Tualako Okukala Omunthu Wapama Motyili!
“Tualeiko okueendela mospilitu.” — GÁLATAS 5:16.
1, 2. Oityi omukuatate umwe aimbuka konthele yae muene iya oityi alinga konthele yotyo?
ROBERT wambatisalua etyi ankho omona, mahi otyili tyo Mbimbiliya ankho hatyipuka tyakolela unene momuenyo wae. Wapopia okuti: “Namphila ankho nahalingi ovipuka viapenga, mahi ankho ndyilandula vala onkhalelo ndyilitehelela. Ngoti ankho napama motyili, mokonda ankho ndyenda komaliongiyo aeho iya ankho ndyiundapa ngomukokoli-ndyila wapola pokati ovikando vimwe menima. Mahi ankho ndyilitehela okuti pena otyipuka tyakambela-po.”
2 Mahi Robert waimbuka vala otyipuka tyakambela-po etyi anepa. Robert nomuhikuena wae ankho vanyana otyo velilinga omapulo Ombimbiliya. Omukai wae ankho wanoñgonoka nawa Ombimbiliya iya ankho ukumbulula liwa-liwa omapulo aeho monkhalelo yapepuka. Mahi Robert ankho apeho ketyivili okukumbulula iya ankho ukala nohonyi mokonda yotyo. Wati: “Tyilinga ngatyina ankho nahanoñgonokele natyike. Andyisoko okuti: ‘Mokonda ame ndyinkhalamutwe yomukai wange, ndyina okulinga otyipuka tyimwe.’” Otyo umwe alinga. Wapopia okuti: “Andyililongesa unene Ombimbiliya iya ovipuka avihimbika okukala nawa. Andyinoñgonoka nawa ovipuka iya tyakolela vali, andyikala noupanga wapama na Jeova.”
3. (a) Oityi tupondola okulilongesila ku Robert? (b) Ovipuka patyi viakolela matulilongesa?
3 Tupondola okulilongesa ovipuka viakolela unene ku Robert. Tupondola okukala nenoñgonoko limwe lio Mbimbiliya iya nokuenda apeho komaliongiyo nomovilinga viokuivisa, mahi hatyoko vala tyitukalesa ovanthu vapama motyili. Ine hamwe tualingale ononkhono mbokukala ovanthu vapama motyili, mahi tyina tulitala nawa, tuimbuka okuti pena ovipuka vimwe tuesukisa okulinga vali nawa. (Filipenses 3:16) Monthele ei, matukumbulula omapulo etatu akolela unene: (1) Oityi matyitukuatesako okulinoñgonoka inkha tuapama umwe motyili? (2) Oñgeni tupondola okupama motyili? (3) Oñgeni okupama motyili tyipondola okutukuatesako ononthiki ambuho?
OÑGENI MATUNOÑGONOKA INKHA TUAPAMA UMWE MOTYILI?
4. Olie una okuendela monondaka mba Efésios 4:23, 24?
4 Etyi tuahimbika okuumbila Huku, tualinga omapiluluko omanene momuenyo wetu. Iya tuatualako okutyilinga alo umwe etyi tuambatisalwa-le. Ombimbiliya itupopila okuti: “Tualeiko okukala ovape monkhalelo yenyi yokusoka.” (Efésios 4:23, 24) Mokonda tuvakuankhali, tuesukisa okutualako okulinga omapiluluko. Alo umwe inkha tuumbila-le Jeova omanima omanyingi, no ngotyo tuna okutualako okupameka oupanga wetu nae.—Filipenses 3:12, 13.
5. Omapulo patyi maetukuatesako okulinoñgonoka nawa inkha tuapama umwe motyili?
5 Tyilinge tuvana ine tuvakulu, tuesukisa okulitala nawa. Tupondola okulipula: ‘Okuti ndyiluete okuti ndyikahi nokupama motyili? Okuti ndyikahi nokukala nga Kristu? Ovituwa viange nonkhalelo ndyikala momaliongiyo vilekesa-tyi konthele yange? Oityi omatompho ange alekesa konthele yetyi ndyihanda momuenyo? Otyituwa tyange tyokulilongesa, nonkhalelo yokuvala, nokulihiwisa iya nonkhalelo ndyilitehelela tyina namaviyulwa, vilekesa-tyi konthele yange? Oñgeni ndyikala tyina ndyihongiliyua okulinga etyi tyapenga? Okuti Ndyimukristau wapama motyili?’ (Efésios 4:13) Omapulo oo apondola okutukuatesako okulinoñgonoka inkha tuapama umwe motyili.
6. Oityi vali tyipondola okutukuatesako okulitala inkha tuapama umwe motyili?
6 Pamwe tuesukisa okukuatesuako na vakuetu okutala inkha tuapama umwe motyili. Apostolu Paulu wahangununa okuti omunthu wopahitu kanoñgonoka okuti onkhalelo yomuenyo wae kaihambukiswa Huku. Mahi omunthu wapama motyili unoñgonoka onkhalelo Huku atala ovipuka. Utyii nawa okuti Jeova kapande omunthu wopahitu. (1 Coríntios 2:14-16; 3:1-3) Ovakulu vewaneno vena olusoke lwa Kristu, liwa-liwa vanoñgonoka tyina ovakuatate vamwe vahimbika okutyinda omuenyo monkhalelo yapenga iya valinga ononkhono mbokuvekuatesako. Inkha ovakulu vewaneno vaovola okutukuatesako, okuti matutavela ekuateso liavo iya atulingi omapiluluko esukisa? Inkha tulinga ngotyo, matulekesa okuti tuhanda okukala ovanthu vapama motyili.—Eclesiastes 7:5, 9.
KALA OMUNTHU WAPAMA MOTYILI
7. Oñgeni tutyii okuti okukala nenoñgonoko lio Mbimbiliya katyilekesa okuti omunthu wapama motyili?
7 Okunoñgonoka vala Ombimbiliya katyituuka opo tukale ovanthu vapama motyili. Ohamba Salomau ankho wii ovipuka ovinyingi konthele ya Jeova, iya alo umwe ovipuka vimwe apopia vikahi mo Mbimbiliya. Mahi, konyima ahakala vali noupanga wapama na Jeova iya ahatualako okukala omukuatyili. (1 Reis 4:29, 30; 11:4-6) Ngotyo, tyihelilongesa vala Ombimbiliya, oityi vali tuna okulinga? Tuesukisa okutualako okupameka ekolelo lietu. (Colossenses 2:6, 7) Oñgeni tupondola okutyilinga?
8, 9. (a) Oityi matyitukuatesako okupameka ekolelo lietu? (b) Olusoke patyi tuna okukala nalo tyina tulilongesa nokusokolola? (Tala olutalatu pefo pahimbikila onthele.)
8 Kotyita tyotete, Paulu waavelele ondundo Ovakristau opo ‘vatualeko okukula motyili.’ (Hebreus 6:1) Oñgeni tupondola okuendela monondonga ombo? Onkhalelo imwe yakolela unene, o putyina tulilongesa omukanda Oñgeni Motualako Okukala Mohole Ya Huku?. Omukanda oo maukukuatesako okunoñgonoka oñgeni upondola okuendela monondonga mbo Mbimbiliya. Inkha welilongesa-le omukanda oo, pena omikanda omikuavo upondola okulilongesa mavikukuatesako okupameka ekolelo liove. (Colossenses 1:23) Tupu, tuesukisa okusokolola kuetyi tulilongesa nokuita ku Jeova etukuateseko okunoñgonoka oñgeni matuendela-mo.
9 Tyina tulilongesa iya atusokolola, tuna okutyilinga opo tukale nehando liokuhambukiswa Jeova iya nokumutavela. (Salmos 40:8; 119:97) Tupu, tulilongesa okuanya kese tyipuka tyipondola okututyilika okukula motyili.—Tito 2:11, 12.
10. Oityi ovakuendye vapondola okulinga opo vapame motyili?
10 Inkha ove umukuendye, okuti ukahi nokuovola okukala novilinga meongano? Omukuatate umwe uundapa mo Mbetele, apeho upopia novakuendye vahanda okumbatisalwa movionge iya uvepula konthele yovilinga vahanda okuvasa meongano. Waimbuka okuti ovakuendye vamwe vetyii-le oñgeni vahanda okuumbila Jeova komutwe wandyila. Vamwe vahanda okuumbila Jeova movilinga viomuvo auho ine okuilukila kuna kuesukisa ovaivisi. Mahi ovakuendye vamwe, kavetyivili okumukumbulula nawa. Okuti otyo tyilekesa okuti ovakuendye ovo velitehelela okuti kavesukisile okukala novilinga mewaneno? Inkha umukuendye, lipula okuti: ‘Okuti ndyenda komaliongiyo nomovilinga viokuivisa mokonda otyo vo tate yange vahanda ndyilinge? Ine naame ndyina oupanga wapama na Huku?’ Tyotyili, tyilinge tuvana ine tuvakulu, atuho tuesukisa okukala nehando liokukala novilinga meongano. Okusoka ngotyo, matyitukuatesako okupama motyili.—Eclesiastes 12:1, 13.
11. (a) Oityi tuna okulinga opo tukale ovanthu vapama motyili? (b) Ongeleka patyi yo Mbimbiliya tuna okuhetekela?
11 Tyina tuamaimbuka okuti tuesukisa okulinga omapiluluko, ngotyo tuna okutyilinga liwa. Okulinga ngotyo, tyakolela unene mokonda omuenyo wetu utei kuotyo. (Romanos 8:6-8) Jeova kakevelela tukale ovanthu vehena onkhali, mahi utuavela ospilitu sandu yae opo itukuateseko. No ngotyo, tuna okulinga ononkhono. Omukuatate John Barr, wali umwe Pononkhalamutwe mbo Nombangi mba Jeova, nthiki imwe wapopile konthele ya Lucas 13:24, ati: “Ovanthu ovanyingi kavatualako mokonda kavalingi ononkhono.” Tuesukisa okukala nga Jako, waluile no andyu ahayeke-ko aloo ayambwa. (Gênesis 32:26-28) Namphila okulilongesa Ombimbiliya tyipondola okueta ehambu, mahi katupondola okutala Ombimbiliya ngatyina osinema. Onthue tuesukisa okulinga ononkhono opo tuvase otyili tyipondola okutukuatesako.
12, 13. (a) Oityi matyitukuatesako okueendela muetyi tyapopia Romanos 15:5? (b) Oñgeni ongeleka ya Petulu nonondonga aavela mbupondola okutukuatesako? (c) Oityi upondola okulinga opo upame motyili? (Tala okakasa kati: “Oityi Upondola Okulinga opo Upame Motyili.”)
12 Tyina tulinga ononkhono mbokukala ovanthu vapama motyili, ospilitu sandu itukuatesako okulinga omapiluluko monkhalelo tusoka. Katutu-katutu, matulilongesa okusoka nga Kristu. (Romanos 15:5) Ospilitu sandu ipondola okutukuatesako okulityilika omahando omavi iya atukala novituwa vihambukiswa Huku. (Gálatas 5:16, 22, 23) Inkha tuaimbuka okuti tusoka unene komalumono ine okovitalukiso, katupondola okusoya. Tuna okutualako okuita ku Jeova ospilitu sandu yae opo itukuateseko okulinga ovipuka oviwa. (Lucas 11:13) Hinangela apostolu Petulu. Hapeho ankho asoka nga Kristu. (Mateus 16:22, 23; Lucas 22:34, 54-62; Gálatas 2:11-14) Mahi nalumwe asoyele iya Jeova emukuatesako. Katutu-katutu, Petulu elilongesa okusoka nga Kristu, iya nonthue tupondola okulinga ngae.
13 Konyima apostolu Petulu apopi ovituwa vimwe vipondola okutukuatesako. (Tanga 2 Pedro 1:5-8.) Tuesukisa okulinga ononkhono mbokulikondola omutima, nokukoleleya, nokukala nohole novakuatate, iya novituwa ovikuavo oviwa. Ononthiki ambuho tupondola okulipula okuti: ‘Otyituwa patyi ame nesukisa okukala natyo hono opo ndyipame vali motyili?’
ENDELA MONONDONGA MBO MBIMBILIYA KESE NTHIKI
14. Oñgeni okukala omunthu wapama motyili matyikalesa omuenyo wetu?
14 Inkha tusoka nga Kristu, otyo matyimonekela movituwa tuna kovilinga ine okosikola, nonkhalelo tupopia tupu nonkhalelo tulinga omatokolo etu a kese nthiki. Omatokolo etu maalekesa okuti tukahi nokulinga ononkhono mbokuhetekela Kristu. Mokonda tuvanthu vapama motyili, katuhande okulinga natyike tyipondola okunyona oupanga wetu na Jeova. Tyina tuhongiliyua okulinga otyipuka tyapenga, oupanga wetu na Jeova mautukuatesako okuanya. Tyina nkhele tuhenelinge etokolo, matulipulu okuti: ‘Onondonga patyi mbo Mbimbiliya mbupondola okunkhuatesako? Oityi ñgeno Kristu alinga? Oityi matyihambukiswa Jeova?’ Onthue tuna okukala notyituwa tyokusoka monkhalelo ngoyo. Ngotyo, matupopi vali konthele yovipuka vimwe. Mu kese nthele, matutale o testu ike Yombimbiliya ipondola okutukuatesako okulinga etokolo liaviuka.
15, 16. Oñgeni okusoka nga Kristu tyitukuatesako okulinga omatokolo nonondunge tyina (a) tuholovona omunthu matulinepe nae? (b) tuholovona omapanga?
15 Pokuholovona omunthu matulinepe nae. Onondonga mbo Mbimbiliya mbupopia konthele yotyo, mbuvasiwa mu 2 Coríntios 6:14, 15. (Tanga.) Paulu wayandyulula nawa okuti omunthu wapama motyili, welikalela unene nomunthu wopahitu. Ovanthu ovo vatala ovipuka mononkhalelo mbelikalaila. Oñgeni onondonga ombo mbupondola okukukuatesako okuholovona ou molinepe nae?
16 Pokuholovona omapanga etu. Onondonga mbo Mbimbiliya mbupopia konthele yotyo, mbuvasiwa mu 1 Coríntios 15:33. (Tanga.) Omunthu wapama motyili kalingi oupanga novanthu vapondola okunyona ekolelo liae. Soka oñgeni upondola okuendela monondonga ombo mononkhalelo ambuho mbomuenyo. Mongeleka, oñgeni otyo tyipondola okukukuatesako konthele yokulinga omapanga mo internet? Oñgeni onondonga ombo mbupondola okukukuatesako okutokola inkha molipake movitalukiso mo internet novanthu uhei?
Okuti omatokolo ange maankhuatesako okukala omunthu wapama motyili, nokuovola ovilinga meongano iya nokukala nombembwa na vakuetu? (Tala ono palagrafu 17-19)
17-19. Oñgeni okukala omunthu wapama motyili matyikukuatesako (a) okulityilika okulinga ovipuka vinyona oupanga wove na Jeova? (b) okuovola ovilinga meongano? (c) okutetulula ovitateka navakuenyi?
17 Ovipuka vinyona oupanga wetu na Jeova. Tuvasa elondolo liakolela unene mu Hebreus 6:1. (Tanga.) “Ovilinga viankhia” tuna okulityilika ovipi? Ovipuka vihesilivila vihetukuatesako okupama motyili. Elondolo olio lipopia konthele yovilinga viohitu, lipondola okukukuatesako okulipula okuti: ‘Okuti otyipuka etyi matyindyetela ouwa ine tyitupu-ale esilivilo? Okuti ndyipondola okulipaka movitanda evi? Omokonda yatyi nahapondola okulipaka novikundyi vihanda okupilulula onkhalelo youye?’
Okuti omatokolo ange maankhuatesako okukala omunthu wapama motyili, nokuovola ovilinga meongano iya nokukala nombembwa na vakuetu? (Tala ono palagrafu 17-19)
18 Okuovola ovilinga meongano. Melongomona lio Komphunda, Jesus wetuavela onondonga mbupondola okutukuatesako okulinga ononkhono mbokuovola ovilinga meongano. (Mateus 6:33) Omunthu wapama motyili upaka tete Ouhamba wa Huku momuenyo wae. Onondonga ombo mambutukuatesako okulipula: ‘Okuti mandyiende kosikola onene? Okuti ndyipondola okutavela ovilinga evi?’
Okuti omatokolo ange maankhuatesako okukala omunthu wapama motyili, nokuovola ovilinga meongano iya nokukala nombembwa na vakuetu? (Tala ono palagrafu 17-19)
19 Tyina pena ovitateka novakuatate. Onondonga Paulu aavelele Ovakristau mo Roma mbupondola okutukuatesako tyina tuna ovitateka navakuetu. (Romanos 12:18) Mokonda tuhetekela Kristu, onthue tulinga ononkhono opo tukale “nombembwa novanthu aveho.” Oñgeni tukala tyina tuna otyitateka novakuatate? Okuti tyitupuiya okutavela etyi vakuetu vapopia? Okuti ovanthu vetwii okuti tulinga ononkhono mbokukala nombembwa?—Tiago 3:18.
20. Omokonda yatyi tuhandela okupama motyili?
20 Onongeleka ombo, mbulekesa oñgeni onondonga mbo Mbimbiliya mbupondola okutukuatesako okulinga omatokolo maalekesa okuti tuhongolelwa nospilitu sandu ya Huku. Inkha tuapama motyili, matukala nehambu momuenyo. Robert wapopiwa konthyimbi, wati: “Etyi nakala noupanga wapama na Jeova, nakala onkhalamutwe ikahi nawa yombunga. Ame pahe ndyina ehambu.” Inkha tulinga atyiho tuvila opo tukale ovanthu vapama motyili, matupoloko ouwa. Matukala nehambu pahetyino iya komutwe wandyila matukakala “nomuenyo wotyotyili.”—1 Timóteo 6:19.