova ekuavela meongano liae.

14, 15. Oñgeni ovilinga viokuivisa vikukuatesako okukala nekolelo liapama?

¹⁴ Tupu ove watala oñgeni Jeova omuwa etyi ekuavela omutima wakola pala okuivisa, tyilinge movilinga viokuivisa ine o kosikola. Tyipondola okupuilisa okupopia konthele yo Mbimbiliya navana ulongesiwa navo kosikola. Hamwe upondola okusukalala unene inkha mavekutehelela umwe. Tyipondola okukutilisa owoma okuivisa povanthu ovanyingi. Oityi tyipondola okukukuatesako?

¹⁵ Soka konthele yomokonda yatyi utavelela kotyipuka tyimwe. Inkha melaka liove muna o Guias de Estudo ivasiwa mo jw.org undapesa otyiti otyo. Otyo tyipondola okukukuatesako okusoka kovipuka utavela, nomokonda yatyi uvitavelela iya noñgeni upondola okuhangununa omatavelo ove ku vakuenyi. Tyina ukala nonthumbi kuetyi utavela iya olipongiya nawa, ove mohande okupopila vakuenyi konthele ya Jeova.—Jeremias 20:8, 9.

16. Oityi tyipondola okukuavela ondundo yokupopila vakuenyi ovipuka utavela?

¹⁶ Alo umwe tyina welipongiya nawa, tyipondola okupuilisa okupopila vakuenyi konthele yetyi utavela. Omphange umwe una omanima 18, wambatisalwa etyi ankho ena omanima 13, wati: “Ame ndyina onthumbi kuetyi ndyitavela, mahi pamwe ndyilinga ononkhono ononene opo ndyikale nomalusoke aviuka.” Ngotyo, ngwe wovola okupopia konthele yotyili monkhalelo ikahi nawa, ngatyina ekahi vala nokutomphola. Wayawisako okuti: “Ava tulongeswa navo vatomphola vala nawa konthele yovipuka valinga. Naame ñgeno otyo ndyina okulinga. Ngotyo, naame ndyivepopila konthele yovipuka nalinga. Mongeleka ndyivepopila okuti ‘Monthiki imwe ame ankho ndyikahi nokulongesa Ombimbiliya iya . . . ’ Andyitualako okuvepopila etyi tyaendapo. Namphila nahahimbikile okupopia liwa-liwa konthele Yombimbiliya, mahi vamwe vamphula oñgeni ame ndyilongesa Ombimbiliya. Pamwe valinga omapulo konthele yetyi ndyilongesa. Okulinga ngotyo tyimphepukila vali. Iya apeho tyina ndyityilinga ndyihambukwa!”

17. Oityi vali tyipondola okukukuatesako okupopila vakuenyi etyi utavela?

¹⁷ Tyina vakuenyi vaimbuka okuti ove wesuka nokuna onthilo navo, tupu navo mavakala nonthilo nove iya netyi utavela. Olivia womanima 17 iya wambatisalwa puetyi ankho omututu wati: “Ame ankho ndyina owoma wokuti inkha tyina tutomphola ndyipopia konthele Yombimbiliya, ovanthu mavasoko okuti hamwe ndyitupu onondunge.” Konyima ahimbika okutala ovipuka monkhalelo yelikalela iya ati: “Ovakuendye ovanyingi kavei natyike konthele Yonombangi mba Jeova. Vei vala onthue. Ngotyo, ovituwa vietu vipondola okuvekuatesako okukala nonthilo Nonombangi mba Jeova. Mahi, inkha onthue tuna ovitateka konthele yokupopia ine tuna owoma wokupopila apa pena ovanthu ovanyingi ine hamwe tyina tupopia tukokoma mokonda yowoma? Inkha tulinga ngotyo, ovanthu vapondola okusoka okuti onthue tutupu onthumbi muetyi tutavela. Iya vapondola okutulinga omukuele mokonda yokuapopia tyihena onthumbi. Mahi inkha tupopia nonthumbi konthele yetyi tutavela iya atupopi ngatyina tukahi vala nokutomphola, ovanthu mavakala nonthilo nonthue.”

TUALAKO OKUUNDAPA PALA EYOVO LIOVE

18. Oityi wesukisa okulinga opo utualeko okuundapa pala eyovo liove?

¹⁸ Tuelilongesa okuti okuundapela eyovo lietu otyilinga tyakolela unene. Opo utyivile, wesukisa okutanga Ondaka ya Huku nokusokolola, nokulikuambela ku Jeova iya nokusoka kononkhalelo ambuho ekukuatesako. Okulinga ovipuka ovio matyikukuatesako okukala vali nonthumbi yokuti Jeova Epanga liove. Otyo matyikuavela ondundo yokupopila vakuenyi konthele yetyi utavela. —Tanga Salmo 73:28.

19. Ouwa patyi mopoloko inkha ulinga ononkhono pala okuundapela eyovo liove?

¹⁹ Jesus wati: “Inkha omunthu umwe uhanda okundandula, ayekepo okukalako pala-e muene, atyinde omuti wae wemone iya atualako okundandula.” (Mateus 16:24) Opo alandule Jesus, kese Mukristau wesukisa okulipakula ku Jeova ambatisalwa. Tyina Omukristau alinga ngotyo, ukahi vala nokuhimbika omuenyo ukahi nawa pahetyino iya otyo matyimukuatesako okukakala nomuenyo uhapu mouye omupe wa Huku. Ngotyo, linga atyiho uvila opo utualeko okuundapa pala eyovo liove muene!